وفاقی وزیر رانا تنویرحسین دی پرتگال دے وزیر زراعت و بحری امور نال ملاقات

اسلام آباد۔3 جولائی (اے پی پی) وفاقی وزیر قومی غذائی تحفظ و تحقیق رانا تنویر حسین لزبن اچ پرتگال دے وزیر زراعت و بحری امور جوزے مینوئل فرنانڈس نال اعلیٰ سطحی ملاقات کیتی جیں اچ زراعت، غذائی تحفظ، زیتون دے شعبے دی ترقی تے موسمیاتی تبدیلیاں نال ہم آہنگ زرعی نظام دے ودھارے دے حوالے نال ݙوپاسہ تعاون کوں مزید مستحکم بݨاوݨ تے ڳالھ کیتی ۔ وزارت دے جاری اعلامیے دے موجب وفاقی وزیر ݙوہیں ملکاں وچال ودھدے تعاون دا خیرمقدم کریندیں آکھیا جو پاکستان زیتون دے شعبے اچ نمایاں پیشرفت کیتی اے جتھاں 55,669 ایکڑ رقبے تے 70 لکھ توں ودھ زیتون دے درخت کاشت کیتے ڳئن۔ ایں پیشرفت کوں جدید زیتون آئل ایکسٹریکشن یونٹس، پراسیسنگ سہولتاں، معیاری جانچ دی تجربہ گاہواں تے تکھے ودھارا پیندی ویلیو چین دی معاونت حاصل اے۔رانا تنویر حسین زیتون دی کاشت، پراسیسنگ، پیکجنگ تے ویلیو ایڈڈ مصنوعات اچ سرمایہ کاری دے وسیع موقع کوں اجاگر کریندیں آکھیا جو سپیشل انویسٹمنٹ فیسیلیٹیشن کونسل تے بورڈ آف انویسٹمنٹ دے تحت غیر ملکی سرمایہ کاراں کوں سو فیصد ملکی ملکیت، طویل المدتی اراضی لیز، زرعی مشینری دی ڈیوٹی فری درآمد، ٹیکس مراعات، ترجیحی سہولتاں تے ون ونڈو سہولت سودھے ٻہوں سارے پرکشش مراعات ݙتیاں ویندیاں پئن۔ وفاقی وزیر پرتگالی سرمایہ کاراں تے کمپنیاں کوں پاکستان دے زیتون دے شعبے اچ مشترکہ منصوبیں تے پبلک پرائیویٹ پارٹنرشپ دے موقع توں فیدہ چاوݨ دی دعوت ݙیندیں پاکستان کوں پائیدار زرعی سرمایہ کاری کیتے ہک ابھردی ہوئی منزل قرار ݙتا۔ݙوہیں رہنماواں زرعی تحقیق، میکانائزڈ ہارویسٹنگ، زیتون دے تیل دی جدید ٹیکنالوجی، معیار دی تصدیق، ویلیو ایڈیشن تے تحقیقی اداریں وچال رابطے دے ذریعے استعدادِ کار ودھاوݨ تے تعاون دے ودھارے تے اتفاق کیتا۔ ملاقات اچ موسمیاتی تبدیلی توں ہم آہنگ زراعت، مؤثر آبی انتظام، ڈرپ اریگیشن ٹیکنالوجی تے پائیدار زمینی وسائل دے انتظام دے حوالے نال وی ڳالھ کیتی۔ رانا تنویر حسین انٹرنیشنل اولیو کونسل دی مستقل رکنیت حاصل کرݨ دے بعد ایں دے اہداف تے معیارات توں پاکستان دے بھرپور عزم دا اعادہ کریندیں آکھیا جو پاکستان قومی معیار کوں بین الاقوامی معیار موجب ہم آہنگ بݨاوݨ کیتے پرعزم اے تانجو پاکستانی زیتون دیاں مصنوعات عالمی منڈی اچ مزید مسابقتی بݨ سڳن۔وفاقی وزیر عوامی تے ادارہ جاتی رابطے ودھاوݨ دی لوڑھ تے زور ݙیندیں پرتگال دے وزیر زراعت و بحری امور جوزے مینوئل فرنانڈس کوں پاکستان دے دورے دی دعوت ݙتی تانجو او نیشنل اولیو پروگرام دے تحت تھیوݨ آلی نمایاں پیشرفت دا خود مشاہدہ کرن تے زراعت، تجارت، ٹیکنالوجی دی منتقلی تے سرمایہ کاری دے شعبیں اچ آپت دے مفاد تے مبنی تعاون دے نویں امکانات دا جائزہ گھن سڳن۔ ایں موقع تے پرتگال دے وزیر پاکستان دی زیتون دے شعبے اچ حاصل کیتیاں ڳئیاں نمایاں کامیابیاں دی تعریف کیتی تے ݙوہیں ملکاں دے آپت دے مفاد اچ تعاون کوں مزید وسعت ݙیوݨ اچ دلچسپی دا اظہار کیتا۔