پاکستان آپݨے آبی حقوق، قومی خودمختاری تے علاقائی سالمیت تے سمجھوتہ نہ کریسی، دانیال چوہدری

راولپنڈی۔7 جولائی (اے پی پی) وفاقی پارلیمانی سیکرٹری اطلاعات و نشریات بیرسٹر دانیال چوہدری آکھیے جو پاکستان آپݨے آبی حقوق، قومی خودمختاری تے علاقائی سالمیت تے کہیں قسم دا سمجھوتہ نہ کریسی۔ انھاں آکھیا جو بھارت دے پاسوں سندھ طاس معاہدے توں متعلق یکطرفہ اقدامات بین الاقوامی قانون، معاہداتی ذمہ واریاں تے سانجھیاں بین الاقوامی آبی گزرگاہواں متعلق اصولاں دی صریح خلاف ورزی ہن جنھاں کوں کہیں صورت قبول نئی کیتا ونڄ سڳدا۔ آپݨے بیان اچ بیرسٹر دانیال چوہدری آکھیا جو سندھ طاس معاہدہ قانونی طور تے مؤثر بین الاقوامی معاہدہ اے جیں کوں کوئی وی فریق یکطرفہ طور تے معطل یا غیر مؤثر نئی بݨا سڳدا۔ انھاں آکھیا جو معاہدے کوں کمزور کرݨ دی ہر کوشش نہ صرف پاکستان دے 24 کروڑ توں ودھ عوام دی آبی سلامتی بلکہ عالمی معاہداتی نظام دی ساکھ کیتے وی خطرہ اے۔وفاقی پارلیمانی سیکرٹری واضح کیتا جو پاݨی پاکستان کیتے بنیادی قومی سلامتی دا معاملہ اے تے سندھ طاس معاہدے دے تحت پاکستان دے حصے دے پاݨی کوں روکݨ، موڑݨ یا ایں کوں دٻاؤ دے ہتھیار دے طور تے استعمال کرݨ دی کہیں وی کوشش کوں پاکستان آپݨی قومی سلامتی دے خلاف سنگین اقدام تصور کریسی۔ انھاں آکھیا جو پاکستان دا مؤقف بالکل واضح اے جو پاکستان دے جائز آبی حقوق سلب کرݨ یا پاݨی روکݨ دی کہیں وی کوشش کوں “اقدامِ جنگ” (Act of War) تصور کیتا ویسی۔ پاکستان آپݨے قومی مفادات، خودمختاری تے عوام دے حقوق دے تحفظ کیتے بین الاقوامی قانون دے تحت دستیاب سارے سفارتی، سیاسی تے قانونی ذرائع استعمال کرݨ دا حق محفوظ رکھیندے۔