آبی تحفظ پاکستان دا قانونی تے جائز حق اے، سندھ طاس معاہدے دے حوالے نال پہلا عالمی سیمینار کل اسلام آباد اچ تھیسی، عطاء اللہ تارڑ

اسلام آباد۔29 جون (اے پی پی) وفاقی وزیرِ اطلاعات تے نشریات عطا اللہ تارڑ آکھیا جو سندھ طاس معاہدہ پاکستان کیتے انتہائی اہم سٹریٹجک معاملہ اے، ایں حوالے نال پاکستان دے موقف کوں نہ صرف عالمی سطح تے تسلیم کیتا ڳیا بلکہ ایں دی توثیق وی کیتی ڳئی، آبی تحفظ پاکستان دا قانونی تے جائز حق اے، بین الاقوامی فورمز تے پاکستان دے موقف کوں نمایاں تقویت ملی اے ڄݙاں جو بھارت کوں ہر فورم تے خفت دا سامنا کرݨا پئے، سندھ طاس معاہدہ مکمل طور تے نافذ العمل اے، ایں کوں یکطرفہ معطل نئی کیتا ونڄ سڳدا تے نہ ای ایں اچ کوئی ترمیم کیتی ونڄ سڳدی اے، ایں معاہدے دے مختلف پہلوواں توں آگاہی کیتے اسلام آباد اچ پہلا عالمی سیمینار منعقد تھیندا پئے جئیں اچ دنیا بھر توں آبی تے قانونی ماہرین شرکت کریسن۔ سنوار کوں اتھاں وفاقی وزیرِ موسمیاتی تبدیلی مصدق ملک دے ہمراہ پریس کانفرنس توں خطاب کریندیں ہوئیں وزیرِ اطلاعات آکھیا جو سندھ طاس معاہدے دے حوالے نال پاکستان دے موقف کوں نہ صرف عالمی سطح تے تسلیم کیتا ڳیا بلکہ ایں دی توثیق وی کیتی ڳئی جو آبی تحفظ پاکستان کیتے نہ صرف انتہائی اہم اے بلکہ اے پاکستان دا قانونی تے جائز حق وی اے۔ انھاں آکھیا جو قانونی نقطہِ نظر توں وی بین الاقوامی سطح تے پاکستان دے موقف کوں نمایاں تقویت ملی اے کیونجو ایں معاہدے کوں نہ یکطرفہ طور تے ختم کیتا ونڄ سڳدے اتے نہ ای ایں اچ کہیں قسم دی ترمیم کیتی ونڄ سڳدی اے۔ انھاں آکھیا جو سندھ طاس معاہدے اچ واضح فریم ورک بݨیا ہوئے جیڑھا مکمل طور تے نافذ العمل اے تے ایں تے عمل درآمد تھیندا پئے۔ وفاقی وزیرِ اطلاعات آکھیا جو وزیرِ اعظم محمد شہباز شریف تے فیلڈ مارشل سید عاصم منیر ہر فورم تے واضح کیتے جو پاݨی پاکستان دی لائف لائن تے ریڈ لائن اے اتے ایں تے پاکستانی عوام دا حق اے۔ انھاں آکھیا جو پاݨی نال متعلق معاہدہ پاکستان تے بھارت نے باقاعدہ طور تے تسلیم کیتا ہئی جیڑھا اج وی نافذ العمل اے۔ بھارت کوں مختلف بین الاقوامی فورمز تے ایں معاملے تے خفت دا سامنا کرݨا پئے ڄݙاں جو ایں دے موقف کوں کہیں ہک فورم تے وی تسلیم نئی کیتا ڳیا۔ انھاں آکھیا جو کل اسلام آباد اچ سندھ طاس معاہدے دے حوالے نال ہک بین الاقوامی سیمینار منعقد تھیندا پئے جئیں اچ دنیا بھر توں واٹر تے لیگل ایکسپرٹس شرکت کریسن۔ انھاں آکھیا جو سیمینار اچ سندھ طاس معاہدے دے تحت پاکستان دے پاݨی تے دریاواں تے حاصل حقوق، انھاں دی قانونی حیثیت تے معاہدے دے مختلف پہلواں نال متعلق آگاہی فراہم کیتی ویسے ۔ انھاں آکھیا جو اے آپݨی نوعیت دا پہلا بین الاقوامی سیمینار اے اتے بیرونِ ملک توں کئی ماہرین تے مہمان پاکستان پڄ ڳئن۔ انھاں آکھیا جو بین الاقوامی سطح تے ماہرین سندھ طاس معاہدے دے حوالے نال پاکستان دے موقف تے حق کوں تسلیم کیتے جیڑھا بیانیے دے محاذ تے پاکستان دی ہک اہم کامیابی اے۔ وفاقی وزیر آکھیا جو سندھ طاس معاہدے دے حوالے نال پاکستان دے موقف کوں دنیا بھر اچ پذیرائی حاصل تھیندی پئی اے۔ ہک سوال دے جواب اچ وفاقی وزیر آکھیا جو کہیں وی شہر دے ماسٹر پلان اچ گرین ایریا تے رہائشی ایریا مختص ہوندے۔ جنگلات دی کٹائی توں متعلق سوال دے جواب اچ وفاقی وزیر آکھیا جو جنگلات دی کٹائی دی روک تھام کیتے موثر اقدامات کیتے ویندے پئن، ایں حوالے نال نوٹسز وی جاری کیتے ویندن اتے ذمہ دار عناصر دے خلاف کارروائی وی عمل اچ لاتی ویندی اے۔ انھاں آکھیا جو جنگلات دا تحفظ حکومت دی اولین ترجیح اے ڄݙاں جو وفاقی حکومت دے نال نال ساری صوبائی حکومتاں وی شجرکاری مہم تے خصوصی توجہ ݙیندی پئن۔ وفاقی وزیر آکھیا جو پاکستان انھاں ݙاہ ملکاں اچ شامل اے جیڑھے موسمیاتی تبدیلی دے شدید ترین اثرات توں متاثر تھیندے پئے ہن حالانکہ عالمی کاربن اخراج اچ پاکستان دا حصہ ہک فیصد توں وی ڳھٹ اے۔ انھاں آکھیا جو حکومت جنگلات دے تحفظ کوں یقینی بݨاوݨ کیتے بھرپور اقدامات کریندی پئی اے اتے ان شاء اللہ شجرکاری دے فروغ کیتے وی ٻیا موثر اقدامات کیتے ویسن۔ ہک ٻئے سوال دے جواب اچ وفاقی وزیر آکھیا جو انڈس واٹر ٹریٹی ایں وقت پاکستان کیتے انتہائی اہم معاملہ تے ہک سٹریٹجک ترجیح اے۔ انھاں آکھیا جو پاکستان ہر بین الاقوامی فورم تے آپݨا موقف موثر انداز اچ پیش کیتے۔ وزیرِ اعظم محمد شہباز شریف وی اقوامِ متحدہ دی جنرل اسمبلی سمیت ہر عالمی فورم تے پاکستان دا مقدمہ پیش کیتا ڄݙاں جو گرین فنانسنگ دے حوالے نال کلیدی کردار ادا کرݨ آلے ملکاں کوں وی آگاہ کیتا ڳیا جو موسمیاتی تبدیلی دے باعث پاکستان کوں ہر سال ارباں ڈالر دا نقصان برداشت کرݨا پوندے۔ انھاں آکھیا جو سیلاب دے نتیجے اچ لکھاں افراد بے گھر تھیندن ڄݙاں جو ایں توں تھیوݨ آلے معاشی تے انسانی نقصانات وی انتہائی سنگین ہوندن۔