انصاف دے نظام کوں جدید ٹیکنالوجی نال ہم آہنگ کرݨ حکومت دی ترجیح اے، اعظم نذیر تارڑ

اسلام آباد۔6 جولائی (اے پی پی) وفاقی وزیرِقانون و انصاف سینیٹر اعظم نذیر تارڑ آکھیے جو وفاقی سروس ٹریبونل دی ڈیجیٹل تبدیلی نال عدالتی کارروائیاں اچ تاخیر گھٹ تھیسی، انصاف دا نظام مزید شفاف، موثر تے شہری دوست بݨسی۔ اِے ڳالھ انھاں وفاقی سروس ٹریبونل (ایف ایس ٹی) کیتے ای-اپیل مینجمنٹ سسٹم (ای اے ایم ایس)، پبلک انٹرفیس، مینجمنٹ ڈیش بورڈ تے مقدمیں دی آن لائن سماعت کیتے ویڈیو لنک سہولت دا افتتاح کریندیں آکھی۔ انھاں آکھیا جو حکومت انصاف ݙیوݨ کوں جدید ٹیکنالوجی نال ہم آہنگ بݨاوݨ کیتے عملی اقدامات کریندی پئی اے۔وفاقی وزیرآکھیا جو عدالتی نظام دی ڈیجیٹلائزیشن حکومت دے اصلاحاتی ایجنڈے دا اہم حصہ اے جیں دا مقصد عوام کوں تکھے، شفاف تے موثر انصاف ݙیوݨ یقینی بݨاوݨ اے۔ انھاں آکھیا جو وفاقی سروس ٹریبونل اچ جدید ڈیجیٹل نظام دے نفاذ توں سائلین، وکلاء تے عدالتی عملے کوں بہتر سہولتاں ملسن تے مقدمیں دے انتظام اچ نمایاں بہتری آسی۔ وزارتِ قانون و انصاف دے ڈویلپمنٹ ونگ دی پاسوں تیار کیتا ڳیا ویب تے مبنی ای-اپیل مینجمنٹ سسٹم (ای اے ایم ایس) وفاقی سروس ٹریبونل دے چیئرمین جسٹس (ر) روح الامین خان دی نگرانی اچ تیار کیتا ڳئے جیں کوں اسلام آباد، لاہور، کراچی، پشاور تے کوئٹہ سودھے ٹریبونل دے سارے بینچز تے نافذ کر ݙتا ڳئے۔ ایں نظام دے ذریعے اپیل دائر کرݨ توں گھن تے فیصلے دے اجراء تئیں سارے مرحلے ہک مربوط ڈیجیٹل پلیٹ فارم تے انجام ݙتے ویسن۔ ایں دے نال متعارف کرایا ڳیا پبلک انٹرفیس تے مینجمنٹ ڈیش بورڈ سائلین، وکلاء تے عدالتی عملے کوں مقدمیں دی معلومات تئیں وقتی سوکھی رسائی ݙیسی۔وفاقی سروس ٹریبونل دے سارے بینچز کوں ویڈیو لنک سہولت نال وی منسلک کر ݙتا ڳئے، جیں دے ذریعے مناسب مقدمیں دی آن لائن سماعت ممکن ہوسی۔ وزارتِ قانون موجب ایں اقدام توں سفری اوکھ تے عدالتی تاخیر اچ کمی آسی جڈانجو ویلھے تے سرکاری وسائل دا زیادہ موثر استعمال ممکن تھی سڳسی۔ تقریب دے دوران وزارتِ قانون و انصاف دے ڈویلپمنٹ ونگ دے ڈائریکٹر پلاننگ محمد جاوید ای-اپیل مینجمنٹ سسٹم تے تفصیلی پریذنٹیشن ݙیندیں ݙسائے جو اے نظام اپیلاں دے آغاز توں اختتام تئیں مکمل ڈیجیٹل انتظام ݙیندے، شفافیت تے انتظامی موثریت اچ ودھارا کریندے تے وقتی انصاف ݙیوݨ اچ معاون ثابت ہوسی۔ افتتاحی تقریب اچ وفاقی سروس ٹریبونل دے ارکان وزارتِ قانون و انصاف دے جوائنٹ سیکرٹری، ڈپٹی تے اسسٹنٹ اٹارنی جنرلز، وکلاء برادری دے نمائندگان تے مختلف وزارتاں، ڈویژنز تے سرکاری اداریں دے افسران شریک تھئے جڈانجو لاہور، کراچی تے پشاور سودھے ٹریبونل دے کیمپ دفتر ویڈیو لنک دے ذریعے تقریب اچ شریک تھئے۔