ایس ایم ایز دی ترقی دی راہ اچ حائل رکاوٹاں کوں دور کرݨ کیتے ہنگامی بنیاداں تے اقدامات ضروری ہن، وزیرِ اعظم دا اجلاس توں خطاب

اسلام آباد۔7 جولائی (اے پی پی) وزیرِ اعظم محمد شہباز شریف ملکی برآمدات اچ اضافے کیتے چھوٹے تے درمیانے درجے دی صنعتاں (ایس ایم ایز) کوں قرضیاں دی فراہمی اچ سہولیات فراہم کرݨ دی ہدایت کریندیں ہوئیں آکھیا جو ایس ایم ایز دی ترقی دی راہ اچ حائل رکاوٹاں کوں دور کرݨ کیتے ہنگامی بنیاداں تے اقدامات ضروری ہن، سمیڈا نوجواناں تے ویمن انٹرپرینیورز کوں چھوٹے تے درمیانے درجے دی صنعتاں لاوݨ اچ معاونت فراہم کرے۔ وزیرِ اعظم آفس دے میڈیا ونگ توں جاری بیان دے مطابق اے ڳالھیں انھاں منگل کوں اتھاں سمیڈا دے حوالے توں اجلاس توں خطاب کریندیں ہوئیں کیتا۔ اجلاس اچ نائب وزیرِ اعظم تے وزیرِ خارجہ سینیٹر محمد اسحاق ڈار، وفاقی وزیر ڈاکٹر مصدق ملک، معاونِ خصوصی ہارون اختر تے متعلقہ اعلیٰ حکام شریک تھئے جڈانجو چاریں صوبیاں دے چیف سیکرٹریز تے شعبے دے ماہرین وی ویڈیو لنک دے ذریعے اجلاس اچ شریک تھئے۔ اجلاس کوں سمیڈا ولوں ایس ایم ایز دی سہولت کیتے مختلف اقدامات تے بریفنگ ݙتی ڳئی۔ وزیرِ اعظم ہدایت کیتی جو ایس ایم ایز دی صنعتاں دی استعداد کار ودھاوݨ بالخصوص کساناں دی اجناس تے پھلاں دی پراسیسنگ کیتے انھاں کوں آگاہی تے قرضے فراہم کرݨ دے حوالے نال سہولت ݙتی وڃے، کمرشل بینکاں دی چھوٹے تے درمیانے درجے دی صنعتاں کوں قرضیاں دی فراہمی دے حوالے توں خصوصی پراڈکٹس دی تیاری دی حوصلہ افزائی کیتی ونڃے، چھوٹے تے درمیانے درجے دی صنعتاں کوں فزیبلٹی دی تیاری تے ٻین مراحل اچ مدد فراہم کیتی ونڄے۔ وزیرِ اعظم آکھیا جو ایس ایم ایز دی ترقی دی راہ اچ حائل رکاوٹاں کوں دور کرݨ کیتے ہنگامی بنیاداں تے اقدامات ضروری ہن، سمیڈا نوجوان بشمول ویمن انٹرپرینیورز کوں چھوٹے تے درمیانے درجے دی صنعتاں لاوݨ اچ معاونت فراہم کرے۔ وزیرِ اعظم ایس ایم ایز دی قرضیاں تائیں رسائی کیتے سٹیٹ بینک تے کمرشل بینکاں دے نال رَل تے ہک جامع لائحہ عمل مرتب کرݨ دی ہدایت وی کیتی۔ اجلاس کوں ݙسایا ڳیا جو پاکستانی ایس ایم ایز دی عالمی منڈی تائیں رسائی تے برآمدات ودھاوݨ کیتے رواں برس 700 ایس ایم ایز دی 16 ایونٹس اچ شرکت یقینی بݨائی ڳئی، ایں دے نال نال 35 شہراں اچ ایس ایم ایز کوں مالی ضابطیاں تے کاروبار دے حوالے توں ٹریننگ ݙتی ڳئی۔ اجلاس اچ سمیڈا دے تحت مختلف اقدامات تے وی روشنی سٹّی ڳئی۔