وزیرِاعظم شہباز شریف دا کراچی اچ فتنہ الہندوستان دے دہشت گرداں دے بزدلانہ حملے کوں ناکام بݨاوݨ تے سکیورٹی فورسز کوں خراجِ تحسین

اسلام آباد۔28 جون (اے پی پی) وزیرِاعظم محمد شہباز شریف کراچی اچ پاکستان رینجرز (سندھ) دے کیمپ تے فتنہ الہندوستان دے دہشت گرداں دے بزدلانہ حملے کوں ناکام بݨاوݨ تے سکیورٹی فورسز کوں خراجِ تحسین پیش کریندے آکھیے جو پاکستان رینجرز دے جواناں فتنہ الہندوستان دے دہشت گرداں دے مذموم عزائم ناکام بݨا تے ہک واری ول اپݨی پیشہ ورانہ صلاحیت، بہادری تے فرض شناسی دا مظاہرہ کیتے۔ وزیرِاعظم دفتر دے میڈیا ونگ توں جاری بیان دے مطابق وزیرِ اعظم آکھیا جو ترائے دہشت گرداں کوں ہلاک تے ہک کوں زندہ گرفتار کرتے سکیورٹی فورسز فتنہ الہندوستان دے جارحانہ عزائم کوں خاک اچ ملا ݙتے۔ انھاں آکھیا جو آپریشن دے دوران وطن تے اپݨی جاناں نچھاور کرݨ آلے شہداء کوں پوری قوم سلام پیش کریندی اے، انھاں دیاں قربانیاں ہمیشہ یاد رکھیاں ویسن۔ وزیرِاعظم دعا کیتی جو شہداء دے اہل خانہ کوں اللہ تعالیٰ صبرِ جمیل عطا فرماوے، اساں انھاں دے ݙکھ اچ برابر دے شریک ہیسے۔ انھاں آپریشن دے دوران زخمی تھیوݨ آلیں دی صحتیابی کیتے وی دعا کیتی۔وزیرِاعظم آکھیا جو شہداء دا خون ضائع نہ ونڄݨ ݙتا ویسی، دہشت گردی دے ہر فتنے دا پوری قوت نال خاتمہ کیتا ویسے۔ فتنہ الہندوستان تے ایں دے سرپرست اپݨے ناپاک عزائم اچ کݙہیں کامیاب نئی تھی سڳدے۔ وزیرِاعظم آکھیا جو قوم اپݨی بہادر مسلح افواج، رینجرز تے قانون نافذ کرݨ آلے اداریاں دے رلے کھڑی اے، دہشت گردی دے ناسور دے مکمل خاتمے تئیں اساݙی جدوجہد پوری قوت تے عزم دے نال جاری رہسی