تشددتےغیرانسانی سلوک کہیں مہذب معاشرے اچ قبول کائنی، وزیراعظم شہباز شریف

اسلام آباد۔ 26 جون (اے پی پی) وزیراعظم محمد شہباز شریف تشدد دے متاثرین دی حمایت دے عالمی ݙینھ دے موقع تے آپݨے پیغام اچ آکھیے جو تشدد، غیر انسانی یا توہین آمیز سلوک کہیں وی مہذب معاشرے وچ ناقابلِ قبول اے، ایجھے مکروہ اقدامات انسانی حقوق، بین الاقوامی قوانین تے اسلامی تعلیمات دے خلاف ہن۔وزیراعظم آکھیا جو پاکستان دنیا وچ تشدد دے متاثرین نال یکجہتی کریندے تے تشدد دی ہر شکل دے خاتمے دے عزم دا اعادہ کریندے۔ کہیں وی قسم دے تشدد دے متاثرین بہترین طبی، نفسیاتی، قانونی تے سماجی معاونت دے حقدارہن تے تشدد کرݨ آلیں دا احتساب ضروری اے۔ ایں مقصد کیتے پاکستان وچ متعلقہ قوانین دے نفاذ تے ادارہ جاتی اصلاحات کوں ٻیا تکڑا بݨایا ویندا پئے۔انہاں آکھیا جو پاکستان غیر ملکی قابضین ولوں منظم تشدد کوں بطور ہتھیار استعمال کرݨ تے شدید تشویش دا اظہار کریندے۔ فلسطین تے مقبوضہ جموں و کشمیر دے عوام ریاستی جبر تے قابضین دے بدترین تشدد دا سامݨا کریندے پئن، جنہاں دے جرائم دی مذمت تے جوابدہی مشترکہ عالمی ذمہ واری اے۔ بھارت دے غیر قانونی زیرِ تسلط مقبوضہ کشمیر وچ ݙہاکیں توں انسانی حقوق دیاں سنگین خلاف ورزیاں، دورانِ حراست تشدد تے جبری گمشدگیاں تھیندیاں پئن، جیندے تے عالمی اداریں دی رپورٹاں تشویش دا اظہار کیتے۔وزیراعظم عالمی برادری تے اقوامِ متحدہ توں مطالبہ کیتا انسانی حقوق دی خلاف ورزی کرݨ آلیں دا احتساب یقینی بݨایا ونڄے۔ انہاں مقبوضہ کشمیر دے عوام نال بھرپور یکجہتی کریندیں اقوامِ متحدہ دی سلامتی کونسل دی قرارداداں موجب انہاں دے حقِ خودارادیت دی سیاسی، سفارتی تے اخلاقی حمایت جاری رکھݨ دے عزم دا اعادہ کیتا۔