پاکستان تے کروشیا وچال دوستانہ تعلقات آپسی احترام، خیرسگالی تے مشترکہ مفادات تے مبنی ہن، وزیرِاعظم شہباز شریف دی کروشیا دے وزیر برائے خارجہ تے یورپی امور نال ملاقات اچ ڳالھ مہاڑ

اسلام آباد۔9 جولائی (اے پی پی) وزیرِ اعظم محمد شہباز شریف پاکستان تے کروشیا وچال تجارت تے سرمایہ کاری، انفارمیشن ٹیکنالوجی، زراعت، سیاحت تے ہنرمند افرادی قوت سمیت مختلف شعبیاں اچ تعاون کوں ٻیا فروغ ݙیوݨ دی پاکستان دی خواہش دا اظہار کریندیں ہوئیں آکھیا جو ݙوہیں ملکاں وچال دوستانہ تعلقات آپسی احترام، خیرسگالی تے مشترکہ مفادات تے مبنی ہن۔ خمیس کوں وزیرِاعظم آفس دے میڈیا ونگ توں جاری بیان دے مطابق اے ڳالھیں انھاں جمہوریہ کروشیا دے وزیر برائے خارجہ تے یورپی امور ڈاکٹر گورڈن گرلیچ ریڈمین نال ڳالھ مہاڑ کریندیں ہوئیں کیتا جنھاں وزیرِاعظم ہاؤس اچ انھاں نال ملاقات کیتی۔ ملاقات اچ نائب وزیرِاعظم تے وزیرِ خارجہ سینیٹر محمد اسحاق ڈار تے سیکرٹری خارجہ آمنہ بلوچ وی موجود ہن۔ وزیرِاعظم آکھیا جو پاکستان تے کروشیا وچال دوستانہ تعلقات باہمی احترام، خیرسگالی تے مشترکہ مفادات تے مبنی ہن۔ وزیرِاعظم تجارت تے سرمایہ کاری، انفارمیشن ٹیکنالوجی، روابط، زراعت، سیاحت تے ہنرمند افرادی قوت سمیت مختلف شعبیاں اچ ݙوپاسہ تعاون کوں ٻیا فروغ ݙیوݨ دی پاکستان دی خواہش دا اظہار کیتا۔ وزیرِاعظم کروشیا دے صدر زوران میلانوویچ تے وزیرِاعظم آندرے پلینکوویچ کیتے نیک تمناواں دا اظہار کریندیں ہوئیں پاکستان دے سرکاری دورے دی پُرخلوص دعوت ݙتی۔ کروشیا دے وزیرِ خارجہ پرتپاک استقبال تے وزیرِاعظم دا شکریہ ادا کریندیں ہوئیں آکھیا جو اسلام آباد دا دورہ انھاں کیتے باعثِ اعزاز اے۔ انھاں علاقائی امن دی کوششاں اچ پاکستان تے ایں دی قیادت دے نمایاں کردار کوں سراہیا تے آپسی دلچسپی دے سارے شعبیاں اچ پاکستان تے کروشیا دے تعلقات کوں ٻیا ودھاوݨ دی آپݨی حکومت دی خواہش دا اظہار کیتا۔