دہشت گردی مکاوݨ کیتے پرعزم ہیسے، امن دی بحالی تے ترقی کیتے سارے دستیاب وسائل بروئے کار گھن آئے ویسن، وزیرِاعظم شہباز شریف دا صوبائی ایپکس کمیٹی دے اجلاس توں خطاب

کوئٹہ۔9 جولائی (اے پی پی) وزیرِاعظم محمد شہباز شریف ملک توں دہشتگردی مکاوݨ دے غیر متزلزل عزم دا اعادہ کریندیں آکھیے جو ملک دی سیاسی و عسکری قیادت مکمل یکسوئی دے نال دہشتگردی مکاوݨ کیتے پرعزم اے، چھیکڑی فسادی دہشتگرد دے خاتمے تئیں جنگ جاری رہسی، حکومت سارے دستیاب وسائل بروئے کار گھن آندیں پاکستان کوں امن، ترقی تے خوشحالی دے رستے ٹوریسی، دشمن پاکستان دی سفارتی کامیابیاں تے گزریل سال معرکہِ حق اچ ملݨ آلیاں کامیابیاں توں خائف اے۔ اے ڳالھ انہاں کوئٹہ اچ صوبائی ایپکس کمیٹی دے اجلاس توں خطاب کریندیں آکھی۔اجلاس اچ چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر، گورنر بلوچستان شیخ جعفر خان مندوخیل، وزیرِاعلیٰ بلوچستان میر سرفراز بگٹی، وفاقی وزیرِاطلاعات عطا اللہ تارڑ، وفاقی وزیرِ اقتصادی امور احد خان چیمہ، وزیرِاعظم دے مشیرسیاسی امور رانا ثناء اللہ تے قانون نافذ کرݨ الے اداریں دے سربراہان شرکت کیتی۔ اجلاس توں خطاب کریندیں وزیرِاعظم آکھیا جو گزریل چار ݙینھ اچ بلوچستان اچ ٻہوں افسوسناک دہشت گردی دے واقعات پیش آئے، جنھاں اچ پولیس اہلکار، سکیورٹی فورسز دے جوان تے بے گناہ شہری شہید تھئے۔ انھاں آکھیا جو سکیورٹی فورسز مؤثر کارروائیاں کریندیں 54 دہشت گرداں کوں جہنم واصل کیتا، دہشت گردی دے خلاف جنگ ایں ویلھے تئیں جاری رہسی جݙاں تئیں چھیکڑی فسادی دہشتگرد دا خاتمہ نی تھی ویندا۔ شہباز شریف آکھیا جو افواجِ پاکستان، قانون نافذ کرݨ آلے اداریں تے پوری قوم دہشت گردی دے خلاف بے مثال قربانیاں ݙتن۔ قوم آپݨی بہادر افواج تے سکیورٹی اداریں دے نال کھڑی اے تے یقین رکھیندی اے جو اِنھاں قربانیاں دے نتیجے اچ دہشت گردی دا مُنڈھوں خاتمہ تھیسی۔انھاں آکھیا جو ایں اچ کوئی شک نی جو دہشت گردی دے ایں فتنے اچ پاکستان دے مشرقی ہمسائے ملک دا بھرپور کردار اے، جیڑھا دہشت گرداں کوں اسلحہ، مالی معاونت تے ٻیاں سہولتاں ݙیندا پئے۔ انھاں آکھیا جو افغانستان دی سرزمین استعمال کریندیں دہشت گرد خیبرپختونخوا تے بلوچستان اچ حملے کریندن، تانجو ریاست اِنھاں عناصر دے مذموم عزائم کوں ہر صورت ناکام بݨیسی۔ وزیرِاعظم آکھیا جو ملک دی سیاسی و عسکری قیادت مکمل یکسوئی دے نال دہشتگردی مکاوݨ کیتے پرعزم اے، دشمن پاکستان دی سفارتی کامیابیاں تے گزریل سال معرکہِ حق اچ ملݨ آلیاں کامیابیاں توں خائف اے، ایں کیتے او مختلف ذرائع توں ملک اچ عدم استحکام پیدا کرݨ دی کوشش کریندا پئے ، لیکن پاکستان دی سیاسی و عسکری قیادت متحد اے تے دہشت گردی دے خاتمے کیتے آپݨے عزم تے قائم اے۔ انھاں آکھیا جو حکومتِ پاکستان، حکومتِ بلوچستان تے افواجِ پاکستان دہشت گردی دے مکمل خاتمے کیتے سارے وسائل بروئے کار گھن آسن تانجو ملک کوں امن، استحکام تے ترقی دا گہوارہ بݨایا ونڄ سڳے۔ وزیرِاعظم دہشت گردی دے واقعات اچ شہید تھیوݨ آلیں کوں خراجِ عقیدت پیش کریندیں آکھیا جو اللہ تعالیٰ شہداء دے درجات بلند تے جنت الفردوس اچ جاہ ݙیوے، انھاں دے لواحقین کوں صبرِ جمیل عطا کرے تے زخمیاں کوں وقتی صحت یاب کرے۔ انھاں آکھیا جو شہداء دیاں قربانیاں اصلوں ضائع نہ ویسن بلکہ ایہے قربانیاں پاکستان اچ پائیدار امن دی بنیاد بݨسن