امریکہ پاکستان کوں سمگل شدہ 36 نوادرات واپس کر ݙتے

نیویارک۔ 16 ستمبر (اے پی پی) پاکستان توں چوری کر تے امریکہ سمگل کیتے ڳئے 36 نوادرات پاکستان حکومت دے حوالے کر ݙتے ڳئے، جنہاں کوں ہݨ پاکستان واپس آندا ویسے۔ نوادرات دی حوالگی دے سلسلے اچ نیویارک کاؤنٹی ڈسٹرکٹ اٹارنی دے دفتر اچ تھیوݨ آلی تقریب اچ حوالگی دا عمل مکمل کیتا ڳیا۔ نیویارک اچ پاکستان دے قونصل جنرل امیر احمد آتوزئی ایں سلسلے اچ معاہدے تے دستخط کیتے۔ معاہدے دے تحت 36 نوادرات پاکستان کوں واپس کیتے ڳئے، جنہاں اچ چوتھی صدی عیسوی دا گرے شِسٹ نال بݨایا ڳیا یاکشی دیوی دا مجسمہ اتے 2700 توں 3000 قبل مسیح دے دور نال تعلق رکھݨ آلے مٹی دے 35 مجسمے شامل ہن۔ تقریب توں خطاب کریندیں ہوئیں پاکستانی قونصل جنرل ڈسٹرکٹ اٹارنی دے دفتر دے اینٹیکوئٹیز ٹریفکنگ یونٹ (Antiquities Trafficking Unit) دی مسلسل معاونت تے اظہارِ تشکر کیتا۔ انہاں آکھیا جو ثقافتی ورثہ پوری انسانیت دا مشترکہ ورثہ اے۔ انہاں آکھیا جو نوادرات دی قانونی بازیابی تے واپسی نال پاکستان تے دنیا بھر اچ آوݨ آلی نسلاں کوں انسانی تہذیب دی انہاں غیر معمولی یادگاراں دا مطالعہ کرݨ، انہاں کوں سراہاوݨ تے انہاں توں سکھݨ دا موقع ملسی۔