بلوچستان اچ مختلف کارروائیاں دے دوران عام شہریاں تے پولیس اہلکاراں سودھے 42 لوک شہید تھئے، 54 دہشت گرد ہلاک تھئن، دہشت گرداں تے انھاں دے سہولت کاراں دا پیچھا کریسوں، لیفٹیننٹ جنرل احمد شریف چوہدری دی پریس کانفرنس

راولپنڈی۔8 جولائی (اے پی پی) پاک فوج دے شعبہِ تعلقاتِ عامہ (آئی ایس پی آر) دے ڈائریکٹر جنرل لیفٹیننٹ جنرل احمد شریف چوہدری آکھیے جو بلوچستان اچ مختلف کارروائیاں دے دوران عام شہریاں تے پولیس اہلکاراں سودھے 42 لوک شہید جڈانجو 54 دہشت گرد ہلاک تھئن، دہشت گرداں دے خلاف کارروائیاں جاری ہن، دہشت گرداں تے انھاں دے سہولت کاراں دا پیچھا کریسوں تے انھاں کوں توڑ پڄیسوں ، دنیا دی کوئی طاقت پاکستان کوں تَلے نئی ݙکھا سڳدی۔ اے ڳالھ انہاں بلوچستان اچ سکیورٹی صورتحال تے میڈیا بریفنگ اچ آکھی ۔انھاں آکھیا جو گزریل چار ݙینھ اچ بلوچستان اچ دہشت گردی دے ترئے وݙے واقعات پیش آئے۔پہلا واقعہ 4 تے 5 جولائی دی رات کوں پیش آیا جݙاں بگرائی دے علاقے کھنہ اوڑکا اچ فتنہ الخوارج دے دہشت گرداں مقامی آبادی تے نشوم شہریاں تے حملہ کیتا، بلوچستان دے مقامی غیور عوام انھاں دا بہادری نال مقابلہ کیتا تے بھارتی پراکسی فتنہ الخوارج توں تعلق رکھݨ آلے دہشت گرداں کوں بھڄݨ تے مجبور کر ݙتا، ایں دوران چار بہادر نشوم شہری شہید تے 6 زخمی تھئے۔ ݙوجھا واقعہ 6 جولائی کوں پیش آیا۔ منگی ڈیم توں کوئٹہ کوں پاݨی ݙتا ویندے، منگی ڈیم کوئٹہ اچ زیارت دے علاقے اچ پمپنگ سٹیشن نمبر 3 دے نیڑے بلوچستان پولیس دی چیک پوسٹ تے فتنہ الخوارج دے دہشت گرداں کئی پاسوں حملہ کیتا، ایں چیک پوسٹ تے پولیس منگی ڈیم تے نشوم شہریاں دی حفاظت تے مامور ہئی، انھاں کوں نشانہ بݨایا ڳیا، پولیس دے بہادر جواناں ڈٹ تے انھاں دا مقابلہ کیتا تے 15 خارجیاں کوں جہنم واصل کیتا، ایں مقابلے اچ پولیس دے 9 جواناں آپݨیاں جاناں قربان کیتیاں، وقتی طور تے ایف سی تے پاک فوج دی بھاری نفری روانہ کیتی ڳئی تے او اُتھاں پڄ ڳئی، دہشت گرد کجھ پولیس اہلکاراں کوں یرغمال بݨا تے آپݨے نال گھن ڳئے، سکیورٹی فورسز انھاں دا تعاقب کیتا، خوارج پولیس دے ہتھوں ہلاک تھیوݨ آلے آپݨے 15 دیاں لاشاں چھوڑ تے بھڄ ڳئے، پولیس دے اے اہلکار مقامی ہن، او سارے اتھاں دے مقامی بلوچ تے پختون ایں علاقے دے ٻال ہن۔لیفٹیننٹ جنرل احمد شریف چوہدری آکھیا جو فورسز دہشت گرداں دا پیچھا کیتا تے آپریشن کیتا، انھاں دے کول اساݙے جوان ہن، ایں کیتے محتاط تھی تے انھاں دے گرد گھیرا تنگ کیتا ڳیا، 6 جولائی توں جاری آپریشن دے دوران متعدد خارجی ہلاک تھئے، ایں دوران بزدل دہشت گرداں 18 یرغمال جواناں کوں شہید کر ݙتا، اے آپریشن حالی وی چلدا پئے، مجموعی طور تے 27 جوان شہید تھئے، ایں واقع اچ ہݨ تئیں 26 خارجی ہلاک تھی چکن۔ تریجھے واقعے اچ بیلا بندر اچ اڄ ہک سکیورٹی قافلے تے بی ایل اے حملہ کیتا، حملے دے دوران پاک فوج دے ہک جے سی او سودھے 11 جوان شہید تھئے تے بی ایل اے تے فتنہ الہندوستان دے 14 دہشت گرد مارئے ڳئے۔ انھاں آکھیا جو اڄ دو آپریشن کیتے ڳئے، خاران اچ 6 تے دالبندین اچ 8 دہشت گرد ہلاک تھئے، انھاں دہشت گرداں دا تعلق فتنہ الہندوستان توں ہئی۔ انھاں آکھیا جو اِنھاں کارروائیاں دے دوران عام شہریاں سودھے 42 قیمتی جاناں ضائع تھئیاں تے 54 دہشت گرد ہلاک تھئن۔ انھاں آکھیا جو مختلف علاقیں اچ کارروائیاں جاری ہن، پاک فوج سودھے سکیورٹی فورسز دہشت گرداں دا مقابلہ کریندیاں پئن، فضائی تے زمینی سطح تے دہشت گرداں کوں نشانہ بݨایا ویندا پئے تے انھاں کوں کیفرِ کردار تئیں پڄایا ویسی۔انھاں آکھیا جو اِنھاں واقعات دے پچھوں بھارت دا ہتھ اے، ایں اچ بھارت دے نال او قوتاں ملیاں ہوئیاں ہن جنھاں توں پاکستان دی عزت، خوشحالی تے استحکام برداشت نئی تھیندا۔ انھاں آکھیا جو افغانستان دی سرزمین غیر قانونی افغان طالبان رجیم دے زیرِ قبضہ ایں دہشت گردی کیتے استعمال تھیندی پئی اے، دہشت گردی دے اِنھاں واقعات اچ زیادہ تر مارئے ڳئے دہشت گرد افغان ہن، کراچی واقعے اچ ملوث 4 حملہ آوراں اچ 3 افغان دہشت گرد ہن، اِنھاں دہشت گرداں کوں سہولت کاری افغان طالبان رجیم ݙیندی پئی اے۔ انھاں آکھیا جو اے حملے منظم طریقے نال کیتے ویندے پئن، ایں دے پچھوں ماسٹر مائنڈ تے ایں دے سہولت کار ہن، افغان طالبان رجیم انھاں کوں سہولتاں ݙیندی پئی اے، افرادی قوت ݙیندی پئی اے، افغان طالبان رجیم کوں پاکستان دی عزت، ترقی تے وقار توں مسئلہ اے، بلوچستان پاکستان دی عزت، آن تے شان اے، بلوچستان دی خوشحالی ہک حقیقت اے جیں کوں کوئی نئی بدل سڳدا، اے انھاں کوں ہضم نئی تھیندی پئی، انھاں کوں ہر ایں چیز توں مسئلہ اے جیڑھی بلوچستان دے عوام کیتے اے، انھاں کوں کوئٹہ کیتے ونڄݨ آلی پاݨی دی پائپ لائن توں مسئلہ اے۔انھاں آکھیا جو اساں چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر دی قیادت تے حکومتِ پاکستان دی واضح ہدایات دے تناظر اچ افواجِ پاکستان واضح موقف تے عزم رکھیندیاں ہن جو اِنھاں نال کیویں نبݨݨا اے، اساں ہر طرح نال اِنھاں دہشت گرداں دا تعاقب کریسوں تے انھاں کوں ہدف بݨیسوں، ایں حقیقت دے بارے اچ بلوچستان حکومت تے ایں دے عوام واضح طور تے جاݨدن، بلوچستان دے وزیراعلیٰ بذریعہ سڑک زیارت ڳئے، ترائے سال توں ریاست جو واضح پالیسی ݙکھیندی پئی اے جو اِنھاں دہشت گرداں دا اسلام نال کوئی تعلق نئی تے اے خوارج ہن، اے فتنہ الہندوستان ہن، انھاں دا بلوچستان تے بلوچاں نال کوئی تعلق نئی، انھاں کوں ایں توں پریشانی اے، دنیا دی کوئی طاقت پاکستان کوں تلے نئی ݙکھا سڳدی۔ ڈی جی آئی ایس پی آر آکھیا جو پاکستان تے بلوچستان اتھاں ہے تے ہمیشہ رہسی، ہر دہشت گرد تے انھاں دے سارے سہولت کاراں دا پیچھا کریسوں، تساں اساݙے ٻالاں تے شہریاں تے ہتھ پیندو تے سمجھدو اساں آتے ڳالھ مہاڑ کریسوں، عوام، فوج تے قانون نافذ کرݨ آلے ادارے ہر لمحے دہشت گردی دے خلاف جنگ لڑدے پئن، ہر صورت اساکوں کامیابی حاصل تھیسی کیوں جو اساں حق تے سچ تے کھڑوں، اساں آپݨے تحفظ کیتے کھڑوں۔