وزیرِخزانہ محمد اورنگزیب دی پاکستان بزنس کونسل دے ارکان نال ملاقات

اسلام آباد۔6 جولائی (اے پی پی) وفاقی وزیرِ خزانہ و محصولات سینیٹر محمد اورنگزیب آکھیے جو پائیدار اقتصادی نمو کوں یقینی بݨاوݨ کیتے اصلاحات دے ایجنڈے تے مسلسل عمل درآمد جاری رکھݨا ہوسی، بجٹ اچ ٹیکس تے مالیاتی شعبے متعلق متعدد اہم اقدامات متعارف کرائے ڳئن۔ انھاں اے ڳالھ دورہِ کراچی دے دوران پاکستان بزنس کونسل دے ارکان نال ملاقات اچ آکھی، ملاقات اچ پاکستان دی معاشی صورتحال، حکومت دے اصلاحات دے ایجنڈے تے اقتصادی ترجیحات تے تفصیلی تبادلہِ خیال تھیا۔ وزیرِ خزانہ پاکستان بزنس کونسل دے کردار دی تعریف کریندے آکھیے اے ادارہ ملک دی ممتاز کاروباری شخصیات تے صنعتکاراں کوں ہک موثر پلیٹ فارم تے یکجا کرݨ اچ اہم کردار ادا کریندا پئے، حکومت تے نجی شعبے دے وچال اہم معاشی تے پالیسی امور تے تعمیری مکالمے دے ودھارے اچ کونسل دی مسلسل خدمات وی قابلِ ستائش ہن۔سینیٹر محمد اورنگزیب آکھیا جو عالمی معیشت توقعات توں زیادہ لچک تے استحکام دا مظاہرہ کیتے، او ملک جیڑھے ڈھانچہ جاتی اصلاحات دے عمل تے ثابت قدم ریہے، معاشی استحکام برقرار رکھݨ تے پائیدار اقتصادی ترقی دے حصول اچ نسبتاً زیادہ کامیاب ریہے ہن۔ وزیرِ خزانہ آکھیا جو پاکستان کوں وی معاشی استحکام کوں مزید تکڑا بݨاوݨ، مسابقتی صلاحیت اچ ودھارا کرݨ تے پائیدار اقتصادی نمو کوں یقینی بݨاوݨ کیتے آپݨے اصلاحات دے ایجنڈے تے مسلسل عمل درآمد جاری رکھݨا ہوسی۔ وفاقی بجٹ دی تیاری دے حوالے نال حکومت دے طریقہِ کار تے روشنی سٹیندیں وزیرِ خزانہ آکھیا جو اے اجلاس اڄوکے بجٹ دا جائزہ گھنݨ کیتے نئی بلکہ دراصل آندے وفاقی بجٹ کیتے مشاورتی عمل دا آغاز اے، حکومت ایں سال بجٹ سازی دا عمل معمول توں کافی پہلے شروع کیتا ہئی جیں توں مالیاتی منصوبہ بندی کوں زیادہ منظم، جامع تے مشاورتی انداز اچ اڳوں ودھاوݨ اچ مدد ملی۔وزیرِ خزانہ پالیسیاں اچ تسلسل تے پیش بینی دی اہمیت تے زور ݙیندیں حکومت دی درمیانی مدت دی ٹیکس حکمتِ عملی تے عمل درآمد دے عزم دا اعادہ کیتا تے آکھیا جو ہک مستحکم، واضح تے قابلِ پیش بینی ٹیکس پالیسی کاروباری برادری دے اعتماد اچ ودھارے، سرمایہ کاری دے ودھارے تے طویل المدت معاشی منصوبہ بندی کیتے ناگزیر اے۔ ملاقات دے دوران پاکستان بزنس کونسل دے نمائندیں ملک دی کاروباری برادری دی نمائندہ تنظیم دے طور تے کونسل دے کردار تے روشنی سٹی تے ایں ڳالھ تے زور ݙتا جو برآمدات تے مبنی اقتصادی ترقی دے حصول کیتے حکومت تے مختلف شعبیں تعلق رکھݨ آلے برآمد کنندگان وچال مسلسل رابطے تے موثر مشاورت دا عمل جاری رہݨا چاہیدے۔