صدرِ مملکت آصف علی زرداری 6 توں 9 جولائی تائیں کرغزستان دا سرکاری دورہ کریسن

اسلام آباد۔6 جولائی (اے پی پی) صدرِ مملکت آصف علی زرداری کرغزستان دے صدر صادر ژپاروف دی دعوت تے 6 توں 9 جولائی 2026 تائیں اعلیٰ سطحی وفد دی قیادت کریندیں ہوئیں جمہوریہ کرغزستان دا سرکاری دورہ کریسن۔ سنوار کوں ایوانِ صدر دے پریس ونگ توں جاری بیان دے مطابق گزریل 21 سالیں اچ اے کہیں پاکستانی صدر دا کرغزستان دا پہلا دورہ ہوسی، جیہڑا ݙوہائیں ملکاں دے ݙوپاسہ تعلقات اچ ہک تاریخی سنگِ میل دی حیثیت رکھیندے۔ اے دورہ دسمبر 2025 اچ صدر صادر ژپاروف دے پاکستان دے کامیاب دورے دے تسلسل اچ تھیندا پئے اتے ݙوہائیں برادر ملکاں وچال اعلیٰ سطحی روابط دے مسلسل فروغ دی عکاسی کریندے۔ دورے دے دوران صدرِ مملکت دی صدر صادر ژپاروف نال ون آن ون ملاقات تے وفود دی سطح تے مذاکرات ہوسن۔ ݙوہائیں رہنما پاکستان تے کرغزستان دے ݙوپاسہ تعلقات دے سارے پہلواں دا جائزہ گھنسن اتے آپسی دلچسپی دے علاقائی تے بین الاقوامی امور تے ڳالھ کریسن۔ مذاکرات اچ تجارت تے سرمایہ کاری، توانائی، کان کنی، زراعت، ٹیکسٹائل، حلال صنعت، صحت تے دواسازی, ڈیجیٹل معیشت، تعلیم، سیاحت تے عوامی روابط سمیت مختلف شعبیاں اچ تعاون کوں ٻیا فروغ ݙیوݨ تے خصوصی توجہ ݙتی ویسی۔ آپݨے دورے دے دوران صدرِ مملکت کرغز پارلیمنٹ دے اسپیکر نال وی خیرسگالی ملاقات کریسن۔ پاکستان تے جمہوریہ کرغزستان وچال تعلقات گرمجوشی تے برادرانہ تعاون تے مبنی ہن جنھاں دی بنیاد مشترکہ تاریخ، مذہب، ثقافت تے وسطی و جنوبی ایشیا اچ امن، علاقائی روابط تے مشترکہ خوشحالی دے ہکو جیہیں عزم تے استوار اے۔