پاک-بلغاریہ پارلیمانی فرینڈشپ گروپ دا ݙوپاسے تے پارلیمانی تعاون کوں مزید ودھاوݨ دے عزم دا اعادہ

اسلام آباد۔8 جولائی (اے پی پی) پاکستان-بلغاریہ پارلیمانی فرینڈشپ گروپ دی کنوینر تے رکن قومی اسمبلی زیب جعفر پارلیمنٹ ہاؤس اسلام آباد اچ جمہوریہ بلغاریہ دے ہک اعلیٰ سطح دے وفد نال ملاقات کیتی۔ بلغاریہ دے وفد دی قیادت انھاں دی وزارتِ خارجہ دے ڈائریکٹر جنرل ݙوپاسہ تعلقات پیٹکو ڈوئیکوف کریندے پئے ہن جڈانجو وفد اچ پاکستان اچ بلغاریہ دی سفیر ارینا گانچیوا تے بلغاریہ دی وزارتِ خارجہ دے سینئر حکام وی شامل ہن۔ ملاقات توں پہلے پاکستان دی وزارتِ خارجہ دے ڈائریکٹر جنرل (یورپ-I) اشتیاق احمد عقیل کنوینر کوں پاک-بلغاریہ تعلقات دی موجودہ صورتحال تے بریفنگ ݙتی تے پارلیمانی رابطے، تجارت، اقتصادی تعاون، تعلیمی تبادلیں تے عوامی رابطیں کوں ودھاوݨ دے موقع کوں اجاگر کیتا۔وفد دا خیرمقدم کریندیں زیب جعفر ایں ڳالھ تے زور ݙتا جو پاکستان تے بلغاریہ وچال سانجھے احترام تے تعاون تے مبنی چھی ݙھاکیں توں ودھ عرصے تے محیط خوشگوار تے دوستانہ تعلقات ہن۔ انھاں بلغاریہ دی حکومت تے عوام کوں اتھاں اڄوکے کامیاب پارلیمانی انتخابات تے نویں پارلیمنٹ دی تشکیل تے مبارخ ݙتی۔ انھاں امید ظاہر کیتی جو بلغاریہ-پاکستان پارلیمانی فرینڈشپ گروپ وقتی تشکیل پیسی تانجو پارلیمانی تعاون کوں مزید ادارہ جاتی شکل ݙتی ونڄ سڳے۔ انھاں اراکینِ پارلیمنٹ دے باقاعدہ تبادلیں دے ذریعے پارلیمانی سفارت کاری کوں تکڑا بݨاوݨ دی اہمیت تے زور ݙتا جڈانجو تعلیم، ماحولیاتی تبدیلی، زراعت، نوجوانوں تے طلبہ دے تبادلے دے پروگراماں تے عوامی رابطیں کوں ودھاوݨ دی لوڑھ تے وی ڳالھ کیتی۔ یورپی منڈیاں تئیں رسائی کیتے بلغاریہ دی سٹریٹجک پوزیشن کوں اہم قرار ݙیندیں انھاں ݙوپاسے تجارت تے سرمایہ کاری کوں وسعت ݙیوݨ، پاک-یورپی یونین بزنس فورم دے ذریعے تعاون کوں تکڑا بݨاوݨ تے ݙوہیں ملکاں دی قیادت وچال اعلیٰ سطح دے تبادلیں دی حوصلہ افزائی تے زور ݙتا۔بلغاریہ دے ڈائریکٹر جنرل پیٹکو ڈوئیکوف آپݨی ڳالھ کریندے پاکستان دے نال بلغاریہ دے تعلقات کوں مزید تکڑا بݨاوݨ دے عزم دا اعادہ کیتا۔ انھاں مستقل سیاسی ڈائیلاگ، پارلیمانی سفارت کاری، وفد دے باقاعدہ تبادلیں تے نیڑے عوامی رابطے دی اہمیت تے روشنی پاتی۔ انھاں تجارت، انفارمیشن ٹیکنالوجی، آرٹیفیشل انٹیلیجنس، نینگراں دی شمولیت تے رابطے دے شعبیں اچ تعاون دے وسیع موقع دا ذکر کریندیں آکھیا جو جغرافیائی دوری مضبوط اقتصادی تعلقات دے رستے اچ رکاوٹ نئی بݨݨی چاہیدی۔ انھاں بلغاریہ اچ فرینڈشپ گروپ دے وقتی قیام دی سہولت کاری تے پارلیمانی تبادلیں کوں ودھارا ݙیوݨ دے عزم دا اظہار کیتا۔ زیب جعفر بطور سفیر آپݨے دورِ تعیناتی دے دوران پاک-بلغاریہ تعلقات کوں اڳوں ودھاوݨ اچ بلغاریہ دی سفیر ارینا گانچیوا دی گرانقدر خدمات دی تعریف کیتی بلغاریہ دی سفیر ارینا گانچیوا آپݨے ریمارکس اچ ایں اعتماد دا اظہار کیتا جو بلغاریہ اچ فرینڈشپ گروپ دا قیام پارلیمانی رابطے کوں مزید منظم کریسی تے ݙوپاسے تعاون کوں گھاٹا کریسی۔ پاکستان دے نال تعلقات کوں تکڑا بݨاوݨ دے عزم دا اعادہ کریندیں انھاں مسلسل تعاون تے کنوینر تے فرینڈشپ گروپ دے ارکان دا شکریہ ادا کیتا تے امید ظاہر کیتی جو ݙوہیں ملکاں وچال دوستی مزید پروان چڑھسی۔ ملاقات دا اختتام پارلیمانی سفارت کاری کوں مزید مستحکم کرݨ، اقتصادی و تجارتی تعاون وسعت ݙیوݨ، تعلیمی و ثقافتی تبادلیں کوں ودھارا ݙیوݨ تے ݙوہیں ملکاں دے سانجھے مفاد کیتے مشترکہ دلچسپی دے شعبیں اچ تعاون ودھاوݨ دے مشترکہ عزم دے نال تھیا۔