وزیراعظم نال وزارتِ مذہبی امور اتے نجی شعبے دے حج 2026 دے منتظمین نال ملاقات

اسلام آباد۔ 24 جون(اے پی پی)وزیراعظم محمد شہباز شریف حج 2026 دے بہترین انتظامات کوں عالمی سطح تے سراہے ونڃݨ کوں پوری قوم کیتے ماݨ دی ڳالھ قرار ݙیندے آکھیے جو خدمت، محنت اتے دیانت دا ایہو جذبہ قوماں کوں عظیم ٻݨیندے۔ وزیراعظم محمد شہباز شریف نال وزارتِ مذہبی امور اتے نجی شعبے دے حج 2026 دے منتظمین ملین اتے انہاں کوں بریفنگ ݙتی اے۔ وزیراعظم کوں ݙسایا گیا جو نجی شعبے دے 3 پاکستانی منتظم اپِݨی چنڳی کارکردگی سانڳے اے ایوارڈز جیتݨ اچ کامیاب رہین۔ پاکستانی حجاج کوں بہترین سہولتاں ݙیوݨ اتے سعودی حکومت ولوں 3 حج منتظمین کوں لبیتم ایکسیلنس ایوارڈ (Labbaytum Excellence Award) ݙتا ڳئے، جیندے اچ محمد عفان ذیشان دی ’المعراج منظم‘، محمد شاہد رفیق دی ’ابراہیم منظم‘ اتے زعیم اختر دی ’الفتاح منظم‘ بالترتیب پہلے، ݙوڄھے اتے تریڄھے نمبر تے آئن۔ ڈائریکٹر جنرل حج عبد الوہاب سومرو کوں وی لبیتم ایکسیلنس ایوارڈ ݙتا گئے۔ وزیر اعظم تریئے منتظمین اتے ڈی جی حج کوں ایوارڈز ملݨ تے مبارک ݙیندے حج 2026 دے بہترین انتظامات تے وفاقی وزیرِ مذہبی امور و بین المذاہب ہم آہنگی سردار محمد یوسف اتے وزارت دے سارے افسران اتے عملے دی تعریف کیتی۔ وزیراعظم آکھیا جو اے ایوارڈز سعودی عرب دی حکومت ولوں دورانِ حج پاکستانی سرکاری اتے نجی حج سکیماں دے تحت حجاج کوں ݙتیاں ونڄݨ والیاں خدمات دی تحسین تے پاکستان کیتے ہک اعزاز اے۔ انہاں آکھیا جو حکومتِ پاکستان اتے وزارتِ مذہبی امور دی مسلسل کوشِشاں نال حج 2026 دے انتظامات کوں عالمی سطح تے سراہیا ونڃݨ پوری قوم کیتے ماݨ دی ڳالھ اے، خدمت، محنت اتے دیانت دا ایہو او جذبہ اے جیڑھا قوماں کوں عظیم ٻݨیندے، ایں خدمت نال تساں نہ صرف اللہ تعالی دی رحمت پاتی ٻھل عازمین دیاں دعاواں وی گھدن اتے پاکستان دا ناں اچا کیتے۔ وزیراعظم امید کیتی جو تساں آندے سال حج دے انتظامات دے موقع تے وی ایں محنت، دیانت اتے خدمت دا معیار نہ صرف برقرار رکھسو ٻھل ایکؤں ٻیا بہتر ٻݨا تے ٻئے ایوارڈز جیتسو۔ ملاقات اچ وفاقی وزیرِ مذہبی امور سردار محمد یوسف، وزیر برائے بین الصوبائی کوآرڈینیشن اتے وزیراعظم دے مشیر رانا ثناء اللہ، سیکریٹری مذہبی امور ابرار احمد مرزا، ڈائریکٹر جنرل حج عبد الوہاب سومرو، المعراج منظم دے سی ای او محمد عفان ذیشان، ابراہیم منظم دے سی ای او محمد شاہد رفیق تے الفتاح منظم دے ڈی ای او زعیم اختر صدیقی شامل ہن۔