سارے سٹیک ہولڈرز انسدادِ پولیو کیتے مشترکہ کوششاں ٻئی تیز کرن، وزیرِ اعظم شہباز شریف دی پولیو نگرانی بورڈ دے وفد نال ڳالھ مہاڑ

اسلام آباد۔7 جولائی (اے پی پی) وزیرِ اعظم محمد شہباز شریف خیبر پختونخوا دے جنوبی اضلاع تے پولیو ہاٹ سپاٹس تے خصوصی توجہ ݙیوݨ دی ہدایت کریندیں ہوئیں آکھیا جو ملک توں پولیو دا خاتمہ اہم قومی ترجیح اے، سارے سٹیک ہولڈرز انسدادِ پولیو کیتے مشترکہ کوششاں ٻئی تیز کرن۔ اے ڳالھیں انہاں پولیو نگرانی بورڈ دے 7 رکنی وفد نال ڳالھ مہاڑ کریندیں ہوئیں کیتا جئیں منگل کوں اتھاں انھاں نال ملاقات کیتی۔ وزیرِ اعظم آفس دے میڈیا ونگ توں جاری بیان دے مطابق وفد اچ روٹری دے پولیو اوور سائیٹ بورڈ دے سربراہ مائیک میکگور، گیٹس فاؤنڈیشن دے گلوبل ڈویلپمنٹ دے صدر کرس ایلائیس، ڈبلیو ایچ او دی ریجنل ڈائریکٹر ڈاکٹر حنان بلخی، یونیسیف، گاوی تے پاکستان اچ انسدادِ پولیو کیتے تعاون دے ٻئے شراکت داراں دے نمائندگان شریک تھئے۔ وزیرِ اعظم وفد دا خیر مقدم کیتا تے انسدادِ پولیو کیتے تمام شراکت داراں دا حکومتِ پاکستان دے نال تعاون تے شکریہ ادا کیتا۔ انھاں آکھیا جو پاکستان دے ٻالاں دے مستقبل کوں پولیو سویں موذی مرض توں بچاوݨ کیتے ہر ممکن اقدام کریندے پئیوں۔ وزیرِ اعظم اجلاس اچ پولیو توں پاک پاکستان دے عزم دی تجدید کریندیں ہوئیں آکھیا جو پولیو دا خاتمہ اہم قومی ترجیح اے، تمام سٹیک ہولڈرز انسدادِ پولیو کیتے مشترکہ کوششاں ٻئی تیز کرن۔ وزیرِ اعظم جنوبی خیبر پختونخوا دے پولیو ہاٹ سپاٹس تے خصوصی توجہ مرکوز کرݨ تے موثر حکمتِ عملی اپناوݨ دی ہدایت کیتی۔ انھاں روٹری انٹرنیشنل، گیٹس فاؤنڈیشن، ڈبلیو ایچ او، یونیسیف، کنگ سلمان ریلیف، سینٹر فار ڈیزیز کنٹرول اینڈ پریوینشن یو ایس اے تے تمام شراکت داراں دے انسدادِ پولیو دے حوالے توں اقدامات تے تہہ دل توں شکریہ ادا کیتا۔ وزیرِ اعظم آکھیا جو وزیرِ صحت، وزیرِ مملکت برائے صحت، فوکل پرسن انسدادِ پولیو، نیشنل کوآرڈینیٹر انسدادِ پولیو تے حکومتی ٹیم دے تمام ارکان انسدادِ پولیو کیتے اقدامات تے لائقِ تحسین ہن۔ وفد پولیو فری پاکستان کیتے حکومت دے موثر اقدامات کوں سراہیندیں ہوئیں نمایاں پیش رفت تے وزیرِ اعظم کوں خراجِ تحسین پیش کیتا۔ ملاقات اچ وفاقی وزیرِ قومی صحت سید مصطفیٰ کمال، وزیرِ اعظم دی فوکل پرسن برائے انسدادِ پولیو سینیٹر عائشہ رضا فاروق تے متعلقہ اعلیٰ حکام وی شرکت کیتی۔