وزیرِ اعظم دی پمز ہسپتال سانحہ دی انکوائری رپورٹ دی روشنی اچ مجوزہ کماں کوں ترائے مہینیاں اچ مکمل کرݨ دی ہدایت

اسلام آباد۔ 16 ستمبر (اے پی پی) وزیرِ اعظم محمد شہباز شریف پمز ہسپتال اچ فائر سیفٹی سمیت نظام دی بہتری، ایں کوں بین الاقوامی تقاضیاں نال ہم آہنگ کرݨ تے انکوائری رپورٹ دی روشنی اچ مجوزہ کماں کوں آئندہ ترائے مہینیاں اچ مکمل کرݨ دی ہدایت کریندیں ہوئیں آکھیا جو پمز ہسپتال دی بہتری کیتے طویل مدتی کماں تے مبنی جامع لائحہ عمل وی مرتب کیتا ونڄے۔ بدھ کوں وزیراعظم آفس دے میڈیا ونگ توں جاری بیان دے مطابق وزیرِ اعظم محمد شہباز شریف دی صدارت اچ پمز ہسپتال دی بہتری کیتے لائحہ عمل تے اجلاس تھیا، اجلاس اچ پمز تحقیقاتی رپورٹ تے وزارتِ قومی صحت ولوں پمز دے پرفارمنس آڈٹ دا جائزہ گھدا ڳیا۔ وزیراعظم ہدایت کیتی جو انکوائری رپورٹ اچ مجوزہ قلیل مدتی کماں تے عملدرآمد کوں آندے ترائے مہینیاں اچ یقینی بݨایا ونڄے، پمز ہسپتال اچ بہتری تے ایں کوں بین الاقوامی تقاضیاں نال ہم آہنگ کرݨ کیتے ہر ممکن اقدام چاتا ونڄے، فائر سیفٹی نال متعلق نظام کیتے پی کے ایل آئی توں معاونت تے تجاویز گھدیاں ونڄن۔ وزیرِ اعظم آکھیا جو ڈبلیو ایچ او دی رپورٹ اچ موجود تجاویز تے غور کر تے انہاں تے عملدرآمد وی یقینی بݨایا ونڄے، ہسپتال اچ دوائیں دی فراہمی تے سہولیات بالکل مفت فراہم کرݨ کیتے کم وی لائحہ عمل دا حصہ بݨائے ونڄن، پمز ہسپتال دی بہتری کیتے چنڳٰ شہرت دی حامل افرادی قوت کوں تعینات کیتا ونڄے، پمز ہسپتال دی بہتری کیتے طویل مدتی کماں تے مبنی ہک جامع لائحہ عمل وی ٻݨایا ونڄے، پولی کلینک ہسپتال دا آڈٹ کر تے بے ضابطگیاں کوں دور کیتا ونڄے تے ایں دی تنظیمِ نو دا لائحہ عمل ٻݨایا ونڄے۔ وزیرِ اعظم ہدایت کیتی جو سی ڈی اے اسلام آباد اچ موجود سارے سرکاری تے نجی ہسپتالاں اچ فائر سیفٹی کماں تے عملدرآمد یقینی بݨاوے، سی ڈی اے تے سارے متعلقہ ادارے سرکاری تے نجی دفاتر تے عمارتاں اچ فائر سیفٹی دے حوالے نال آڈٹ یقینی بݨاون، سارے دفاتر تے عمارتاں اچ فائر سیفٹی کماں تے عملدرآمد یقینی بݨایا ونڄے۔ اجلاس کوں وزارتِ قومی صحت ولوں پمز ہسپتال دی بہتری تے ایں کوں بین الاقوامی معیار نال ہم آہنگ کرݨ کیتے کماں تے بریفنگ ݙتی ڳئی۔ اجلاس کوں ݙسایا ڳیا جو پمز ہسپتال دے پرفارمنس آڈٹ اچ جانچ کیتے ڳئے انڈیکیٹرز اچوں 90 فیصد دے قابلِ قبول ہدف دے مقابلے اچ صرف 39.7 فیصد کمپلائنس پاتی ڳئی۔ اجلاس کوں ݙسایا ڳیا جو پمز تحقیقاتی رپورٹ دی روشنی اچ 37 مجوزہ کماں تے فوری عملدرآمد یقینی بݨایا ویندا پئے جݙانجوہ اجلاس کوں قلیل، وسط تے طویل مدتی کماں تے وی بریفنگ ݙتی ڳئی۔ اجلاس اچ وفاقی وزراء اعظم نذیر تارڑ، احد خان چیمہ، عطاء اللہ تارڑ، سید مصطفیٰ کمال، معاونِ خصوصی مختار احمد بھرتھ تے متعلقہ اعلیٰ حکام شرکت کیتی۔