ڈریپ دی انٹرنیشنل فارماسیوٹیکل ریگولیٹرز پروگرام دی ریگولیٹری اتھارٹی دی باضابطہ رکنیت حاصل کرݨ اہم کامیابی اے، وفاقی وزیر برائے قومی صحت

اسلام آباد۔29 جون (اے پی پی) وفاقی وزیر برائے قومی صحت سید مصطفیٰ کمال آکھیا جو ڈرگ ریگولیٹری اتھارٹی آف پاکستان (ڈریپ) دی انٹرنیشنل فارماسیوٹیکل ریگولیٹرز پروگرام (IPRP) دی ریگولیٹری اتھارٹی دی باضابطہ رکنیت حاصل کرݨ ہک اہم کامیابی اے۔ انھاں آکھیا جو آئی پی آر پی دی رکنیت پاکستان دے فارماسیوٹیکل نظام کوں عالمی معیار نال ہم آہنگ کرݨ آلے پاسے ہک فیصلہ کن قدم اے، ایں توں عالمی فارماسیوٹیکل پالیسی سازی اچ پاکستان دا کردار ٻیا مضبوط تھیسی ڄݙاں جو ڈریپ دی ریگولیٹری شفافیت، ادارہ جاتی صلاحیت تے عوامی صحت دے تحفظ دے عزم کوں وی تقویت ملسی۔ ڈریپ دے چیف ایگزیکٹو آفیسر ڈاکٹر عبیداللہ ملک آکھیا جو آئی پی آر پی دی مکمل رکنیت ڈریپ دی ریگولیٹری اصلاحات تے عالمی اعتماد دا اظہار اے، ایں توں پاکستان دا دواسازی دا نظام بین الاقوامی اصولاں نال ٻیا ہم آہنگ تھیسی اتے سائنسی بنیاداں تے ریگولیٹری نگرانی کوں ٻیا موثر بݨایا ونڄ سڳسی۔ انھاں آکھیا جو ڈریپ شفافیت دے فروغ، ڈیجیٹل نظام دی تیز رفتار ترقی تے مریضاں و مقامی صنعت کوں بہتر سہولیات فراہم کرݨ کیتے آپݨی کوششاں جاری رکھیسی۔ آئی پی آر پی دی مکمل رکنیت توں ڈریپ عالمی سطح تے ادویات دے معیارات طے کرݨ آلے مختلف خصوصی ورکنگ گروپس اچ فعال کردار ادا کریسی، جئیں دے نتیجے اچ عوام کوں معیاری تے گھٹ قیمت جنیرک ادویات تئیں تیز رسائی ملسی جئیں توں علاج دے اخراجات اچ ڳھٹکی  تھیسی۔ جدید حیاتیاتی ادویات، سیل تھراپی تے نینو میڈیسن سمیت نویں طبی ٹیکنالوجیز تئیں محفوظ تے بروقت رسائی، بین الاقوامی ریگولیٹری اداریاں دے نال تعاون دے ذریعے اہم تے جدید ادویات دی منظوری دے عمل اچ تیزی، ادویات دی ٹریس ایبلٹی تے عالمی شناختی نظام دے نفاذ توں جعلی تے غیر معیاری ادویات دی روک تھام جیسے متعدد فوائد حاصل تھیسن۔ اے کامیابی ایں سال ڈریپ دی بین الاقوامی سطح تے حاصل تھیوݨ آلی تریجھی وݙی کامیابی اے۔ ایں توں پہلے ڈریپ انٹرنیشنل کونسل فار ہارمونائزیشن (ICH) اچ آبزرور دا درجہ حاصل کیتا ڄݙاں جو کراچی دی سینٹرل ڈرگز لیبارٹری (CDL) کوں عالمی ادارہ صحت (WHO) ولوں پری کوالیفکیشن (PQ) بھی حاصل تھئی۔ اِنھاں مسلسل کامیابیاں توں ڈریپ دے جدید، ڈیجیٹل، شفاف تے بین الاقوامی معیار دے مطابق ریگولیٹری نظام آلے پاسے پیش رفت ٻیا مستحکم تھئی اے، جیڑھی عالمی سطح تے پاکستان دی ودھدی ہوئی صلاحیتاں دا واضح ثبوت اے۔ یاد راہوے جو ایں اہم کامیابی دا باضابطہ اعلان 3 تے 4 جون 2026 کوں برازیل دے شہر ریو ڈی جنیرو اچ منعقد تھیوݨ آلے آئی پی آر پی مینجمنٹ کمیٹی دے 17 ویں اجلاس اچ کیتا ڳیا ہئی۔