کے پی حکومت دا مراعاتی ٻل ’’سیاسی رشوت‘‘ تے وی آئی پی کلچر دی بدترین مثال اے، وفاقی حکومت صوبائی ٻل منݨ دی پابند کائنی، وزیرِ مملکت طلال چوہدری دا ݙوٹوک اعلان

اسلام آباد۔8 جولائی (اے پی پی)وزیرِ مملکت داخلہ امور سینیٹر طلال چوہدری خیبر پختونخوا اسمبلی توں پاس تھیوݨ آلے نویں مراعاتی ٻل کوں تنقید دا نشانہ بݨیندیں ایں کوں ’’سیاسی رشوت‘‘ تے تحریکِ انصاف دے ݙوڑے معیار دا عکاس قرار ݙے ݙتے۔ آپݨے ویڈیو پیغام اچ وزیرِ مملکت طلال چوہدری دا آکھݨ ہئی جو کے پی اسمبلی دا منظور کیتا ڳیا ٻل تے ایں دے تحت ݙتیاں ونڄݨ آلیاں غیر منصفانہ مراعات وفاقی حکومت تے کہیں صورت لازم کائنی تے وفاق ایں ماورائے قانون اقدام کوں تسلیم نہ کریسی۔ انھاں آکھیا جو وی آئی پی کلچر ختم کرݨ دے دعویداراں قانون سازی دے ذریعے اشرافیہ کیتے مراعات دی نویں تے شرمناک مثال قائم کیتی اے۔ وزیرِ مملکت طلال چوہدری ٻل دی قانونی حیثیت تے ڳالھ کریندیں آکھیا جو کہیں وی صوبائی اسمبلی دی قانون سازی یا لیجسلیشن وفاقی حکومت کیتے بائنڈنگ نی ہوندی۔ انھاں واضح کیتا جو بلیو پاسپورٹ تاحیات ݙیوݨ دی اجازت نی، وفاقی حکومت، وزیرِاعظم تے وزیرِ داخلہ پچھلے ݙو سالاں اچ کفایت شعاری دے تحت بلیو (آفیشل) پاسپورٹس دی تعداد پہلے ہی ادھی کر ݙتی اے، ہݨ اے پاسپورٹ صرف تے صرف آفیشل ڈیوٹی تے مامور لوکاں کوں ملسن، کہیں کوں خوش کرݨ یا سیاسی مراعات دے طور تے کے پی اسمبلی دے تحت تاحیات بلیو پاسپورٹ جاری نہ کیتے ویسن۔کے پی حکومت دی پاسوں ارکان کوں بغیر فیس دے ڈٻل تے ممنوعہ بور دے اسلحہ لائسنسز ݙیوݨ دے فیصلے تے انھاں ݙسایا جو وفاقی وزارتِ داخلہ وزیرِاعظم دے حکم تے ممنوعہ بور دے لائسنسز دے اجراء اچ پچھلی حکومتاں دے مقابلے اچ 95 فیصد تئیں کمی کر ݙتی اے۔ غیر ممنوعہ بور دے اسلحہ لائسنسز اچ وی 60 توں 65 فیصد تئیں کمی کیتی ڳئی اے تے ہݨ صرف متعلقہ تے حقدار لوکاں کوں کڑی جانچ پڑتال دے بعد ہی لائسنس ݙتا ویندے۔ طلال چوہدری دا آکھݨ ہئی جو تحریکِ انصاف دے ݙند ݙکھاوݨ دے ٻئے ہن تے کھاوݨ دے ٻئے ہن، لوکاں کوں کجھ ݙسیندن تے خود کجھ ٻیا کریندن۔ انھاں یاد کروایا جو اے لوک دعویٰ کریندن جو اقتدار اچ آتے گورنر ہاؤس ݙھا ݙیسن، وزیرِ اعظم ہاؤس کوں یونیورسٹی بݨیسن، ریسٹ ہاؤسز نجی تحویل اچ ݙیسن تے ارکان اسمبلی عام آدمی وانگوں رہسن، لیکن کے پی اسمبلی دے ٻل دے مطابق ہݨ ارکان اسمبلی کیتے ٹول ٹیکس فری کر ݙتا ڳئے، او سرکاری ریسٹ ہاؤسز اچ بغیر ادائیگی دے تاحیات مفت رہ سڳدن، انھاں دی گاݙیاں تے کالے شیشے، خاص نمبر پلیٹس تے مفت سکیورٹی ہوسی۔ طلال چوہدری سوال چاتا جو کیا پاکستان دے عام آدمی کوں اے سبھ سہولتاں حاصل ہن؟وزیرِ مملکت پی ٹی آئی دے ایم این اے اقبال آفریدی دا حوالہ ݙیندیں انکشاف کیتا جو ماضی اچ انھاں دے پتر بلیو پاسپورٹ دا غلط استعمال کیتا، او ایں آفیشل پاسپورٹ تے یورپ ڳیا تے اتھاں ونڄ تے ایں پاسپورٹ کوں سرنڈر کرتے سیاسی پناہ گھن ڳھدی تے پاکستانی قومیت چھوڑ تے دنیا اچ ملک دی بدنامی دا باعث بݨیا۔ انھاں آکھیا جو انھاں کرتوتاں پاروں ماضی اچ اساݙے پاسپورٹ دی عالمی رینکنگ اُتھاں ڈہندی ہئی۔ طلال چوہدری وفاقی حکومت دی کامیابیاں دا ذکر کریندیں ݙسایا جو موجودہ حکومت دی ٹھوس قانون سازی، سکیورٹی فیچرز دی بہتری تے نقلی پاسپورٹس دے خاتمے دی بدولت پچھلے سوا ݙو سالاں اچ پاکستانی پاسپورٹ دی عالمی رینکنگ 25 توں 30 درجے بہتر تھئی اے، جیڑھا پاسپورٹ دنیا اچ 120، 125 یا 130 ویں نمبر تے ہئی او ہݨ 100 توں تلے آ چکے۔ ایں پاروں کئی یورپی ملکاں تے گلف سٹیٹس پاکستان دے آفیشل، ڈپلومیٹک تے گرین پاسپورٹ کیتے ویزا فری انٹری دے معاہدے سائن کیتن۔ انھاں چھیکڑ اچ عزم دہرائےجو وفاقی حکومت کہیں وی قانون سازی کوں نافذ نہ کریسی جیڑھی ملکی پاسپورٹ دی رینکنگ کوں متاثر کرے یا جیڑھی سیاسی رشوت تے مبنی ہووے، کیوں جو ایجھی غیر منصفانہ مراعات دی کوئی آئینی و اخلاقی حیثیت نہ ہوندی۔