قومی اسمبلی دی قائمہ کمیٹی دی وزارتِ مواصلات تے کاوڑ دا اظہارِ ، ٹول پلازہ ٹھیکیں تے توسیعی منصوبیں دی انکوائری کیتے سب کمیٹی بݨا ݙتی

اسلام آباد۔3 جولائی (اے پی پی) قومی اسمبلی دی قائمہ کمیٹی مواصلات ترقیاتی منصوبیں اچ ݙہاکیں دی تاخیر، فنڈز دے عدم استعمال تے نامکمل سڑکاں تے ٹول ٹیکس دی وصولی تے کاوڑ کیتی۔ چیئرمین اعجاز حسین جاکھراݨی دی صدارت اچ تھیوݨ آلے اجلاس اچ سید حفیظ الدین دی سربراہی اچ ہک اعلیٰ اختیاراتی ذیلی کمیٹی بݨا ݙتی ڳئی اے جیڑھی سندھ دے سارے ٹول پلازیں دا ٹھیکہ ہکی کمپنی کوں ݙیوݨ تے این ایچ اے دے کھرباں روپے دے زیرِ التوا (تھرو فارورڈ) منصوبیں دی انکوائری کریسی۔وزارتِ مواصلات کمیٹی کوں ݙسایا جو پی ایس ڈی پی دے کل 3.7 ٹریلین روپے دے حجم اچوں 2.6 ٹریلین روپے 71 جاری توسیعی سکیماں اچ پھتے پئن جݙاں جو کفایت شعاری تے سکیورٹی ضرورتاں پاروں این ایچ اے دے بجٹ اچ 60 ارب روپے دی کٹوتی کیتی ڳئی اے۔ کمیٹی اِنھاں سارے 71 زیرِ التوا منصوبیں دی صوبہ وار تفصیلات تے تکمیل دیاں تاریخاں طلب کر ڳھدیاں۔ اجلاس اچ بلوچستان دے کوئٹہ-ژوب روڈ منصوبے اچ 20 سالاں دی تاخیر تے سکھر دے شہداد کوٹ بائی پاس دے ادھورے کم تے سخت تشویش دا اظہار کیتا ڳیا۔ ایم-6 سکھر-حیدرآباد موٹروے دے حوالے نال ݙسایا ڳیا جو جاری مالی سال کیتے 30 ارب روپے مختص کیتے ڳئن تے ایں دے مختلف حصیں کوں پبلک پرائیویٹ پارٹنرشپ، اوپیک فنڈ تے اسلامی ترقیاتی بینک دے تعاون نال تعمیر کیتا ویسے۔کمیٹی راجن پور تے سندھ اچ سڑک نامکمل تھیوݨ دے باوجود ٹول ٹیکس دی وصولی دا سخت نوٹس گھندیں ٹول پلازیں دیاں ساریاں لینز کوں ہر ویلھے فعال رکھݨ دی ہدایت کیتی۔ ایں دے علاوہ سڑکاں استعمال کرݨ آلیاں وݙیاں کارپوریٹ انگیز کمپنیاں کوں بلوچستان دے مقامی علاقیں اچ سی ایس آر دے تحت فلاحی کم کرݨ دا پابند بݨاوݨ دا حکم وی ݙتا۔ اجلاس دے آغاز اچ کمیٹی دے چیئرمین دے صاحبزادے دے انتقال تے فاتحہ خوانی کیتی ڳئی تے سیکرٹری مواصلات دی پاسوں گزریل غیر حاضری تے معذرت قبول کیتی ڳئی۔