اسلام آباد۔7 جولائی (اے پی پی) وزیرِاعظم محمد شہباز شریف وفاقی کابینہ کوں دورہِ ترکیہ تے اعتماد اچ گھندیں ایں امید دا اظہار کیتے جو پاکستان تے ترکیہ وچال مختلف شعبیں اچ تعلقات تے بھائی چارہ مزید تکڑا تے مستحکم تھیسی۔ انھاں اے ڳالھ وفاقی کابینہ دے اجلاس توں خطاب کریندیں آکھی ۔ وزیرِاعظم کابینہ کوں ݙسایا جو انھاں تہران اچ گزریل جمعہ کوں شہید سپریم لیڈر آیت اللہ سید …
پاکستان تے ترکیہ وچال مختلف شعبیں اچ تعلقات تے بھائی چارہ مزید تکڑا تے مستحکم تھیسی، وزیرِاعظم محمد شہباز شریف دا وفاقی کابینہ دے اجلاس توں خطاب
اسلام آباد۔7 جولائی (اے پی پی) وزیرِاعظم محمد شہباز شریف وفاقی کابینہ کوں دورہِ ترکیہ تے اعتماد اچ گھندیں ایں امید دا اظہار کیتے جو پاکستان تے ترکیہ وچال مختلف شعبیں اچ تعلقات تے بھائی چارہ مزید تکڑا تے مستحکم تھیسی۔ انھاں اے ڳالھ وفاقی کابینہ دے اجلاس توں خطاب کریندیں آکھی ۔ وزیرِاعظم کابینہ کوں ݙسایا جو انھاں تہران اچ گزریل جمعہ کوں شہید سپریم لیڈر آیت اللہ سید علی خامنہ ای دی چھیکڑی رسومات اچ شرکت کیتی۔ حکومتِ پاکستان تے عوام دی طرفوں ایران نال دلی تعزیت تے ہمدردی دا اظہار کیتا۔ بعد اچ انھاں وفاقی کابینہ دے کجھ ارکان دے رلے ترکیہ دا دورہ کیتا جتھاں بزنس کانفرنس اچ شرکت کیتی۔ ترکیہ دے سرمایہ کاراں دی وݙی تعداد کانفرنس اچ شرکت کیتی، انھاں کوں پاور سیکٹر، ڈسکوز دی نجکاری، ٹرانسمیشن لائنز دے لائن لاسز، مائنز اینڈ منرلز تے انرجی سیکٹر تے بھی پریزینٹیشنز ݙتیاں ڳئن۔ترک سرمایہ کاراں سرمایہ کاری اچ دلچسپی دا اظہار کیتا۔ وزیراعظم آکھیا جو دورہِ ترکیہ دے دوران نمایاں کاروباری گروپاں نال ملاقاتاں کیتیاں۔ ترک کمپنیاں کوں توانائی، کان کنی و معدنیات، انفراسٹرکچر اچ سرمایہ کاری دی دعوت ݙتی۔ ترک کمپنیاں کوں پاکستان دے ترجیحی شعبیں اچ سرمایہ کاری دا دائرہ کار ودھاوݨ دی وی دعوت ݙتی۔ پاکستان تے ترکیہ وچال رابطیں تے سرمایہ کاری دے ودھارے کیتے وݙی محنت نال کم کیتا جیں دا آوݨ آلے ویلھے اچ فیدہ تھیسی تے ساݙے آپت دے تعلقات تے بھرپی کوں ودھارا ملسی۔ وزیرِاعظم ݙسایا جو ترکیہ دے صدر رجب طیب اردوان ملاقات کیتے سݙیا ، انھاں نال ڳالھ مہاڑ فیدہ مند تے تعمیری رہی، آوݨ آلے ویلھے اچ ساݙے تعلقات مزید مستحکم تے تکڑے تھیسن۔ ایندے توں پہلے وزیرِاعظم اسلام آباد اچ پاک فضائیہ دے افسر گروپ کیپٹن عاصم طارق دی شہادت تے ݙکھ تے افسوس کیتا جیڑھے گزریل ݙینھ ھک تریمت دی حفاظت کریندیں شہید تھئے۔ انھاں دعا کیتی جو اللہ تعالیٰ شہید دے درجات بلند فرماوے تے انھاں دے گھرآلیں کوں صبر ݙیوے ۔ وزیراعظم آکھیا جو ملزم گرفتار تھی چکئے، ایں کوں قانون دی کچاری اچ گھن آتے سخت سزا ݙیوائی ویسی۔ وزیرِاعظم بلوچستان اچ 15 خوارج کوں جہنم واصل کرݨ تے سکیورٹی فورسز کوں خراجِ تحسین پیش کیتا۔ وفاقی کابینہ دے اجلاس اچ شہداء دے درجات دی بلندی کیتے دعا تے فاتحہ پڑھی ڳئی۔
