چیف جسٹس وفاقی آئینی عدالت جسٹس امین الدین خان دی چوݙھویں سینٹ پیٹرزبرگ انٹرنیشنل لیگل فورم اچ پاکستان دی نمائندگی

اسلام آباد۔27 جون (اے پی پی) چیف جسٹس وفاقی آئینی عدالت جسٹس امین الدین خان روس دی وفاقی ریاست سینٹ پیٹرزبرگ اچ منعقد تھیوݨ آلے چوݙھویں سینٹ پیٹرزبرگ انٹرنیشنل لیگل فورم اچ پاکستان دی نمائندگی کیتی اے، ڄݙاں جو انھاں ایں موقع تے دنیا دی آئینی عدالتاں، سپریم کورٹس تے انصاف دے شعبے دے اداریں دے نال قانون دی حکمرانی، انصاف تئیں رسائی تے آئینی حکمرانی کیتے تعاون کوں ودھارا ݙیوݨ دے عزم دا اعادہ کیتا۔اتھاں جاری پریس ریلیز موجب اے فورم دنیا دے اہم ترین بین الاقوامی فورمز اچوں ہک اے جیڑھا قانونی تعاون، عدالتی مکالمے تے قانون دی حکمرانی کوں ودھارا ݙیوݨ کیتے وقف اے۔ فورم دے دوران چیف جسٹس عالمی سطح دے ممتاز فقہاء، سرکاری عہدیداراں تے قانونی ماہرین دے نال آئینی مسئلیں، عدالتی آزادی، بین الاقوامی قانونی تعاون تے جمہوری اداریں کوں تکڑا بݨاوݨ اچ عدالتاں دے ابھردے کردار تے اعلیٰ سطح دے مباحثیں اچ حصہ ڳھدا۔فورم دے موقع تے چیف جسٹس اہم ݙوطرفہ ملاقاتاں کیتیاں، جِنھاں اچ جمہوریہ ترکی دے وزیرِانصاف اکین گورلک، جمہوریہ تاجکستان دے چیف جسٹس (سپریم کورٹ دے چیئرمین) جسٹس رستم پیراخمدووچ مرزا زادہ تے روسی فیڈریشن کونسل اچ روس–پاکستان فرینڈشپ گروپ دے سربراہ سینیٹر ولادیمیر چیژوف شامل ہن۔ ایں موقع تے پاکستان دے روس اچ سفیر فیصل نیاز ترمذی وی موجود ہن۔ ملاقاتاں دا محور عدالتی تعاون کوں تکڑا بݨاوݨ، ادارہ جاتی تعاون کوں ودھاوݨ، قانونی مہارت دے تبادلے کوں ودھارا ݙیوݨ تے آئینی قانون، عدالتی انتظامی تے قانونی تعلیم دے شعبیں اچ پاکستان تے دوست ملکاں دے وچال گھاٹے تعلقات دے رستے ڳولݨ ہئی۔چیف جسٹس وفاقی آئینی عدالت پاکستان دے ایں عزم دا ول اعادہ کیتا جو او بین الاقوامی عدالتی مکالمے کوں ودھارا ݙیسن تے دنیا دی آئینی عدالتاں، سپریم کورٹس تے انصاف دے شعبے دے اداریں دے نال قانون دی حکمرانی، انصاف تئیں رسائی تے آئینی حکمرانی دے حصول کیتے تعاون کوں ودھارا ݙیسن۔ چوݙھویں سینٹ پیٹرزبرگ انٹرنیشنل لیگل فورم اچ چیف جسٹس دی شرکت پاکستان دی فعال بین الاقوامی قانونی مصروفیات دے تسلسل تے عالمی عدالتی و آئینی مباحثیں اچ ملک دی موجودگی کوں مزید مستحکم کریندی اے۔