پاک فضائیہ دے بہادر گروپ کیپٹن عاصم تریمت کوں بچیندیں ہوئیں شہید تھی ڳئے

اسلام آباد۔5 جولائی (اے پی پی) پاک فضائیہ دے بہادر گروپ کیپٹن عاصم خاتون کوں بچیندیں ہوئیں شہید تھی ڳئے۔ ابتدائی اطلاعات دے مطابق اتوار کوں گروپ کیپٹن عاصم نائنتھ ایوینیو توں گزردے پئے ہن جو انھاں ہک موٹرسائیکل توں ہک تریمت کوں لہندیں ہوئیں ݙٹھا جئیں دا ہتھ موٹرسائیکل سوار چھکیندا پیا ہئی، گروپ کیپٹن عاصم ذمہ دار شہری ہووݨ دے ناطے مڑ تے واپس آئے اتے موٹرسائیکل دے نیڑے رکیے جئیں تے لڑکی گاݙی دے ٻئے پاسوں بھڄ آئی، ایں دوران مبینہ ملزم سعد گروپ کیپٹن عاصم دے نال بدکلامی شروع کر ݙتی اتے کجھ ای لمحیاں اچ انھاں تے فائر کھول ݙتا، گروپ کیپٹن عاصم زخماں دی تاب نہ گھندیں ہوئیں جامِ شہادت نوش کر ڳئے، جڈانجو ملزم موقع توں فرار تھی ڳیا۔ پولیس دے مطابق تریمت ݙسایا اے جو ملزم ایں دا دفتر اچ کولیگ ہئی، جئیں ایں کوں کم تے نال گھن ونجݨ دی پیشکش کیتی ہئی، جڈانجو راستہ تبدیل کر تے ایں کوں کہیں ٻئی ڄاہ گھن ونجݨ چاہندا ہئی جئیں کیتے او ایں دے نال زور آزمائی کریندا پیا ہئی۔ خاتون آکھیا جو گروپ کیپٹن عاصم بروقت مداخلت کریندیں ہوئیں میکوں تحفظ فراہم کیتا۔ ایں ویلھے قانون نافذ کرݨ آلے ادارے ملزم دی گرفتاری کیتے کارروائیاں کریندے پئن۔ گروپ کیپٹن عاصم شہید سوگواراں اچ بیوہ، دھی تے پتر چھوڑے ہن۔ گروپ کیپٹن عاصم دی قربانی کوں ملک بھر اچ خراجِ تحسین پیش کیتا ویندا پئے۔ قومی تے سوشل میڈیا تے انھاں کوں تریمتیں دے تحفظ کیتے آپݨی جان قربان کرݨ آلے بہادر افسر دے طور تے یاد کیتا ویندا پئے۔ گروپ کیپٹن عاصم دی قربانی ایں گالھ دی عکاس اے جو پاک فوج دے سپاہی صرف سرحداں دے ای نئی بلکہ عزت دے وی رکھوالے ہن۔