عالمِ اسلام وچ ابھردے اتحاد دا سہرا پاکستان دے کردار کوں ویندے، وزیرِ دفاع خواجہ محمد آصف

سیالکوٹ۔ 26 جون (اے پی پی) وزیرِدفاع خواجہ محمد آصف سیالکوٹ وچ میڈیا نال ڳالھ کریندے آکھیے ایران امریکہ جنگ وچ پاکستان جیڑھا سفارتی کردار ادا کیتے او تاریخ وچ ہمیشہ یاد رکھیا ویسی تے عالمِ اسلام وچ ابھردے اتحاد دا سہرا پاکستان کوں ویندے۔ وزیرِدفاع عاشورۂ محرم دے مرکزی جلوس تے مجلسِ عزا وچ شرکت کیتی۔ ایں موقع تے ڈپٹی کمشنر صبا اصغر تے ڈی پی او دوست محمد وزراء کوں ضلع بھر وچ محرم دے سکیورٹی، ٹریفک تے صفائی دے انتظامات تے بریفنگ ݙتی۔خواجہ آصف آکھیا ایرانی قوم دی استقامت سنتِ حسینی دی یاد تازہ کر ݙتی اے، تے ایں ویلھے امتِ مسلمہ دا جیڑھا اتحاد ݙیکھݨ وچ آندا پئے او پاکستان دے عزم تے ایرانی عوام دی ثابت قدمی پاروں اے۔ انھاں امید ظاہر کیتی فلسطین تکھے ہک آزاد ریاست بݨسی تے لبنان دے عوام کوں اسرائیلی ظلم توں نجات ملسی۔سکیورٹی انتظامات دی تفصیل تے ڈپٹی کمشنر ݙسایا 10 محرم کوں 87 ماتمی جلوس برآمد تھیندے پئن جنہاں دی نگرانی 410 توں ودھ سی سی ٹی وی کیمریں نال کیتی ویندی پئی اے۔ ڈی پی او دوست محمد ݙسایا سکیورٹی کیتے 2600 توں ودھ پولیس اہلکار ڈیوٹی کریندے پئن تے چھتاں تے وی اہلکار تعینات ہن۔