پاکستان رینجرز (سندھ) دے کیمپ تے بھارتی پراکسی جماعت الاحرار نال تعلق رکھݨ آلے دہشت گرداں دا بزدلانہ حملہ ناکام، 3 خوارج جہنم واصل، خارجیاں دا ساتھی افغان شہری زخمی حالت اچ گرفتار

راولپنڈی۔28 جون (اے پی پی) پاک فوج دے شعبہ تعلقاتِ عامہ (آئی ایس پی آر) آکھیے جو 27 جون 2026 کوں کراچی اچ پاکستان رینجرز (سندھ) دے کیمپ تے بھارتی پراکسی جماعت الاحرار نال تعلق رکھݨ آلے خوارج دی طرفوں ہک بزدلانہ دہشت گرد حملہ کیتا ڳیا، حملہ آوراں کیمپ دے مین گیٹ تے دھماکے دے بعد حفاظتی حصار دی خلاف ورزی کرݨ دی کوشش کیتی تاں جو رینجرز دے دستیں دے چوکس تے پرعزم جواب نال انھاں دے مذموم عزائم کوں ناکام بݨا ݙتا ڳیا۔آئی ایس پی آر توں اتوار کوں جاری پریس ریلیز موجب بزدلانہ دہشت گرد حملے کوں ناکام بݨیندے ہوئیں ترائے خارجیاں کوں ہلاک تے ہک خارجی کوں زخمی حالت اچ گرفتار کرڳھدا ڳئے جیڑھا ہک افغان شہری اے۔ فائرنگ دے تبادلے دے دوران دھرتی دے ترائے بہادر پُتراں لازوال قربانی ݙتی تے فرائض دی ادائیگی دے دوران شہادت دا عظیم رُتبہ پاتا ڄݙاں جو 4 جوان زخمی تھئن۔ علاقے اچ کہیں وی ݙوجھے ہندوستانی سپانسرڈ خارجی کوں مکاوݨ کیتے تلاشی دیاں کارروائیاں جاری ہن۔آئی ایس پی آر آکھیے جو پاکستان دی سکیورٹی فورسز تے قانون نافذ کرݨ آلے اداریں دے وژن ’’عزمِ استحکام‘‘ دے تحت جاری انسدادِ دہشت گردی دی مہم ملک توں غیر ملکی سپانسرڈ تے حمایت یافتہ دہشت گردی دے خطرے کوں ختم کرݨ کیتے پوری رفتار نال جاری رہسی۔ آئی ایس پی آر ایں عزم دا اعادہ وی کیتے جو پاکستان اپݨے جواناں دی شہادت دا بدلہ گھنݨ کیتے ایں حملے دے مرتکب لوکاں دے خلاف انتقامی کارروائیاں کریسی۔ چیف آف آرمی سٹاف تے کمانڈر ڈیفنس فورسز، بہادر فوجیاں دے اہل خانہ نال تعزیت دا اظہار کریندن، اے قربانیاں ہر قیمت تے اپݨی قوم دی حفاظت کیتے اساݙے اٹل عزم کوں مزید تقویت ݙیندن۔