حضرت امام حسینؑ تے جانثار رفقاء دی لازوال قربانی تاریخِ انسانی دے عظیم ترین مظاہرِجرات، استقامت تے ظلم دے خلاف حق دی سربلندی دی روشن مثال اے، اعظم نذیر تارڑ

اسلام آباد۔ 26 جون (اے پی پی)وفاقی وزیر قانون و انصاف و انسانی حقوق سینیٹر اعظم نذیر تارڑ آکھیے کربلا وچ حضرت امام حسینؑ تے انھاں دے جانثار رفقاء دی لازوال قربانی تاریخِ انسانی دے عظیم ترین مظاہرِ جرات، استقامت تے ظلم دے خلاف حق دی سربلندی دی روشن مثال اے۔ حق، انصاف، انسانی وقار تے اصولاں تے غیر متزلزل ثابت قدمی دا جیڑھا پیغام امام حسینؑ اپݨی قربانی توں ݙتے، او اڄ وی دنیا بھر وچ انسانیت کیتے مشعلِ راہ اے۔وزارتِ قانون و انصاف دے پاسوں جاری بیان وچ وفاقی وزیر آکھیا واقعۂ کربلا اساکوں عدل، صبر، ایثار، رواداری تے انسان دوستی جیھاں آفاقی اقدار دی یاد ݙویندے۔ یومِ عاشورہ دے موقع تے اساکوں انھاں تعلیمات تے غور کریندیں اپݨے معاشرے وچ برداشت، قومی یکجہتی، باہمی احترام تے سماجی ہم آہنگی کوں ودھاوݨ کیتے اپݨا کردار ادا کرݨ دا عہد کرݨا چاہیدے۔ انھاں آکھیا ایں مقدس ݙینھ تے اساں حضرت امام حسینؑ دے عظیم ورثے کوں خراجِ عقیدت پیش کریندیں انسانی وقار دے تحفظ، کمزور تے محروم طبقیں دے حقوق دے ودھارے، تے ہک پرامن، جامع تے منصفانہ پاکستان دی تعمیر کیتے اپݨے عزم دی تجدید کریندں۔ اللہ تعالیٰ اساکوں حق و صداقت دی راہ تے چلݨ دی توفیق عطا فرماوے تے ساݙے وطنِ عزیز کوں امن، استحکام تے خوشحالی نال نوازے۔