صدرِمملکت آصف علی زرداری دا کرغزستان اچ عطا بیئت میموریل کمپلیکس دا دورہ، کرغز قومی ہیروز تے شہداء کوں خراجِ عقیدت

بشکیک۔8 جولائی (اے پی پی) صدرِمملکت آصف علی زرداری کرغزستان دے دورے دے دوران عطا بیئت میموریل کمپلیکس دا دورہ کیتا۔ کرغزستان دے قومی ہیروز تے شہداء کوں خراجِ عقیدت پیش کیتا تے کرغز پارلیمنٹ دے سپیکر ماماطالییف مارلین عبدالرحمٰن ووچ نال ملاقات اچ ݙوہیں پاسوں پارلیمانی، اقتصادی تے عوامی رابطے کوں مزید ودھارا ݙیوݨ دے عزم دا اظہار کیتا۔ ایوانِ صدر دے پریس ونگ توں جاری بیان موجب صدرِ مملکت چونگ تاش اچ واقع عطا بیئت میموریل کمپلیکس اچ مرکزی یادگار تے پُھلاں دی چادر چڑھائی تے کرغزستان دی آزادی دی جدوجہد اچ جان دا نذرانہ پیش کرݨ آلیں کوں خراجِ عقیدت پیش کیتا۔ انھاں عطا بیئت میموریل میوزیم دا دورہ کیتا جتھاں کرغزستان دی آزادی دے سفر متعلق تاریخی نوادرات دا مشاہدہ کیتا۔ انھاں معروف کرغز ادیب چنگیز آیتماتوف دی یادگار تے وی حاضری ݙتی۔ایں توں پہلے صدر آصف علی زرداری کوں اسیک کول دے تمچی ہوائی اݙے تے کرغز صدر جباروف رخصت کیتا جݙاں جو بشکیک دے مناس انٹرنیشنل ایئرپورٹ تے کرغز پارلیمنٹ دے سپیکر ماماطالییف مارلین عبدالرحمٰن ووچ تے کرغزستان اچ پاکستان دے سفیر التمش وزیر خان انھاں دا استقبال کیتا۔ صدرِ مملکت آصف علی زرداری نال کرغزستان پارلیمنٹ دے سپیکر ارکانِ پارلیمنٹ دے وفد دے رلے ملاقات کیتی۔ ݙوہیں ملکاں وچال پارلیمانی تعاون، ݙوطرفہ تجارت، زمینی و فضائی رابطے تے عوامی سطح تے رابطے دے فروغ تے ڳالھ کیتی ۔ صدرِ مملکت آکھیا جو پاکستان تے کرغزستان وچال برادرانہ تعلقات مشترکہ مذہبی اقدار، تاریخی رابطے، ثقافتی قربت تے سانجھی خیرسگالی تے مبنی ہن۔ انھاں ݙوطرفہ تعلقات دے تسلسل کیتے پارلیمانی رابطے کوں مزید مستحکم بݨاوݨ دی لوڑھ تے زور ݙتاتے قومی اسمبلی اچ قائم پاکستان-کرغزستان پارلیمانی فرینڈشپ گروپ دا حوالہ ݙیندیں آکھیا جو اعلیٰ سطح دے پارلیمانی رابطے ݙوہیں ملکاں دے تعلقات کوں مزید تکڑا بݨاوݨ اچ اہم کردار ادا کریندن۔صدرِ مملکت کرغزستان کوں اقوام متحدہ دی سلامتی کونسل دی 2027-28ء دی مدت کیتے غیر مستقل رکن منتخب تھیوݨ تے مبارخ وی ݙتی۔ ملاقات اچ سرٹیفکیشن دے طریقہِ کار، طلبہ کیتے پیشہ ورانہ موقع تے سانجھے تعاون دے ݙوجھے شعبیں اچ پیشرفت دا وی جائزہ گھدا ڳیا۔ کرغز پارلیمنٹ دے سپیکر صدرِ مملکت آصف علی زرداری دا خیرمقدم کریندیں پاکستان دی دوستی دی تعریف کیتی ݙوطرفہ تعاون کوں مزید وسعت ݙیوݨ دے عزم دا اظہار کیتا۔ ایں موقع تے صدر دے مشیر ڈاکٹر عاصم حسین، سینیٹر سلیم مانڈوی والا تے ݙوہیں ملکاں دے اعلیٰ حکام وی ملاقات اچ موجود ہن۔ بعد اچ کرغز پارلیمنٹ دے سپیکر صدر آصف علی زرداری دے اعزاز اچ عشائیہ وی ݙتا۔