پاکستان سارے تصفیہ طلب مسئلیں دے حل کیتے ڳالھ مہاڑ تے سفارت کاری دی پالیسی تےعمل کریندا پئے ، مسلح افواج غیر ملکی سرپرستی اچ تھیوݨ آلی دہشت گردی دی لعنت مکاوݨ سانڳے کوشاں اے، پوری قوم مسلح افواج دے رلے کھڑی اے، وزیرِاعظم

کراچی۔27 جون (اے پی پی) وزیرِاعظم محمد شہباز شریف ملک دے خلاف دشمن دے ناپاک عزائم ناکام بݨاوݨ دے پکے عزم دا اعادہ کریندے آکھیے جو پاکستان اڄ دنیا اچ امن دے علمبردار دا کردار ادا کریندے پئے، پاکستان دی پرخلوص ثالثی کوششاں دے نتیجے اچ امریکہ تے ایران وچال تاریخی اسلام آباد مفاہمتی یادداشت تے دستخط تھئن۔ دشمن اساݙے امن تے استحکام کوں ضیان پڄاوݨ کیتے بزدلانہ ہتھکنڈے تے اپݨی پراکسیاں دا استعمال کریندے پئے، مسلح افواج غیر ملکی سرپرستی اچ تھیوݨ آلی دہشت گردی دی لعنت مکاوݨ کیتے کوشاں اے، پوری قوم اپݨی بہادر مسلح افواج دے رلے کھڑی اے، پاکستان سارے تصفیہ طلب مسئلیں دے حل کیتے امن، ڳالھ مہاڑ تے سفارت کاری دی پالیسی تے عمل کریندا پئے۔خطے دی بدلدی صورتحال عالمی معیشت تے بین الاقوامی سپلائی چین کیتے میری ٹائم سکیورٹی دی اہمیت کوں پہلے توں زیادہ اجاگر کیتے، اڄ آزادانہ بحری آونڄ تے جہازرانی دی آزادی پوری دنیا دی بنیادی لوڑھ بݨ چکی اے، حکومت پاک بحریہ کوں مزید تکڑا، موثر تے جدید دفاعی فورس بݨاوݨ کیتے پرعزم اے۔ انھاں اے ڳالھ اتھاں پاکستان نیول اکیڈمی پی این ایس رہبر اچ 125 مڈشپ مین تے 33ویں شارٹ سروس کمیشن کورس دی پاسنگ آؤٹ پریڈ دی تقریب توں خطاب کریندے آکھی۔تقریب اچ وزیرِ دفاع خواجہ محمد آصف، وفاقی وزیرِ اطلاعات و نشریات عطاء اللہ تارڑ، گورنر سندھ نہال ہاشمی، وزیرِاعلیٰ سندھ سید مراد علی شاہ، پاک بحریہ دے سربراہ ایڈمرل نوید اشرف تے ݙوجھے اعلیٰ افسر وی موجود ہن۔

تقریب اچ آوݨ تے پاک بحریہ دے سربراہ ایڈمرل نوید اشرف وزیرِاعظم دا استقبال کیتا۔ ایں موقع تے وزیرِاعظم کوں گارڈ آف آنر پیش کیتا ڳیا، وزیرِاعظم پریڈ دا معائنہ کیتا۔

وزیرِاعظم اعلیٰ کارکردگی ݙکھاوݨ آلے کیڈٹس اچ اعزازات ونڈئے، مڈشپ مین عمرمختار کوں بہترین کارکردگی تے اعزازی شمشیر (تلوار) نال نوازیا ڳیا، افسر کیڈٹ حافظ محمد احمد منور کوں چیف آف ڈیفنس فورسز گولڈ میڈل ݙتا ڳیا، اکیڈمی ڈرک مڈشپ مین دا اعزاز ہادی عباس خان دے حصے اچ آیا، شارٹ سروس کمیشن کورس دی افسر کیڈٹ الویرا حمزہ کوں کمانڈنٹ گولڈ میڈل نال نوازیا ڳیا۔ تقریب اچ کیڈٹ آفیسرز توں پیشہ ورانہ حلف ڳھڈا ڳیا ڄݙاں جو پاک بحریہ دے ہیلی کاپٹراں سلامی پیش کیتی۔

تقریب توں خطاب کریندے وزیر اعظم آکھیا جو پاسنگ آؤٹ پریڈ اچ شرکت تے انھاں کوں خوشی تھئی اے، سارے پاس آؤٹ تھیوݨ آلے تے اعزازات حاصل کرݨ آلے کیڈٹس کوں مبارخ ݙینداں۔ وزیرِاعظم آکھیا جو میکوں خوشی اے جو پاس آؤٹ تھیوݨ آلیں اچ بھرا ملکاں ترکیہ، بحرین، بنگلہ دیش، عراق، سری لنکا تے جبوتی نال تعلق رکھݨ آلے کیڈٹس وی شامل ہن، میکوں امید اے جو ایں بہترین تربیتی مرکز توں حاصل تھیوݨ والا علم، تربیت تے پیشہ ورانہ مہارت انھاں کیتے پورے کیریئر دے دوران ٻہوں مفید ثابت تھیسی تے او اپݨے اپݨے ملکاں دی بحریہ دی پیشہ ورانہ سرگرمیاں اچ موثر طریقے نال حصہ گھن سڳسن۔ ساریں توں اہم ڳالھ اے جو اتھاں تربیت دے دوران انھاں دیاں خوشگوار یاداں، دوستی تے تعلق اساݙے دوست ملکاں دے تعلقات کوں مزید تکڑا بݨاوݨ اچ معاون ثابت تھیسی۔وزیرِاعظم آکھیا جو تقریب اچ پاس آؤٹ تھیوݨ آلے کیڈٹس دے اہل خانہ تے دوست وی موجود ہن، انھاں دیاں دُعاواں، حمایت تے تعاون دا تہاݙی کامیابیاں اچ اہم کردار اے تے ڄݙاں تساں پاک بحریہ اچ قابلِ فخر کیریئر دا آغاز کریندے پئے ہو تاں اے تہاݙے کیتے ہک عظیم طاقت رہسی۔ وزیرِاعظم اکیڈمی اچ تربیت دے اعلیٰ معیار ݙیوݨ ، ڈسپلن دے قیام تے مثالی لیڈرشپ کوں یقینی بݨاوݨ تے اکیڈمی دے کمانڈنٹ، فیکلٹی تے ٹریننگ سٹاف کوں خراجِ تحسین پیش کیتا۔ وزیرِاعظم آکھیا جو میکوں اعتماد اے جو کمیشن حاصل کرݨ آلے آفیسرز نہ صرف اپݨے آپ کوں علم تے مہارت توں مستفید کریسن بلکہ اپݨے آپ کوں جرات و بہادری تے مقابلے دے جذبے نال سرشار رکھیسن جیڑھے مستقبل دے چیلنجاں نال نبٹݨ کیتے درکار ہوسن تے اپݨی اپݨی بحریہ دیاں شاندار روایات کوں برقرار رکھیسن۔وزیرِاعظم آکھیا جو او ایں اکیڈمی اچ ایجھے موقع تے خطاب کریندے پئن ڄݙاں عالمی سطح تے وݙیاں تبدیلیاں رونما تھیندیاں پئن، جیڑھیاں اساݙی زندگیاں تے ایجھے اثرات مرتب کریندیاں پئن جِنھاں دا پہلے تصور وی نئی کیتا ونڄ سڳدا۔ وزیرِاعظم آکھیا جو اڄ پاکستان کوں ماݨ اے جو او اللہ دے فضل و کرم نال دنیا اچ امن دے علمبردار دا کردار ادا کریندے پئے، بھرا تے دوست ملکاں دے تعاون نال پاکستان دی پرخلوص ثالثی کاوشاں دے نتیجے اچ امریکہ تے ایران وچال تاریخی اسلام آباد مفاہمتی یادداشت تے دستخط تھئن، جئیں تے میکوں وی ثالث دے طور تے دستخط کرݨ دا اعزاز حاصل اے۔وزیرِاعظم قیامِ امن کیتے ݙینھ رات انتھک کوششاں تے فریقین کوں امن تے ہم آہنگی دے رستے تے گھن آوݨ کیتے چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر کوں خراجِ تحسین پیش کیتا۔ وزیرِ اعظم آکھیا جو ایران دے صدر ڈاکٹر مسعود پزشکیان دے پاکستان دے اڄوکے دورے توں نہ صرف پاکستان تے ایران دے برادرانہ تعلقات ظاہر تھیندن بلکہ اے خطے اچ امن دے ودھارے کیتے پاکستان دیاں کوششاں دا وی اعتراف اے۔وزیرِاعظم آکھیا جو خطے دی بدلدی صورتحال عالمی معیشت تے بین الاقوامی سپلائی چین کیتے میری ٹائم سکیورٹی دی اہمیت دی حقیقت کوں پہلے توں زیادہ اجاگر کیتے، اڄ آزادانہ بحری آونڄ تے جہازرانی دی آزادی ہک سہولت ہی کائنی بلکہ پوری دنیا دی بنیادی لوڑھ بݨ چکی اے۔ وزیرِاعظم آکھیا جو حکومت پاک بحریہ کوں مزید تکڑا ، موثر تے جدید دفاعی فورس بݨاوݨ کیتے پرعزم اے جیڑھی نہ صرف اساݙے قومی دفاع کوں یقینی بݨاوݨ دی مؤثر صلاحیت رکھیندی ہووے بلکہ وسیع بنیاداں تے میری ٹائم ریجن اچ وی بھرپور کردار ادا کر سڳے، پاک بحریہ معرکہِ حق، آپریشن بنیانِ مرصوص اچ اپݨی صلاحیتاں دا بھرپور لوہا منوائے تے اپݨے بحری سرحداں دا تحفظ کریندے دشمن دے عزائم کوں ناکام بݨائے۔ معرکہِ حق اچ پاک بحریہ دا کردار شاندار رہیا۔انھاں کیڈٹس کوں مخاطب کریندے آکھیا جو تساں پاک بحریہ دے ہیروز کموڈور ایس ایم انور، کمانڈر ظفر محمد خان تے وائس ایڈمرل احمد تسنیم دی قابلِ فخر میراث دے وارث او، جِنھاں دی جرات و بہادری، قربانی تے پیشہ ورانہ مہارت پاکستان کیتے ہک اعزاز اے۔ انھاں آکھیا جو تساں وی حوصلے، عزم، ڈسپلن تے وقار دیاں اقدار دے ودھارے کیتے ثابت قدم رہو، میکوں یقین اے جو تساں مادرِ وطن دے دفاع کیتے ہر چیلنج دا ثابت قدمی دے نال مقابلہ کریسو تے جیڑھی تربیت تے پیشہ ورانہ تجربہ حاصل کیتے او عملی میدان اچ تہاݙے کم آسی۔وزیرِاعظم آکھیا جو اڄ کمیشن حاصل کرݨ آلے افسران صرف علم تے مہارت ہی کائنی بلکہ اعتماد، حوصلے تے جنگی جذبے نال وی لیس تھی تے نکلدے پئن، جیڑھے مستقبل دے چیلنجز نال نبٹݨ کیتے ضروری ہن۔ انھاں آکھیا جو اے افسران ایجھے دور اچ پاک بحریہ دا حصہ بݨدے پئن ڄݙاں سمندری شعبہ تکھے جدید ٹیکنالوجی، مصنوعی ذہانت (اے آئی) تے بغیر پائلٹ نظام (ڈرونز) دی طرف ودھدا پئے، انھاں نویں افسراں تے زور ݙتا جو او عزم، جرات، نظم و ضبط، دیانت داری تے وفاداری جیہیاں اقدار کوں ہمیشہ مقدم رکھن۔وزیرِاعظم آکھیا جو اڄ اِنھاں افسراں دے مونڈھے تے سڄݨ آلا رینک ہک وݙی ذمہ واری دی علامت اے، پرسکون سمندر کݙہیں ملاح دی آزمائش نئی گھندا تے نہ ہی موافق ہوائیں ہک کپتان دی صلاحیت دا معیار ہوندن، بلکہ طوفانی سمندر تے تکھی ہوا ہی انسان دے حوصلے تے کردار دا اصل امتحان ہوندئن۔ وزیرِاعظم خطے دے چیلنجنگ سکیورٹی ماحول اچ آپریشن محافظ البحر دے ذریعے بندرگاہواں تئیں توانائی دی بلا تعطل فراہمی کوں یقینی بݨاوݨ کیتے کیتیاں ونڄݨ آلیاں کوششاں دی تعریف کیتی۔وزیرِ اعظم آکھیا جو پاکستان کوں بین الاقوامی تے ٻاہرلے خطرات پاروں مختلف سکیورٹی چیلنجز دا سامݨا اے، اساݙے مشرقی ہمسائے کوں گزریل سال مئی اچ ذلت آمیز شکست دا سامݨا کرݨا پیا او اساݙے ملک دے امن و استحکام کوں ضیان پڄاوݨ کیتے بزدلانہ ہتھکنڈے تے اپݨی پراکسیاں کوں استعمال کریندے پئے ڄݙاں جو اساݙی بہادر مسلح افواج اساݙی مغربی سرحداں توں غیر ملکی سرپرستی اچ تھیوݨ آلی دہشت گردی دی لعنت مکاوݨ کیتے کوشاں ہن، پوری پاکستانی قوم اپݨی بہادر مسلح افواج دے رلے کھڑی اے، پورا ملک دشمناں دے ناپاک عزائم کوں ناکام بݨاوݨ کیتے آہنی عزم رکھیندے ڄݙاں جو پاکستان سارے تصفیہ طلب مسئلیں دے حل کیتے امن، ڳالھ مہاڑ تے سفارت کاری دی پالیسی تے عمل کریندا پئے ۔ وزیرِاعظم کشمیر، فلسطین تے (غزہ) دے عوام دی حمایت کیتے وی پاکستان دے غیر متزلزل عزم دا اعادہ کیتا۔