بھارت ولوں آبی معلومات روکݨ تے پاکستان دے خطوط دا جواب نہ ݙیوݨ بین الاقوامی قانون دی خلاف ورزی اے، امریکی مصنفہ تے عالمی پالیسی ماہر لاری واٹکنز

اسلام آباد۔30 جون (اے پی پی) امریکی مصنفہ تے عالمی پالیسی ماہر لاری واٹکنز آکھیا جو بھارت ولوں دریاواں دے بہاؤ نال متعلق اعدادوشمار کوں روکݨ تے پاکستان دی تحریری مراسلت دا جواب نہ ݙیوݨ بین الاقوامی قانون دے اصولاں دی خلاف ورزی اے اتے کوئی وی ریاست کہیں معاہدے کوں معطل قرار ݙے تے آپݨی بین الاقوامی قانونی ذمہ داریاں توں دستبردار نئی تھی سڳدی، ویانا کنونشن برائے قانونِ معاہدات دے مطابق معاہدیاں تے نیک نیتی دے نال عمل کیتا ونڄݨا چاہیدے۔ منگل کوں اسلام آباد دے جناح کنونشن سینٹر اچ انسٹیٹیوٹ آف ریجنل سٹڈیز (آئی آر ایس) ولوں ’’سندھ طاس معاہدہ، امن تے علاقائی استحکام دا اہم ذریعہ‘‘ دے موضوع تے تھیوݨ آلے بین الاقوامی سیمینار نال خطاب کریندیں ہوئیں انھاں آکھیا جو اڄ ایں اہم موضوع تے ڳالھ کرݨ انھاں کیتے باعثِ مسرت اے اتے او آپݨی ڳالھ دا آغاز ہک ایجھی حقیقت توں کرݨ چاہندن جئیں توں سب واقف ہن جو سندھ طاس معاہدہ بین الاقوامی سفارتکاری دی حقیقی کامیابیاں اچوں ہک اے۔ انھاں آکھیا جو اے معاہدہ ہک انتہائی مشکل مقصد کیتے تشکیل ݙتا ڳیا ہئی اتے 60 ورھیں توں ودھ عرصے تئیں مؤثر انداز اچ کام کریندا رہیا۔ انھاں آکھیا جو دنیا بھر اچ دریاواں نال متعلق معاہدے تنازعات کوں روکݨ کیتے بݨائے ویندن جڈانجو مستقل انڈس کمیشن عالمی معیار دے مطابق ہک غیر معمولی تے قابلِ قدر ادارہ اے۔ انھاں آکھیا جو معاہدے دے تحت مشترکہ معائنے تے تنازعات دے حل دا ہک مرحلہ وار نظام مقرر کیتا ڳئے۔انھاں آکھیا جو اگرچہ بھارت سندھ طاس معاہدے کوں معطل قرار ݙتے تاہم ایں دے باوجود دریاواں دے بہاؤ نال متعلق معلومات روکݨا تے پاکستان دی تحریری مراسلت دا جواب نہ ݙیوݨا بین الاقوامی عرفی قانون دے اصولاں دی خلاف ورزی اے۔ انھاں آکھیا جو کوئی وی ریاست کہیں معاہدے دی معطلی دا اعلان کر تے آپݨی بین الاقوامی قانونی ذمہ واریاں توں دستبردار نئی تھی سڳدی۔ انھاں آکھیا جو ویانا کنونشن برائے قانونِ معاہدات دے مطابق معاہدیاں تے نیک نیتی دے نال عمل کیتا ونڄݨا چاہیدے۔