این ڈی ایم اے دا ملک اچ ساوݨ مینھ توں پہلے خطرات بارے الرٹ جاری

اسلام آباد۔28 جون (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) شہریاں کوں محتاط رہݨ دا مشورہ ݙیندے آکھیے جو ملک اچ 28 جون توں 3 جولائی تئیں وقفے وقفے نال پری ساوݨ مینھ متوقع ہن، شمالی علاقیں اچ گلیشیئر پگھلݨ، چھل تے لینڈ سلائیڈنگ دے شدید خطرے خبردار کریندے لوکاں کوں سفر نہ کرݨ، باخبر رہݨ تے ضروری حفاظتی تدابیر ورتݨ دی تاکید کیتی اے۔نیشنل ڈیزاسٹر مینجمنٹ اتھارٹی دے حکام اتوار کوں مقامی میڈیا چینلز نال ڳالھ مہاڑ کریندے آکھیا جو زرو دی گرمی تے متوقع ساوݨ مینھ دے خطرناک امتزاج توں گلیشیئر پگھلݨ اچ تیزی دا امکان اے جئیں توں گلگت بلتستان، خیبرپختونخوا تے آزاد جموں کشمیر اچ دریاواں تے ندی نالیں اچ پاݨی دی سطح اچ تکھے ودھݨ دا ݙر اے۔ انہاں چتاوݨی ݙتی پہاڑی علاقیں دے تکھے بدلدے تے غیر مستحکم موسم پاروں پیشین گوئی دی مدت دے دوران برفانی جھیل دے چھل (GLOF)، تھکے سیلاب تے لینڈ سلائیڈنگ دے زیادہ خطرات دا سامݨا تھی سڳدے۔ ہنزہ، نگر، غذر، سکردو، شگر، گھانچے، کھرمنگ، استور، دیامر، اتلے تے تلویں چترال تے سوات سودھے ہائی رسک آلے اضلاع اچ رہائشیاں، سیاحواں تے مسافراں کوں احتیاط دا مشورہ ݙیندے حکام آکھیا جو موسم دی اچانک تبدیلی توں جان لیوا حالات پیدا تھی سڳدن۔این ڈی ایم اے عوام تے زور ݙتا جو دریاواں، ندی نالیں، برفانی جھیلاں تے دریا دے کناریاں دے نیڑے غیر ضروری نقل و حرکت توں سختی نال گریز کرن، جان و مال دے ضیان توں بچݨ کیتے مقامی حکام کوں کہیں وی غیر معمولی یا خطرناک صورتحال دی فوری اطلاع ݙیوݨ دی اہمیت تے زور ݙتا۔ صوبائی ڈیزاسٹر مینجمنٹ اتھارٹیز (PDMAs) کوں سخت ہدایات دے نال ہائی الرٹ تے رکھیا ڳئے تاں جو متوقع موسمی نظام پاروں کہیں وی آفت دی صورت اچ ہنگامی تیاریاں، تکھا ردِعمل دی صلاحیت تے مربوط کارروائی کوں یقینی بݨایا ونڄ سڳے۔ این ڈی ایم اے ایں ڳالھ تے زور ݙتے جو خطرات کوں گھٹ کرݨ، جاناں دی حفاظت کرݨ تے متوقع موسم متعلق خطرات توں ممکنہ ضیان کوں گھٹ کرݨ کیتے وقتی احتیاط، حفاظتی مشوریاں تے سختی نال عمل کرݨ تے ہر سطح تے مربوط تیاری ضروری اے۔