وزیرِ اعظم شہباز شریف دی استنبول اچ ترکیہ دے سرکردہ کاروباری گروپاں تے صنعتی تنظیماں دے اعلیٰ عہدیداراں نال ملاقاتاں

استنبول۔4 جولائی (اے پی پی) وزیرِ اعظم محمد شہباز شریف پاکستان تے ترکیہ وچال غیر معمولی تعلقات کوں مضبوط اقتصادی تے سرمایہ کاری شراکت داری اچ تبدیل کرݨ دی اہمیت تے زور ݙیندیں ہوئیں ترک کمپنیاں کوں پاکستان اچ توانائی، کان کنی و معدنیات، انفراسٹرکچر، میری ٹائم تے لاجسٹکس، انفارمیشن ٹیکنالوجی، ٹیلی کمیونیکیشن، مینوفیکچرنگ، زراعت تے نجکاری سمیت مختلف ترجیحی شعبیاں اچ سرمایہ کاری دا دائرہ کار ودھاوݨ دی دعوت ݙتی اے۔ وزیرِ اعظم آفس دے میڈیا ونگ توں جاری بیان دے مطابق وزیرِ اعظم محمد شہباز شریف دی ہفتے کوں استنبول اچ ترکیہ دے سرکردہ کاروباری گروپاں تے صنعتی تنظیماں دے اعلیٰ عہدیداراں انڄ انڄ ملاقاتاں کیتیاں جنھاں اچ اقتصادی تعاون کوں مضبوط بݨاوݨ تے معیشت دے کلیدی شعبیں اچ ترکی دی مزید سرمایہ کاری کوں راغب کرݨ کیتے پاکستان دے عزم دا اعادہ کیتا گیا۔ وزیرِ اعظم نال چالک ہولڈنگ دے چیئرمین احمد چالک، البیرک گروپ دے بورڈ آف ڈائریکٹرز دے چیئرمین احمد البیرک تے یونین آف دی چیمبر اینڈ کموڈیٹی ایکسچینجز آف ترکیہ دے صدر رفعت حصارسیکیعلو ملاقاتاں کیتیاں۔ ملاقاتاں دے دوران، وزیرِ اعظم پاکستان تے ترکیہ دے وچال گہرے برادرانہ تعلقات کوں اجاگر کیتا اتے ݙوہائیں ملکاں دے غیر معمولی تعلقات کوں ہک مضبوط اقتصادی تے سرمایہ کاری شراکت داری اچ تبدیل کرݨ دی اہمیت تے زور ݙتا۔ انھاں پاکستان دے بہتر تھیندے ہوئے میکرو اکنامک بنیادی عوامل، سرمایہ کار دوست پالیسی فریم ورک تے شفاف، پیش گوئی دے قابل تے کاروبار دوست سرمایہ کاری دا ماحول یقینی بݨاوݨ دے حکومتی عزم کوں نمایاں کیتا۔ وزیرِ اعظم ترک کمپنیاں کوں پاکستان دے ترجیحی شعبیاں بشمول توانائی، کان کنی تے معدنیات، انفراسٹرکچر، میری ٹائم (بحری امور) و لاجسٹکس، انفارمیشن ٹیکنالوجی، ٹیلی کمیونیکیشن، مینوفیکچرنگ، زراعت تے نجکاری اچ آپݨی سرمایہ کاری دا دائرہ کار ودھاوݨ دی دعوت ݙتی۔ انھاں آکھیا جو خصوصی سرمایہ کاری سہولت کونسل، متعلقہ وفاقی تے صوبائی حکام دے نال قریبی تعاون دے نال کم کریندیں ہوئیں، سٹریٹجک سرمایہ کاراں کوں ’’ون ونڈو‘‘ سہولت تے ادارہ جاتی معاونت فراہم کریندی پئی اے۔ چالک ہولڈنگ دے نال ملاقات اچ وزیرِ اعظم توانائی، انفراسٹرکچر، انفارمیشن ٹیکنالوجی تے نجکاری دے شعبیاں اچ پاکستان اچ موجود اہم مواقع تے زور ݙتا۔ انھاں پاکستان اچ آپݨے آپریشنز کوں وسعت ݙیوݨ اچ کمپنی دی دلچسپی دا خیرمقدم کریندیں ہوئیں آکھیا جو چالک انرجی تے گیپ انشات دے ذریعے کمپنی دی موجودہ موجودگی گہرے تعاون کیتے ہک مضبوط بنیاد فراہم کریندی اے۔ وزیرِ اعظم پاکستان اچ البیرک گروپ دی دیریںہ سرگرمیاں کوں سراہیا اتے پاکستان دی مواصلاتی رابطیاں تے بنیادی ڈھانچے دی ترقی اچ کمپنی دے اہم کردار دا اعتراف کریندیں ہوئیں انھاں کوں بحری انفراسٹرکچر، بندرگاہیں دی جدید کاری تے لاجسٹکس دے شعبیاں اچ آپݨی سرمایہ کاری مزید ودھاوݨ دی ترغیب ݙتی۔ انھاں پاکستان اچ البیراک گروپ دی دیرینہ مصروفیات کوں وی سراہیا اتے کمپنی کوں میری ٹائم انفراسٹرکچر، بندرگاہیں دی جدید کاری تے لاجسٹکس اچ آپݨی سرمایہ کاری کوں مزید وسعت ݙیوݨ دی ترغیب ݙتی تے پاکستان دے کنیکٹیویٹی تے انفراسٹرکچر دی ترقی اچ ایں دے اہم کردار کوں تسلیم کیتا۔ یونین آف دی چیمبر اینڈ کموڈیٹی ایکسچینجز آف ترکیہ دے صدر دے نال ملاقات اچ وزیرِ اعظم پاکستان تے ترکیہ وچال کاروباری سطح تے آپسی روابط کوں مضبوط بݨاوݨ کیتے تنظیم دی مسلسل کوششاں کوں سراہیا۔ انھاں ݙوہائیں ممالک دے نجی شعبیاں وچال باقاعدہ رابطیں کیتے ہک منظم ادارہ جاتی میکانزم قائم کرݨ دی تجویز ݙتی اتے ٹی او بی بی کوں دعوت ݙتی جو او سرمایہ کاری دے ابھردے ہوئے مواقع دا براہِ راست جائزہ گھنݨ کیتے ہک اعلیٰ سطحی کاروباری وفد دی قیادت کریندیں ہوئیں پاکستان دا دورہ کرے ۔ ترک کاروباری رہنماواں حکومتِ پاکستان دی اقتصادی اصلاحات، سرمایہ کاری دے ماحول اچ بہتری تے سرمایہ کار دوست پالیسیاں کوں سراہیا۔ انھاں پاکستان دے معاشی نقطہء نظر تے اعتماد دا اظہار کیتا تے پاکستان تے ترکی وچال ودھدی ہوئی اقتصادی شراکت داری اچ اہم کردار ادا کریندیں ہوئیں متعدد سٹریٹجک شعبیں اچ سرمایہ کاری کوں ودھاوݨ تے طویل مدتی شراکت داری کوں فروغ ݙیوݨ اچ آپݨی دلچسپی دا اعادہ کیتا۔