وزیرِ اعظم شہباز شریف دی ترک سیل دے چیف ایگزیکٹو آفیسر علی طحہ کوچ نال ملاقات، پاکستانی اداریاں دے نال طویل المدتی تعاون دے امکانات دا جائزہ گھنݨ دی دعوت

استنبول۔4 جولائی (اے پی پی) وزیرِ اعظم محمد شہباز شریف ڈیجیٹل تے ٹیکنالوجی دے شعبیاں اچ پاکستان تے ترکیہ دے وچال تعاون کوں گہرا کرݨ دی اہمیت تے زور ݙیندیں ہوئیں “ترک سیل” کوں پاکستانی اداریاں دے نال فائیو جی دے نفاذ، نیٹ ورک دی بہتری (آپٹیمائزیشن)، اسپیکٹرم دے انتظام، ڈیجیٹل انفراسٹرکچر تے ٹیکنالوجی دی منتقلی دے شعبیاں اچ طویل المدتی تعاون دے امکانات دا جائزہ گھنݨ دی دعوت ݙتی اے۔ ہفتے کوں دورہِ ترکیہ دے دوران ترک سیل دے چیف ایگزیکٹو آفیسر علی طحہ کوچ وزیرِ اعظم محمد شہباز شریف نال ملاقات کیتی۔ وزیرِ اعظم آفس دے میڈیا ونگ توں جاری بیان دے مطابق وزیرِ اعظم ڈیجیٹل تے ٹیکنالوجی دے شعبیاں اچ پاکستان تے ترکیہ وچال تعاون کوں مزید گہرا کرݨ دی اہمیت تے زور ݙتا۔ انھاں ‘پاکستان-ترکیہ ڈیجیٹل کوریڈور’ دے قیام دے حوالے نال حکومت دے وژن دا ذکر کیتا جئیں دا مقصد علاقائی ڈیجیٹل رابطیاں کوں مضبوط بݨاوݨ، سرحد پار محفوظ ڈیٹا دے تبادلے کوں سوکھا ٻݨاوݨ اتے ڈیجیٹل انفراسٹرکچر دے انضمام کوں فروغ ݙیوݨ اے۔ پاکستان اچ تیزی نال ترقی کریندے ہوئے ڈیجیٹل منظرنامے کوں اجاگر کریندیں ہوئیں وزیرِ اعظم ترک سیل کوں دعوت ݙتی جو او پاکستانی اداریاں دے نال طویل المدتی تعاون دے امکانات دا جائزہ گھنے، انھاں شعبیاں اچ فائیو جی دا نفاذ، نیٹ ورک دی بہتری (آپٹیمائزیشن)، اسپیکٹرم دا انتظام، ڈیجیٹل انفراسٹرکچر تے ٹیکنالوجی دی منتقلی شامل ہن۔ انھاں کمپنی دی حوصلہ افزائی کیتی جو او ٹیلی کمیونیکیشن آلات دی مقامی تیاری، سافٹ ویئر دی تیاری، ڈیجیٹل مہارتوں دے فروغ تے استعدادِ کار ودھاوݨ دے شعبیاں اچ شراکت داری تے غور کرے۔ انھاں آکھیا جو ایں طرح دے تعاون نال پاکستان دا ٹیکنالوجی ایکو سسٹم مضبوط تھیسی اتے نال ای جدت، روزگار تے پائیدار ترقی دے مواقع پیدا تھیسن۔ وزیرِ اعظم شفاف تے سرمایہ کار دوست کاروباری ماحول برقرار رکھݨ دے حکومتی عزم دا اعادہ کیتا۔ ایں عمل اچ خصوصی سرمایہ کاری سہولت کونسل دا تعاون شامل اے تاکہ اہم شعبیاں، بالخصوص انفارمیشن اینڈ کمیونیکیشن ٹیکنالوجیز اچ اسٹریٹجک سرمایہ کاری کوں آسان بݨایا ونج سڳے۔ علی طحہ کوچ حکومتِ پاکستان دے مستقبل تے مبنی ڈیجیٹل تبدیلی دے ایجنڈے کوں سراہیا اتے ٹیلی کمیونیکیشن، ڈیجیٹل انفراسٹرکچر تے ابھردی ہوئی ٹیکنالوجیز اچ تعاون دے مواقع تلاش کرݨ اچ ترک سیل دی دلچسپی دا اظہار کیتا۔ انھاں متعلقہ پاکستانی شراکت داراں دے نال رَل تے تے کم کرݨ دے کمپنی دے عزم دا اعادہ کیتا تانجو آپسی طور تے فائدہ مند شراکت داریاں قائم کیتیاں ونج سڳن جیہڑیاں پاکستان تے ترکیہ دے مشترکہ اقتصادی تے تکنیکی اہداف دے حصول اچ معاون ثابت ہوون۔