وزیرِ اعظم محمد شہباز شریف دی امریکی صدر کوں 250 ویں یومِ آزادی تے مبارکباد

اسلام آباد۔4 جولائی (اے پی پی) وزیرِ اعظم محمد شہباز شریف امریکا دے صدر ڈونلڈ ٹرمپ تے امریکی عوام کوں 250 ویں یومِ آزادی تے مبارکباد ݙتی اے۔ ہفتے کوں سماجی رابطے دی ویب سائٹ ایکس تے آپݨے سنیھے اچ وزیرِ اعظم آکھیا جو صدر ڈونلڈ ٹرمپ تے امریکی عوام کوں امریکا دی آزادی دی 250 ویں سالگرہ دے تاریخی موقعے تے دلی مبارکباد پیش کرینداں۔ انھاں آکھیا جو پاکستان ایں شاندار سنگِ میل، آزادی، ثابت قدمی تے پائیدار جمہوری اقدار دی خوشی اچ امریکا دے نال شریک اے۔ انھاں آکھیا جو ݙوہیں ملکاں وچال ست ݙہاکیاں توں ودھ تے محیط شراکت داری قائم اے، جینکوں پاکستانی نژاد امریکی برادری دی گراں قدر خدمات مزید مضبوط بݨائے۔ انھاں آکھیا جو تاریخ بارہا ثابت کیتے جو جݙاں وی عالمی امن تے سلامتی کوں سنگین چیلنجز درپیش آئے امریکا تے پاکستان اہم ترین مواقع تے ہک ٻئے دے نال کھڑے رہین۔ انھاں آکھیا جو اساں جنوبی ایشیا اچ امن کیتے صدر ڈونلڈ ٹرمپ دے اہم کردار کوں تسلیم کریندوں اتے ایں دی قدر کریندوں جیندے پاروں ہک ممکنہ تباہ کن جنگ کوں روکݨ تے کروڑاں انسانی جاناں کوں محفوظ بݨاوݨ اچ مدد ملی۔ ایں طرح دنیا بھر اچ کئی وݙے تنازعات دے خاتمے کیتے انھاں دی مستقل کوششاں وی قابلِ تحسین ہن۔ انھاں آکھیا جو جیویں جیویں ݙوہائیں ملک ہک روشن تے امید افزا مستقبل دی پاسوں ودھدے پئن، پاکستان آپسی احترام، مشترکہ مفادات تے تعمیری تے آپسی طور تے مفید تعاون دی بنیاد تے امریکا دے نال آپݨی شراکت داری کوں ٻیا مضبوط بݨاوݨ کیتے پُرعزم اے۔