یوسف رضا گیلانی ملتان-لودھراں ڈوئل کیرج وے منصوبے دی منظوری حاصل کر ڳھدی

اسلام آباد۔28 جون (اے پی پی) چیئرمین سینیٹ سید یوسف رضا گیلانی ملتان لودھراں شاہراہ کوں ݙو پاسے کرݨ دی منظوری حاصل کر ڳھدی اے ڄݙاں جو منصوبے کیتے فنڈز وی جاری کر ݙتے ڳئن۔ اے منظوری وفاقی وزیر مواصلات عبدالعلیم خان چیئرمین سینیٹ دی درخواست تے ݙتی اے۔ ایں منصوبے دی مالی اعانت روڈ مینٹیننس اکاؤنٹ (RMA) فنڈ دے ذریعے کیتی ویسے۔62 کلومیٹر دے ایں منصوبے تے 4.6 ارب روپے لاڳت دا تخمینہ اے تے ہک سال اچ مکمل تھیوݨ دی امید اے۔ منصوبے دا تعمیراتی کم آوݨ آلے مہینے شروع تھیوݨ دا امکان اے۔ منصوبے اچ 44.8 کلومیٹر موجودہ سڑک کوں ݙو رویہ تعمیر کیتا ویسے ڄݙاں جو سڑک دی حفاظت تے ٹریفک دے بہاؤ کوں بہتر بݨایا ویسے۔ ملتان لودھراں روڈ سالاں توں خستہ حالی دا شکار اے جئیں توں مسافراں، ٹرانسپورٹرز تے رہائشیاں کوں اوکھ دا سامݨا ہئی ایں منصوبے دی تکمیل توں سفر دے وقت اچ کمی، سڑک دی حفاظت اچ بہتری تے ٹرانسپورٹ دی بہتر سہولتاں ݙیوݨ دی توقع اے۔منظوری تے اطمینان دا اظہار کریندے چیئرمین سینیٹ سید یوسف رضا گیلانی آکھیا جو ملتان تے لودھراں دے عوام نال کیتا ڳیا ہک ٻیا وعدہ پورا تھیندا پئے۔ انھاں آکھیا جو سڑک دی تعمیرِ نو تے ݙو پاسے کرݨ توں عوام کوں محفوظ، تکھے تے بہتر سفری سہولتاں ملسن۔ انھاں مزید آکھیا جو جنوبی پنجاب دے پراݨے مسئلیں کوں پائیدار ترقی دے ذریعے حل کرݨ انھاں دیاں ترجیحات اچ شامل اے، تے انھاں کوں یقین اے جو اے منصوبہ مقررہ مدت اچ مکمل کیتا ویسے۔ چیئرمین سینیٹ معاشی ترقی تے معیارِ زندگی کوں بہتر بݨاوݨ کیتے جنوبی پنجاب اچ انفراسٹرکچر تے عوامی خدمات کوں بہتر بݨاوݨ دے اپݨے عزم دا اعادہ وی کیتا۔