عاشورہ قربانی، صبر، استقامت تے حق و انصاف کیتے ثابت قدمی دا استعارہ اے، سردار ایاز صادق

اسلام آباد۔25 جون (اے پی پی) سپیکر قومی اسمبلی سردار ایاز صادق نواسہِ رسول حضرت امام حسین علیہ السلام، اہل بیتِ اطہار علیہم السلام تے شہدائے کربلا کوں خراجِ عقیدت پیش کریندے آکھیے جو واقعہِ کربلا تاریخِ اسلام دا ہک عظیم باب اے جیڑھا حق، انصاف، حریت، صبر تے اصولاں تے ثابت قدم رہݨ دا ابدی درس ݙیندے، حضرت امام حسین علیہ السلام تے انھاں دے جانثار رفقا دینِ اسلام دی سربلندی، انسانی وقار تے عدل و انصاف دے تحفظ کیتے عظیم قربانیاں پیش کیتیاں تے باطل قوتاں دے سامݨے سر تسلیم خم کرݨ دے بجائے حق و صداقت دا علم بلند کیتا۔ عاشورہ دے موقع تے اپݨے پیغام اچ انھاں آکھیا جو شہدائے کربلا دیاں قربانیاں قیامت تئیں آوݨ آلیاں نسلاں کیتے جرات، عزم تے استقامت دی روشن مثال ہن۔سپیکر قومی اسمبلی سردار ایاز صادق آکھیا جو اسوہِ حسینی اساکوں اے درس ݙیندے جو ہک مہذب، پرامن تے ترقی یافتہ معاشرے دی بنیاد انصاف، رواداری، اخوت تے برداشت تے ہوندی اے۔ انھاں دہشت گردی، انتہاپسندی تے عدم برداشت جیہے چیلنجز نال نبٹݨ کیتے قومی اتحاد تے مشترکہ کاوشاں دی لوڑھ تے زور ݙتا۔ انھاں فلسطین تے جموں و کشمیر دے مظلوم عوام دے نال یکجہتی دا اظہار کریندے آکھیا جو فلسطین تے جموں و کشمیر دے عوام اپݨے حقِ خود ارادیت تے انصاف دے حصول کیتے مسلسل قربانیاں پیش کریندے پئن، انھاں دی جرات و استقامت ایں آفاقی پیغام دی یاد ݙویندی اے جیڑھا حضرت امام حسین علیہ السلام تے شہدائے کربلا اپݨی عظیم قربانیاں دے ذریعے انسانیت کوں ݙتا۔ انھاں آکھیا جو ظلم، جبر تے انسانی حقوق دی خلاف ورزیاں دے خلاف آواز بلند کرݨا تے حق و صداقت دے اصولاں تے ثابت قدم رہݨا ہی پیغامِ کربلا دی حقیقی روح اے۔ایں موقع تے ڈپٹی سپیکر قومی اسمبلی سید غلام مصطفیٰ شاہ وی حضرت امام حسین علیہ السلام، اہل بیتِ اطہار علیہم السلام تے شہدائے کربلا کوں خراجِ عقیدت پیش کریندے آکھیا جو واقعہِ کربلا حق، انصاف، حریت تے انسانی وقار دا آفاقی پیغام اے۔ انھاں آکھیا جو حضرت امام حسین علیہ السلام دا جذبہِ ایثار، قربانی تے ثابت قدمی ہر دور اچ انسانیت کیتے مشعلِ راہ رہسی۔ ڈپٹی سپیکر قومی اسمبلی آکھیا جو واقعہِ کربلا اساکوں حق تے سچ دی خاطر ہر اوکھ دا ثابت قدمی نال سامݨا کرݨ دا درس ݙیندے۔