جیل اصلاحات مشترکہ قومی ذمہ واری، مؤثر تبدیلی کیتے صوبائی قیادت دا کردار ناگزیراے، چیف جسٹس پاکستان

اسلام آباد۔2 جولائی (اے پی پی) چیف جسٹس پاکستان جج یحییٰ آفریدی آکھیے جو جیلاں فوجداری نظامِ انصاف دی حقیقی عکاس ہوندن تے جیل اصلاحات کیتے سارے اداریاں دی مشترکہ ذمہ واری دے نال صوبائی قیادت دا مؤثر تے مسلسل کردار ناگزیر اے۔سپریم کورٹ دے شعبہ تعلقاتِ عامہ توں جاری کیتے ڳئے اعلامیے موجب انھاں صوبائی حکومتاں دی پاسوں قومی عدالتی (پالیسی ساز) کمیٹی (این جے پی ایم سی) دے قومی جیل اصلاحاتی ایکشن پلان تے عملدرآمد دے عزم دا خیرمقدم کریندیں آکھیا جو عملی تے مربوط اصلاحات ہی جیل نظام اچ پائیدار بہتری گھن آسڳدن۔ سپریم کورٹ آف پاکستان دے زیرِ اہتمام قومی عدالتی (پالیسی ساز) کمیٹی (این جے پی ایم سی) دے تحت سپریم کورٹ آڈیٹوریم اسلام آباد اچ قومی جیل اصلاحات کانفرنس منعقد تھئی جیں اچ چارے صوبیں دے وزرائے اعلیٰ، عدلیہ، وفاق و صوبائی حکومتاں، جیل انتظامیہ، قانون نافذ کرݨ آلے اداریں، انسانی حقوق دے اداریں تے ترقیاتی شراکت داراں دے نمائندیں شرکت کیتی۔کانفرنس دی نمایاں خصوصیت بلوچستان، خیبر پختونخوا، پنجاب تے سندھ دے وزرائے اعلیٰ دی شرکت ہئی جنھاں متفقہ طور تے قومی جیل اصلاحات دے ایجنڈے تے مکمل تعاون تے عملدرآمد دے عزم دا اعادہ کیتا۔ شرکاء جیلاں دے انتظام اچ بہتری، قیدیاں دی بحالی تے معاشرے اچ ول انضمام، انسانی وقار دے تحفظ تے اصلاحی نظام کوں جدید خطوط تے استوار کرݨ کیتے وفاق تے صوبیں وچال مربوط تعاون تے زور ݙتا۔ کانفرنس دے دوران پاکستان دے جیل نظام کوں درپیش چیلنجز، اصلاحی پروگراماں کوں مؤثر بݨاوݨ، اداریں وچال ہم آہنگی ودھاوݨ تے انسانی حقوق تے مبنی جیل انتظامی نظام دے ودھارے کیتے مختلف تجویزاں تے عملی اقدامات تے غور کیتا ڳیا۔ کانفرنس دے اختتام تے کانفرنس اعلامیہ منظور کیتا ڳیا جیں اچ پاکستان اچ جیل اصلاحات کیتے ہک جامع پالیسی فریم ورک تے آندا لائحہِ عمل پیش کیتا ڳیا۔ اعلامیہ اچ سارے متعلقہ فریقین ملک اچ مربوط، مؤثر تے پائیدار جیل اصلاحات کیتے مشترکہ عزم دا اظہار کیا۔