برآمدات تے جدید ٹیکنالوجی تے مبنی معیشت ہی پاکستان کوں آئی ایم ایف توں نجات ݙوا سڳدی اے، احسن اقبال

لاہور۔ 28 جون (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو پاکستان دی بقا، خودمختاری تے ترقی دا فیصلہ کن معرکہ معیشت، ٹیکنالوجی تے مصنوعی ذہانت (AI) دے میدان اچ کامیابی حاصل کرݨ اے کیوں جو برآمدات تے جدید ٹیکنالوجی ہی پاکستان کوں آئی ایم ایف تے انحصار توں مستقل نجات ݙوا سڳدی اے۔ انھاں آکھیا جو حکومت ’’اڑان پاکستان‘‘ پروگرام دے تحت نوجواناں کوں جدید ڈیجیٹل مہارتاں تے مصنوعی ذہانت دی تربیت ݙے تے پاکستان کوں عالمی معیشت اچ نمایاں مقام ݙیواوݨ کیتے عملی اقدامات کریندی پئی اے۔لاہور اچ ہک تقریب توں خطاب کریندے وفاقی وزیر آکھیا جے اساں ’’معرکہ معیشت‘‘ اچ کامیاب نہ تھیسوں تاں ٻیاں سفارتی کامیابیاں دے ثمرات محدود تھی ویسن۔ انھاں ݙسایا جو حکومت دے اوکھے معاشی فیصلیں دی بدولت ملک ڈیفالٹ توں بچ ڳئے تے مہانگ دی شرح 38 فیصد توں گھٹ تھی تے تقریباً 6 فیصد تے آ ڳئی اے، ڄݙاں جو پالیسی ریٹ وی 23 فیصد توں گھٹ تھی تے 10 فیصد تئیں پڄ ڳئے۔احسن اقبال زور ݙتا جو آئی ایم ایف تے انحصار دے خاتمے کیتے برآمدات اچ ودھارا ناگزیر اے، ڄݙاں جو ٻاہرلے ملک رہݨ آلے تقریباً 90 لکھ پاکستانی سالانہ 40 ارب ڈالر دی ترسیلاتِ زر (Remittances) بھیڄ تے ملکی معیشت کوں مضبوط بݨیندے پئن۔ انھاں آکھیا جو مصنوعی ذہانت عالمی معیشت اچ انقلاب برپا کر ݙتے، ایں کیتے نوجواناں کوں جدید ڈیجیٹل مہارتاں نال لیس کرݨ ویلھے دی اہم لوڑھ اے تاں جو پالیسیاں دے تسلسل تے محنت دے ذریعے پاکستان ترقی کر سڳے۔