پاکستان تے روس اچ تجارت، توانائی، تعلیم و سرمایہ کاری اچ تعاون دے وسیع موقع موجود ہن،وفاقی وزیر اویس احمد خان

اسلام آباد۔9 جولائی (اے پی پی) وفاقی وزیر توانائی سردار اویس احمد خان لغاری آکھیے جو پاکستان تے روس اچ تجارت، توانائی، تعلیم و سرمایہ کاری اچ تعاون دے وسیع موقع موجود ہن۔ ݙوہیں ملکاں وچال تعلقات کوں تجارت، توانائی، سرمایہ کاری تے مشتمل کثیر الجہتی شراکت داری اچ بدلݨا چاہیدے، پاکستان تے روس وچال بارٹر ٹریڈ دا فریم ورک تجارتی تعاون اچ اہم پیشرفت اے، تجارتی راہداریاں، لاجسٹکس تے مضبوط سپلائی چینز توں علاقائی تجارت کوں نویں جہت مل سڳدی اے، پاکستان تے روس وچال تعلقات دا بنیادی ستون توانائی اے، پاک روس تعلقات سانجھے احترام، مشترکہ مفادات تے پراݨے تعاون تے استوار ہن۔ او یونیورسٹی آف ورلڈ سیلائزیشنز ماسکو (یو ڈبلیو سی ایم) تے انسٹی ٹیوٹ آف ریجنل سٹڈیز (آئی آر ایس) اسلام آباد دے زیرِاہتمام پاکستان-روس تجارت، تعلیم تے توانائی اچ تعاون دے ودھارے دے عنوان نال منعقدہ ویبینار توں خطاب کریندے پئے ہن۔وفاقی وزیر آکھیا جو گزریل ݙو ݙھاکیں دے دوران پاکستان تے روس دے تعلقات سانجھے اعتماد، احترام تے علاقائی استحکام دے مشترکہ عزم دی بنیاد تے مثبت انداز اچ اڳوے ودھئن، پاکستان تے روس وچال تجارت، توانائی، تعلیم تے رابطہ کاری دے شعبیں اچ بے پناہ صلاحیت موجود اے، مضبوط اقتصادی تعاون تے بہتر ٹرانسپورٹ رابطے دے ذریعے ݙوہیں ملکاں وچال ݙوطرفہ تجارت آندے سالاں بلین ڈالر توں تجاوز کرݨ اچ مدد مل سڳدی اے۔ وفاقی وزیر آکھیا جو ݙوہیں ملکاں دے تعلقات ہݨ جغرافیائی سیاسی عوامل توں بالاتر تھی چکن تے پاکستان و روس اقوامِ متحدہ تے بین الاقوامی قانون کوں امن، سلامتی تے تعاون دے ودھارے کیتے انتہائی اہمیت ݙیندن۔ سردار اویس احمد خان لغاری آکھیا جو یوریشیائی رابطہ کاری اقتصادی ترقی تے مشترکہ خوشحالی کیتے نمایاں موقع ݙیندی اے۔ انھاں وسطی ایشیا دے ذریعے تاریخی زمینی رستیں تے انٹرنیشنل نارتھ-سائوتھ ٹرانسپورٹ کوریڈور دی بحالی کوں پاکستان تے روس دے وچال تجارت دے ودھارے اہم قرار ݙتا۔ انھاں آکھیا جو مالی سال 2025 دے دوران پاکستان تے روس وچال ݙوطرفہ تجارت دا حجم 243.412 ملین ڈالر ریہا جیڑھا ایں دی حقیقی صلاحیت توں ٻہوں گھٹ اے، مالی سال 2024 اچ تجارت ہک بلین ڈالر توں تجاوز کرڳئی ہئی تاں جو بعد اچ ادائیگی دے نظام، بینکاری ذرائع، مالیاتی انتظامات تے شپنگ لاجسٹکس متعلق چیلنجاں پاروں ایں اچ کمی آئی۔وفاقی وزیر ایں امید دا اظہار کیتا جو پاکستان تے روس وچال 2030ء تئیں اقتصادی تعاون دا پروگرام ݙوہیں ملکاں دے اقتصادی تعلقات کوں مزید تکڑا بݨاوݨ تے کاروباری موقع اچ ودھارے دا ذریعہ بݨسی۔ علاقائی رابطہ کاری دے منصوبیں دا ذکر کریندیں انھاں آکھیا جو پاکستان نے بیلاروس، روس، قازقستان،ازبکستان، افغانستان-پاکستان ملٹی موڈل ٹرانسپورٹ کوریڈور متعلق مفاہمتی یادداشت تے جون 2024ء اچ روس دے نال ریلوے تعاون دے ہک معاہدے تے دستخط کیتے۔ انھاں آکھیا جو ریل لنک دے قیام توں ݙوطرفہ تجارت اچ نمایاں ودھارا تھیسی تے کوئٹہ-تفتان ریلوے لائن دی اپ گریڈیشن دا رستہ وی ہموار تھیسی۔ انھاں آکھیا جو ایں ویلھے ݙوہیں ملکاں وچال براہِ راست پروازاں موجود کائنی تاں جو ݙوہیں ملک وقتی انھاں دی بحالی دے امکانات تے غور کریندے پئن، اساݙیاں فضائی کمپنیاں بالخصوص کارگو پروازاں کیتے کوڈ شیئرنگ تے ٹرانزٹ روٹس دے انتظامات دا جائزہ گھن سڳدن۔ توانائی دے شعبے اچ تعاون تے ڳالھ کریندے وفاقی وزیر آکھیا جو توانائی پیدا کرݨ آلے وݙے عالمی ملک دی حیثیت نال روس پاکستان کیتے تعاون دے وسیع موقع ݙیندے۔ انھاں ݙسایا جو روسی توانائی کمپنی زاروبزنیفٹ فروری 2025ء اچ پاکستان پٹرولیم لمیٹڈ (پی پی ایل) تے آئل اینڈ گیس ڈویلپمنٹ کمپنی لمیٹڈ (او جی ڈی سی ایل) دے نال مفاہمتی یادداشتاں تے دستخط کیتے جݙاں جو اگست 2025ء توں پاکستان اچ ایں دی آپریشنل موجودگی تیل تے گیس دے شعبے اچ تعاون کوں مزید تکڑا بݨاوݨ دے پاسے ہک اہم پیشرفت اے۔انھاں گیس دے شعبے، ایل این جی ݙیوݨ تے مربوط گیس منصوبیں اچ پاکستانی شراکت داراں دے نال تعاون کیتے نوواٹیک دی دلچسپی دا وی خیرمقدم کیتا جݙاں جو روس ہائیڈرو گروپ دے پاسوں پاکستان انجینئرنگ شراکت دار بݨݨ دی دلچسپی کوں وی مثبت قرار ݙتا۔ سردار اویس احمد خان لغاری پاکستان سٹیل ملز دی بحالی کوں پاکستان تے روس دی تاریخی شراکت داری دا ہک نمایاں منصوبہ قرار ݙیندیں آکھیا جو ایں دی کامیاب تکمیل ݙوہیں ملکاں وچال پراݨی دوستی تے اقتصادی تعاون دی علامت ہوسی۔ تعلیمی تعاون دے حوالے نال انھاں آکھیا جو ایں ویلھے تقریباً ہک ہزار 87 پاکستانی طلبہ روس دی جامعات تے تعلیمی اداریں اچ زیرِ تعلیم ہن۔ انھاں پاکستانی طلبہ کیتے روسی سکالرشپ پروگراماں دی تعریف کریندے خصوصاً سائنس تے ٹیکنالوجی دے شعبیں اچ مزید تعلیمی موقع ودھاوݨ تے زور ݙتا۔ وفاقی وزیر پاکستان تے روس وچال ری ایڈمیشن معاہدے تے دستخط دا خیرمقدم کریندیں ایں کوں عوامی رابطے ودھاوݨ د پاسے اہم پیشرفت قرار ݙتا تے کاروباری شخصیات، طلبہ تے سیاحواں کیتے ویزا نظام کوں مزید سوکھا بݨاوݨ تے زور ݙتا۔ سردار اویس احمد خان لغاری آکھیا جو ویبینار توں پاکستان تے روس وچال تجارت، توانائی، تعلیم تے رابطہ کاری دے شعبیں اچ تعاون دے ودھدے امکانات دی توثیق تھئی اے تے انھاں کوں یقین اے جو مسلسل رابطے تے مکالمے نال اے تعاون عملی نتیجے دی صورت اچ سامݨے آسی