سپیکر قومی اسمبلی دی ملائیشین ہم منصب نال ملاقات، ݙوہائیں ملکاں دے پارلیمانی تعلقات مستحکم بݨاوݨ تے اتفاق

کیپ ٹاؤن۔ 16 ستمبر (اے پی پی) سپیکر قومی اسمبلی سردار ایاز صادق ملائیشیا دے ہاؤس آف رپریزنٹیٹوِز دے سپیکر ڈاکٹر جوہری بن عبدل نال ملاقات کیتی ڄیندے دوران ݙوہائیں ملکاں دے پارلیمانی تعلقات ٻئے مستحکم بݨاوݨ تے اتفاق کیتا ڳیا۔ قومی اسمبلی سیکرٹریٹ موجب سردار ایاز صادق ایں موقع تے آکھیا جو پارلیمانی فرینڈشپ گروپس ݙوہائیں ملکاں وچال تعلقات کوں ٻیا مضبوط بݨاوݨ اچ اہم کردار ادا کر سڳدن۔ انہاں آکھیا جو مشرقِ وسطیٰ اچ قیامِ امن کیتے پاکستان دی کوششاں دی حمایت تے ملائیشیا دا کردار قابلِ تحسین اے، پاکستان علاقائی امن تے استحکام کیتے سفارتی کوششاں جاری رکھݨ کیتے پُرعزم اے۔ سپیکر آکھیا جو پہلگام واقعے دے بعد پیدا تھیوݨ آلی کشیدگی دے دوران پاکستان امن کوں ترجیح ݙتی، بھارت سندھ طاس معاہدے کوں یکطرفہ طور تے معطل کر تے بین الاقوامی قوانین دی خلاف ورزی کیتی۔ انہاں دا آکھݨ ہئی جو پاکستان کوں افغان سرزمین توں دہشت گردی دا سامݨا اے، علاقائی تنازعات دا پرامن حل ضروری اے۔ انہاں آکھیا جو پاکستان خطے اچ امن تے استحکام دے فروغ کیتے پُرعزم اے، مکہ مکرمہ جوائنٹ ڈیفنس معاہدے تے مؤثر عملدرآمد مسلم ملکاں دے اتحاد اچ معاون ہوسی۔ سپیکر سردار ایاز صادق ملائیشین ہم منصب کوں دورۂ پاکستان دی دعوت وی ݙتی۔