جدید قانونی چیلنجز نال نبٹݨ کیتے جاں دی خصوصی تربیت ناگزیر اے، اعظم نذیر تارڑ

اسلام آباد۔7 جولائی (اے پی پی) وفاقی وزیرِ قانون و انصاف سینیٹر اعظم نذیر تارڑ آکھیے جو تکھے بدلدی ہوئی ٹیکنالوجی، تجارتی رجحانات تے معاشرتی لوڑھاں پاروں ججاں دی خصوصی تربیت ویلھے دی اہم لوڑھ اے تانجو او جدید قانونی چیلنجز نال موثر انداز اچ نمٹ سڳن۔ ترجمان موجب اے ڳالھ وزارتِ قانون و انصاف اچ ریسرچ سوسائٹی آف انٹرنیشنل لاء (آر ایس آئی ایل) تے سندھ جوڈیشل اکیڈمی دے کراس پروونشل جوڈیشل فیلوشپ پروگرام اچ شریک ایڈیشنل ڈسٹرکٹ اینڈ سیشن ججاں دے وفد نال ملاقات اچ آکھی۔اعظم نذیر تارڑ آکھیا جو انصاف دا نظام بدلدے تقاضیں نال ہم آہنگ ہووݨا چاہیدے تے ٹیکنالوجی، کمرشل قوانین تے متبادل تنازعاتی حل (اے ڈی آر) جیھے شعبیں اچ مہارت مستقبل دی عدلیہ کیتے ناگزیر اے۔ انھاں عدالتی استعداد کار اچ ودھارے تے قانونی اصلاحات کیتے حکومت دے عزم دا اعادہ وی کیتا۔ وفاقی وزیرِ قانون ݙسایا جو انٹرنیشنل میڈی ایشن اینڈ آربیٹریشن سینٹر (آئی ایم اے سی) دے تحت ہݨ تئیں تقریباً 1,400 ججاں، وکلاء، سرکاری افسران، ماہرینِ تعلیم تے ٻئے پیشہ ور لوک تربیت حاصل کر چکئن۔ انھاں مزید ݙسایا جو فوجداری ضابطہِ کار (سی آر پی سی) اچ 100 توں ودھ ترامیم تجویز کیتیاں ویندیاں پئن تانجو فوجداری نظامِ انصاف کوں جدید تقاضیں نال ہم آہنگ تے مزید موثر بݨایا وڃ سڳے۔ایں موقع تے آئی میک دے رجسٹرار احسان اللہ خان وفد دا خیرمقدم کیتا جڈانجو آر ایس آئی ایل دے ایگزیکٹو ڈائریکٹر جمال عزیز تے سندھ جوڈیشل اکیڈمی دے ڈائریکٹر ڈاکٹر عارف راجپوت فیلوشپ پروگرام دے اغراض و مقاصد تے روشنی سٹی۔ آئی میک دی پراجیکٹ ڈائریکٹر تے وزارتِ قانون و انصاف دی سینئر کنسلٹنٹ عائشہ رسول ادارے دی کارکردگی، کامیابیاں تے ثالثی و مصالحت دے ودھارے کیتے جاری اقدامات تے بریفنگ ݙتی جڈانجو ایڈیشنل ڈائریکٹر گلفام حمید وزارتِ قانون و انصاف دے مینڈیٹ تے اہم قانونی اصلاحات دا جائزہ پیش کیتا۔ تقریب دے اختتام تے وفاقی سیکرٹری وزارتِ قانون و انصاف راجہ نعیم اکبر (ہلالِ امتیاز) عدالتی اصلاحات، ادارہ جاتی تعاون تے قانون دی حکمرانی دے ودھارے کیتے وزارت دے عزم دا اعادہ کریندیں جدید، موثر تے عوام دوست نظامِ انصاف دے قیام کیتے عدالتی استعداد کار ودھاوݨ دی لوڑھ تے زور ݙتا۔ بعد اچ ججاں تے وزارتِ قانون و انصاف دے اعلیٰ حکام دے وچال قانونی اصلاحات، متبادل تنازعاتی حل، عدالتی جدیدکاری تے پاکستان دے نظامِ انصاف دے مستقبل متعلق تفصیلی ڳالھ وی کیتی ڳئی