مون سون دا آغاز یکم جولائی توں متوقع، موسلادھار بارشاں تے لینڈ سلائیڈنگ دا خدشہ اے، محکمہِ موسمیات

راولپنڈی۔ 29 جون (اے پی پی) محکمہِ موسمیات ملک اچ مون سون بارشاں دے پہلے سپیل دی پیش گوئی کریندیں ہوئیں آکھیا جو جولائی 2026 دے پہلے ہفتے دے دوران ملک دے بالائی تے وسطی علاقیاں اچ اندھاری، ڳڄ ڳڑک اتے وقفے وقفے نال بارشاں دا امکان اے ڄݙاں جو کڄھ جہیں تے موسلادھار بارش وی تھی سڳدی اے۔ محکمہ موسمیات دے مطابق 30 جون دی شام یا رات کوں ہک مغربی ہوا دا سلسلہ ملک دے بالائی علاقیاں اچ داخل تھیوݨ دا امکان اے، ایں دوران بحیرہِ عرب توں آوݨ آلیاں (مرطوب) ہواواں ملک دے مشرقی تے وسطی علاقیاں اچ مسلسل اثر انداز رہسن ڄݙاں جو خلیجِ بنگال توں مرطوب ہواواں 2 جولائی توں ملک دے بالائی علاقیاں اچ داخل  تھیوݨ دی توقع اے، اِنھاں موسمی نظاماں دے باعث ملک دے مختلف حصّیاں اچ مون سون بارشاں دا باقاعدہ آغاز متوقع اے۔ پیش گوئی دے مطابق یکم توں 6 جولائی دے دوران کشمیر اچ مختلف جہیں تے اندھاری، ڳڄ ڳڑک تے وقفے وقفے نال بارش تھیسی ڄݙاں جو کڄھ علاقیاں اچ موسلادھار بارش دا وی امکان اے۔ خیبرپختونخوا اچ یکم توں 5 جولائی تئیں کئی اضلاع اچ ڳڄ ڳڑک دے نال بارش تے چند مقامات تے شدید بارش متوقع اے۔ پنجاب اچ یکم توں 6 جولائی دے دوران اسلام آباد، راولپنڈی، مری، گلیات، اتک، چکوال، جہلم، لاہور تے ٻین بالائی اضلاع اچ اندھاری تے ڳڄ ڳڑک دے نال وقفے وقفے نال بارش دی پیش گوئی کیتی ڳئی اے ڄݙاں جو کجھ علاقیاں اچ موسلادھار بارش تھی سڳدی اے۔ گلگت بلتستان اچ وی یکم توں 5 جولائی دے دوران ڳڄ ڳڑک دے نال بارش متوقع اے۔ محکمہ موسمیات خبردار کیتے جو تیز ندھاری تے آسمانی بجلی ݙھہݨ پاروں کمزور تعمیرات، سولر پینلز، بجلی دے کھمبیاں تے بل بورڈز کوں نقصان تھیوݨ دا خدشہ اے۔ 2 توں 6 جولائی دے دوران بالائی خیبرپختونخوا، گلگت بلتستان، مری، گلیات تے کشمیر دے پہاڑی علاقیاں اچ لینڈ سلائیڈنگ دا وی امکان ظاہر کیتا ڳئے۔ موسلادھار بارشاں پاروں اسلام آباد تے راولپنڈی دے نشیبی علاقیاں اچ اربن فلڈنگ (شہری سیلاب) دی صورتحال وی پیدا تھی سڳدی اے۔ محکمہ موسمیات سیاحاں تے مسافراں کوں ہدایت کیتی اے جو او پیش گوئی دے دوران غیر ضروری سفر توں گریز کرن اتے دورانِ سفر انتہائی احتیاط ورتن۔ کساناں کوں وی مشورہ ݙتا ڳئے جو او موسمی حالات کوں ݙیکھدیں ہوئیں آپݨی زرعی سرگرمیاں دی منصوبہ بندی کرن اتے مال ڈوآں (مویشیاں) دی حفاظت کیتے ضروری اقدامات یقینی بݨاون۔ بارشاں دے ایں سلسلے دے باعث ملک بھر اچ جاری شدید گرمی تے حبس دی شدت اچ بتدریج ڳھٹکی آوݨ دی توقع اے۔ محکمہ موسمیات ولوں تمام متعلقہ محکمیاں، ضلعی انتظامیہ، ریسکیو اداریاں تے ہنگامی خدمات فراہم کرݨ آلے اداریاں کوں الرٹ رہݨ تے کہیں وی ناخوشگوار صورتحال نال نبڑݨ کیتے پیشگی انتظامات مکمل رکھݨ دی ہدایت وی جاری کیتی ڳئی اے۔