وزیرِاعظم محمد شہباز شریف دی صدارت اچ وفاقی کابینہ دا اجلاس، چار سالہ حج پالیسی تے پلان 2027-2030 دی منظوری

اسلام آباد۔7 جولائی (اے پی پی) وفاقی کابینہ چار سالہ حج پالیسی تے پلان 2027-2030 دی منظوری ݙے ݙتی اے جیں دے تحت خواہشمند لوک 2030 تئیں کہیں وی سال کیتے حج دی رجسٹریشن کروا سڳسن۔ وفاقی کابینہ دا اجلاس وزیرِاعظم محمد شہباز شریف دی صدارت اچ منعقد تھیا۔ وزیرِاعظم دفتر دے میڈیا ونگ توں جاری بیان موجب وفاقی کابینہ اڄوکے سال بہترین حج انتظامات تے وفاقی وزیرِ مذہبی امور سردار محمد یوسف تے وزارت دی ٹیم دی تعریف کیتی۔ وفاقی کابینہ کوں حج پالیسی تے تفصیلی بریفنگ ݙتی ڳئی جیں اچ ݙسایا ڳیا جو نویں حج پالیسی پہلی واری ہک سال دی بجائے چار سال کیتے تشکیل ݙتی ڳئی اے تے ایں اچ اڳوں چار سال کیتے منصوبہ بندی کیتی ڳئی اے۔ ایں پالیسی دے تحت طویل مدتی پلاننگ، آپریشنز اچ بہتری تے حاجیاں کوں بہترین سہولتاں ݙیوݨ ممکن تھیسی۔ مجوزہ پالیسی دے نفاذ کیتے ایس او پیز تے ٻئے ضوابط بݨائے ویسن، پالیسی کوں سعودی قوانین تے ضوابط نال ہم آہنگ کرݨ کیتے ایں اچ لوڑھ موجب ترامیم کیتیاں ونڄ سڳسن۔کابینہ کوں ݙسایا ڳیا جو پالیسی دے تحت حج دے خواہشمند لوک سالانہ دی بجائے 2030 تئیں کہیں وی سال کیتے آپݨی لوڑھ موجب بلاتعطل حج دی رجسٹریشن کروا سڳسن، ایں دے نتیجے اچ ترجیحی ویٹنگ لسٹ بݨائی ویسی، ایں دے نال نال شرعی اصولاں موجب سیونگ سکیم وی متعارف کروائی ویندی پئی اے جیں دے تحت حج دے خواہشمند لوک مستقبل اچ حج کیتے سیونگ سکیم توں مستفید تھی سڳسن۔ اجلاس کوں مزید ݙسایا ڳیا جو حج دے سارے نظام کوں ڈیجیٹل کیتا ویندا پئے جیں اچ ادائیگیاں وی ڈیجیٹل نظام دے ذریعے تھیسن، ایں دے علاوہ شکایتاں دا ڈیجیٹل نظام تے ڈیجیٹل نگرانی ہوسی، پالیسی دے تحت سرکاری تے پرائیویٹ حج دا کوٹہ مختص کیتا ڳئے، طویل تے مختصر مدت دے حج پروگرام متعارف کرائے ویندے پئن جڈانجو حجاجِ کرام دی ضروری تربیت تے تکافل و ہنگامی رسپانس وی پالیسی دا حصہ اے۔ وفاقی کابینہ ہدایت کیتی جو معاونینِ حج دی تقرری ہک شفاف نظام تے خالصتاً میرٹ تے ہووݨی چاہیدی اے۔ ایں توں انڄ پرائیویٹ و سرکاری حج دی تھرڈ پارٹی ویلیڈیشن یقینی بݨائی ونڄے۔بیان موجب وفاقی کابینہ شہریاں کوں علاج معالجے دی معیاری سہولتاں یقینی بݨاوݨ کیتے اسلام آباد اچ موجود آئیسولیشن ہاسپٹل اینڈ انفیکشئس ٹریٹمنٹ سینٹر تے ریجنل بلڈ سینٹر دی سروسز دی آؤٹ سورسنگ دی پالیسی دی منظوری ݙے ݙتی۔ ایں فیصلے دے بعد وزارتِ قومی صحت اِنھاں ہسپتالاں دی آؤٹ سورسنگ قواعد و ضوابط موجب یقینی بݨیسی۔ وفاقی کابینہ کوں وزیرِ ریلوے دے پاسوں پاکستان ریلوے دی کارکردگی تے وی بریفنگ ݙتی ڳئی۔ اجلاس کوں وزیرِ ریلوے ݙسایا جو ریلوے دی آمدݨ 2024-25 اچ 95 ارب توں ودھ تے گزریل مالی سال 2025-2026 اچ 115 ارب روپے کوں پار کرڳئی جیڑھا جو 24.19 فیصد ودھارا اے۔ فریٹ آمدݨ اچ 8 ارب توں ودھ ، ٻئی آمدݨ اچ 7 ارب توں ودھ، پراپرٹی و لینڈ آمدݨ اچ 6 ارب توں ودھ تے مسافراں دی آونڄ توں آمدݨ اچ 3.37 فیصد دا ودھارا تھئے۔ اجلاس کوں مزید ݙسایا ڳیا جو ریلوے آپریشنز اچ بہتری دے نال نال فریٹ کارگو دی آونڄ دی بہتری یقینی بݨائی ڳئی اے۔ وفاقی کابینہ وزیرِ ریلوے حنیف عباسی تے انھاں دی ٹیم دی تعریف کیتی۔ وفاقی کابینہ نے کابینہ کمیٹی قانون سازی دے 19 مئی 2026 تے اقتصادی رابطہ کمیٹی دے 2 جولائی 2026 کوں منعقدہ اجلاساں اچ ڳھدے ڳئے فیصلیں دی توثیق کرݙتی۔