میڈیکل اینڈ ڈینٹل کالجز ایڈمیشن ٹیسٹ 20 ستمبر کوں ہوسی، امتحانی عمل کوں ٻیا بہتر تے محفوظ بݨایا ڳئے، وفاقی وزیر صحت دی پریس کانفرنس

اسلام آباد۔ 16 ستمبر (اے پی پی) وفاقی وزیر صحت سید مصطفیٰ کمال آکھیا جو ایں سال میڈیکل اینڈ ڈینٹل کالجز ایڈمیشن ٹیسٹ (MDCAT) 20 ستمبر 2026ء کوں پورے ملک اچ تھیسی۔ بدھ کوں پریس کانفرنس اچ انہاں ݙسایا جو ایں سال ایم ڈی کیٹ کیتے ملک بھر اچ 34 امتحانی مراکز قائم کیتے ڳئن جڈانجو ریاض، سعودی عرب اچ ہک بین الاقوامی مرکز وی قائم کیتا ڳئے۔ مجموعی طور تے ایک لکھ 38 ہزار 160 امیدواراں امتحان کیتے رجسٹریشن کروائی اے۔ انہاں آکھیا جو گزریل سال ایم ڈی کیٹ دے حوالے نال ہک وی شکایت سامھے نئیں آئی ، ایں سال امتحانی عمل کوں ٻیا بہتر تے محفوظ بݨایا ڳئے۔ وفاقی وزیر صحت موجب رواں سال 8 ہزار سوالات تے مشتمل سوالاتی بینک تیار کیتا ڳئے۔ ایں مقصد کیتے ملک بھر توں تقریباً 80 ماہرین دیاں خدمات حاصل کیتیاں ڳیاں، جنہاں تقریباً ݙو مہینے تئیں سکیورٹی دے خصوصی انتظامات اچ سوالات تیار کیتے۔ انہاں ݙسایا جو 8 ہزار سوالاں اچوں ہر صوبے کوں 180، 180 سوالات تے مشتمل ݙو اںڄ انڄ پیپرز فراہم کیتے ڳئن، جنہاں اچوں متعلقہ صوبے تے میڈیکل یونیورسٹیاں امتحانی پرچہ تیار کریسن۔ وفاقی وزیر آکھیا جو ماضی اچ پورے پاکستان کیتے ہکا پیپر ہوندا ہئی، جئیں پاروں کہیں ہک ڄاہ تے پرچہ لیک تھیوݨ دی صورت اچ پورے ملک دا امتحان متاثر تھیوݨ دا خدشہ رہندا ہئی۔ ایں خدشے کوں دور کرݨ کیتے ایں واری ہر صوبے کوں انڄ انڄ پیپرز فراہم کیتے ڳئن۔ انہاں واضح کیتا جو امیدواراں دی رجسٹریشن تے سوالاں دے بینک دی فراہمی تائیں پی ایم اینڈ ڈی سی آپݨی ذمہ واریاں مکمل کر ڳھدن، جڈانجو ہݨ امتحان دے انعقاد، پرچیاں دی طباعت، محفوظ تحویل، ترسیل، امتحان دے انعقاد تے نتائج دے اعلان سمیت ٻئے انتظامات متعلقہ صوبیاں تے نامزد میڈیکل یونیورسٹیاں دی ذمہ واری ہن۔ وفاقی وزیر صحت آکھیا جو وزارتِ صحت تے پی ایم اینڈ ڈی سی امتحانی عمل دی نگرانی تے مانیٹرنگ دی ذمہ واری پوری کریسن اتے کہیں احتجاج یا ٻئے مسئلے دی صورت اچ صوبیاں تے متعلقہ یونیورسٹیاں دے سربراہاں نال رابطے اچ رہسن۔ انہاں ݙسایا جو آزاد کشمیر دے طلبہ کیتے وی خصوصی انتظامات کیتے ڳئن۔ انٹرنیٹ دے مسائل کوں مدنظر رکھیندے ہوئیں اتھاں طلبہ کوں ہارڈ کاپی دی سہولت وی فراہم کیتی ڳئی اے جݙانجو آزاد کشمیر دے علاوہ اسلام آباد اچ وی انہاں طلبہ کیتے خصوصی امتحانی مرکز قائم کیتا ڳئے۔ وفاقی وزیر صحت آکھیا جو وزیراعظم وی ایم ڈی کیٹ دے انعقاد اچ مکمل راز داری، سکیورٹی تے شفافیت یقینی بݨاوݨ دی ہدایت کیتی اے۔ انہاں آکھیا جو متعلقہ یونیورسٹیاں کوں امتحانی پرچیاں دا پری ہاک اینالیسس (Pre-hoc Analysis) وی یقینی بݨاوݨا ہوسی تانجو غلط، ناقص یا مشکوک سوالات امتحانی پرچے دا حصہ نہ بݨن۔ سید مصطفیٰ کمال موجب اگر امتحانی پرچہ لیک تھیندے یا شفافیت دے تقاضے پورے نئیں کیتے ویندے تاں متعلقہ یونیورسٹی کوں ذمہ دار قرار ݙتا ویسے۔ ایجھی صورت اچ پی ایم اینڈ ڈی سی امتحان کراوݨ آلی یونیورسٹی دی بقیہ 50 فیصد ادائیگی روکݨ یا بطور جرمانہ ضبط کرݨ دا اختیار رکھیندے۔ میڈیکل کالجز اچ داخلیاں تے نشستاں دے حوالے نال وفاقی وزیر صحت ݙسایا جو ایں سال میڈیکل کالجز اچ داخلیاں کیتے مجموعی طور تے 22 ہزار نشستاں دستیاب ہن۔ انہاں سال اچ ݙو واری ایم ڈی کیٹ منعقد کرݨ دی تجویز دے حوالے نال آکھیا جو اے تجویز قابلِ عمل کائنی۔ انہاں ݙسایا جو گزشتہ سال تقریباً 300 نشستاں خالی رہ ڳیاں ہن۔