پاکستان تے کرغزستان دا سٹریٹجک شراکت داری قائم کرݨ دے عزم دا اعادہ

اسلام آباد۔7 جولائی (اے پی پی) پاکستان تے کرغز جمہوریہ سٹریٹجک شراکت داری قائم کرݨ دے آپݨے تکڑے عزم دا اعادہ کریندیں تجارت، معیشت تے سرمایہ کاری دے شعبیں اچ ݙوپاسے تعاون کوں مزید ودھاوݨ تے زور ݙتے۔ جاری سانجھے اعلامیے موجب اے اتفاقِ رائے صدر آصف علی زرداری دے کرغز جمہوریہ دے سرکاری دورے دے دوران سامݨے آئے جیڑھا او کرغز جمہوریہ دے صدر سادیر ژاپاروف دی دعوت تے کریندے پئن۔ صدرِمملکت دے دورہِ کرغزستان دے دوران تھیوݨ آلی ڳالھ مہاڑ تے مبنی سانجھے اعلامیے موجب ݙوہیں سربراہانِ مملکت روایتی دوستی، آپت دے اعتماد تے گہری ہم آہنگی دی فضا اچ تفصیلی تے نتیجہ خیز مذاکرات کیتے تے پاکستان تے کرغزستان دے وچال تعلقات دی مسلسل مثبت پیشرفت تے اطمینان دا اظہار کیتا۔ݙوہیں صدور ݙوپاسے تعاون کوں مزید وسعت ݙیوݨ دے آپݨے مشترکہ عزم دا اعادہ کریندیں دسمبر 2025 اچ کرغز صدر دے دورہِ پاکستان دے دوران طے پاوݨ آلے معاہدیں تے وقتی تے مؤثر عملدرآمد دی اہمیت تے زور ݙتا۔ ݙوہیں ملکاں فعال سیاسی مکالمے کوں جاری رکھݨ، اعلیٰ ترین سطح تے رابطے کوں مزید ودھاوݨ تے پارلیماناں، حکومتی تے وزارتِ خارجہ وچال ادارہ جاتی تعاون کوں مزید تکڑا بݨاوݨ دی لوڑھ تے اتفاق کیتا۔ ݙوہیں رہنماواں آپݨیاں حکومتاں، متعلقہ وزارتاں تے اداریں کوں ہدایت کیتی جو طے شدہ معاہدیں تے عملدرآمد کیتے سانجھیاں کوششاں تکھی کیتیاں ونڄن تے تجارت، سرمایہ کاری تے کاروباری رابطے دے ودھارے کیتے عملی اقدامات کیتے ونڄن۔ سانجھے اعلامیے اچ کرغز-پاکستان بین الحکومتی کمیشن تجارت، اقتصادی، سائنسی و تکنیکی تعاون تے ایں دے مشترکہ ورکنگ گروپس دی کارکردگی کوں مزید مؤثر بݨاوݨ تے وی زور ݙتا ڳیا۔ ݙوہیں ملکاں کاروباری برادریاں وچال براہِ راست رابطے دے ودھارے ، سانجھے منصوبیں تے سرمایہ کاری دے موقع ودھاوݨ کیتے ہر ممکن سرکاری تعاون ݙیوݨ دے عزم دا اعادہ کیتا۔اعلامیے موجب توانائی دے شعبے، خصوصاً کاسا-1000 منصوبے تے مؤثر تے تکھی رفتار عملدرآمد کوں ݙوہیں ملکاں وچال تعاون دا اہم محور قرار ݙتا ڳیا جیڑھا وسطی تے جنوبی ایشیا کوں آپت اچ جوڑݨ آلا ہک اہم منصوبہ اے۔ ݙوہیں فریقاں کان کنی، زراعت، ٹیکسٹائل، ہلکی صنعت، حلال صنعت، صحت تے دواسازی دے شعبیں اچ تعاون دے وسیع امکانات دا وی جائزہ ڳھدا۔ دواسازی دے شعبے اچ طبی تعلیم، ریگولیٹری ہم آہنگی، ویکسین تے حیاتیاتی مصنوعات دی تیاری، مشترکہ منصوبیں تے متعلقہ ڈرگ ریگولیٹری اداریں دے وچال تعاون دے ذریعے منڈیاں تئیں رسائی سوکھی بݨاوݨ تے اتفاق کیتا ڳیا۔ ایں دے علاوہ ڈیجیٹل معیشت، اطلاعات و مواصلاتی ٹیکنالوجی، سیاحت، بینککاری تے مالیاتی شعبے اچ وی تعاون ودھاوݨ تے اتفاق کیتا ڳیا۔ ݙوہیں رہنماواں ٹرانسپورٹ، لاجسٹکس تے ٹرانزٹ دے شعبیں اچ طے شدہ معاہدیں تے عملی عملدرآمد دی اہمیت تے زور ݙیندیں سامان دی ترسیل دے حجم اچ ودھارے تے نقل و حمل دے رستیں کوں مزید مؤثر بݨاوݨ کیتے اضافی اقدامات تے اتفاق کیتا۔ تعلیم، سائنس، ثقافت، سیاحت، نوجواناں دے تبادلیں، طبی تعلیم تے صحتِ عامہ دے شعبیں اچ تعاون کوں مزید ودھاوݨ تے عوامی رابطے تکڑے کرݨ دے عزم دا بھی اعادہ کیتا ڳیا۔ سلامتی دے شعبے اچ ݙوہیں ملکاں دہشت گردی، انتہا پسندی، منشیات دی غیر قانونی اسمگلنگ، منظم جرائم، غیر قانونی ہجرت، سائبر جرائم تے بین جدید خطرات نال نبٹݨ کیتے تعاون مزید تکڑا بݨاوݨ تے اتفاق کیتا۔ خطے تے دنیا اچ دہشت گرد حملیں دی مذمت کریندیں ݙوہیں رہنماواں ایں ڳالھ تے زور ݙتا جو امن و استحکام ترقی تے خوشحالی کیتے ناگزیر اے تے اقوامِ متحدہ، شنگھائی تعاون تنظیم تے اسلامی تعاون تنظیم سودھے سارے بین الاقوامی فورمز تے دہشت گردی دے خلاف مشترکہ کوششاں جاری رکھیاں ویسن۔عالمی امور تے ڳالھ کریندے رہنماواں آکھیا جو یکطرفہ اقتصادی تے مالیاتی پابندیاں اقوامِ متحدہ دے منشور تے بین الاقوامی قانون دے اصولاں دے منافی ہن، جیہڑیاں عالمی غذائی تے توانائی دے تحفظ کوں متاثر کرݨ دے نال نال اقوامِ متحدہ دے پائیدار ترقیاتی اہداف دے حصول اچ وی رکاوٹ بݨدئن۔ صدر سادیر ژاپاروف اقوامِ متحدہ دی سلامتی کونسل دے 2027-2028 دی مدت کیتے غیر مستقل رکن دے انتخاب اچ کرغزستان دی رکنیت دی حمایت تے پاکستان دا شکریہ ادا کیتا جڈانجو صدر آصف علی زرداری کرغزستان کوں ایں کامیابی تے مبارخ ݙتی۔ کرغز جمہوریہ 2025-2026 دی مدت دے دوران اقوامِ متحدہ دی سلامتی کونسل دے غیر مستقل رکن دی حیثیت نال عالمی امن و سلامتی دے ودھارے اچ پاکستان دے کردار دی تعریف کیتی تے سلامتی کونسل دی قرارداد 2788 (2025) تے قرارداد 2823 (2026) دی متفقہ منظوری دا خیرمقدم کیتا۔ اعلامیے اچ مشرقِ وسطیٰ اچ امن و استحکام کیتے پاکستان دی ثالثی دیاں کوششاں دی تعریف کیتی ڳئی تے اسلام آباد مفاہمتی یادداشت تے دستخط دا خیرمقدم کریندیں امید ظاہر کیتی ڳئی جو اے معاہدہ خطے تے دنیا اچ دیرتئیں امن و استحکام دی بنیاد ثابت تھیسی۔ݙوہیں رہنماواں سارے جھیڑیں دے پرامن حل، اقوامِ متحدہ دے منشور دے اصولاں دی پاسداری تے وسطی و جنوبی ایشیا دے وچال تعاون تے رابطیں دے ودھارےکیتے محفوظ تے سازگار ماحول دی لوڑھ تے زور ݙتا۔کرغز جمہوریہ پاکستان کوں 31 اگست توں 7 ستمبر 2026 تئیں منعقد تھیوݨ آلے چھیویں نمیڈ گیمز اچ شرکت دی دعوت ݙتی جیں کوں پاکستان قبول کریندیں اعلیٰ سطح دے وفد تے کھیݙاں دیاں ٹیماں بھیڄݨ دی تصدیق کیتی۔ دورے دے اختتام تے صدرِ مملکت آصف علی زرداری کرغز عوام تے صدر سادیر ژاپاروف دی پاسوں پرتپاک مہمان نوازی تے شکریہ ادا کیتا تے کرغز صدر کوں پاکستان دے سرکاری دورے دی دعوت ݙتی جیں کوں انھاں قبول کر ڳھدا۔ دورے دی تاریخاں دا تعین سفارتی ذرائع توں کیتا ویسی۔