سرکاری ملکیتی اداریں متعلق کابینہ کمیٹی پاکستان نیشنل شپنگ کارپوریشن دے بورڈ اچ خالی آسامی تے آزاد ڈائریکٹر دی تقرری دی منظوری ݙے ݙتی

اسلام آباد۔9 جولائی (اے پی پی) سرکاری ملکیتی اداریں متعلق کابینہ دی کمیٹی پاکستان نیشنل شپنگ کارپوریشن دے بورڈ اچ خالی آسامی تے آزاد ڈائریکٹر دی تقرری متعلق سمری دی منظوری ݙے ݙتی۔ کمیٹی دا اجلاس اتھاں وفاقی وزیرِ خزانہ و محصولات سینیٹر محمد اورنگزیب دی صدارت اچ منعقد تھیا۔ اجلاس اچ پٹرولیم ڈویژن دے پاسوں پاکستان پٹرولیم لمیٹڈ (پی پی ایل) تے سیندک میٹلز لمیٹڈ (ایس ایم ایل) دے بورڈ آف ڈائریکٹرز دی تشکیل متعلق ݙو سمریاں تے غور کیتا ڳیا۔ تفصیلی مشاورت دے بعد کمیٹی ایں امر تے زور ݙتا جو سارے سرکاری ملکیتی اداریں دے بورڈز دی تشکیل چنڳی طرزِحکمرانی دے اصولاں تے اسٹیٹ اونڈ انٹرپرائزز اونرشپ اینڈ مینجمنٹ ایکٹ تے متعلق پالیسی دی دفعات دے عین موجب تھیوݨی چاہیدی اے۔ایں ضمن اچ ایں اصول تے وی سختی نال عملدرآمد یقینی بݨایا ونڄے جو ہر بورڈ اچ متعلقہ سپانسرنگ وزارت یا ڈویژن دی نمائندگی صرف ہک بلحاظ عہدہ ڈائریکٹر تئیں محدود رہے۔ اجلاس اچ پٹرولیم ڈویژن دے پاسوں پیش کیتی ڳئی ہک ٻئی سمری تے وی غور کیتا ڳیا جیں اچ توانائی دے شعبے نال تعلق رکھݨ آلے کجھ سرکاری اداریں کوں بین الاقوامی مالیاتی رپورٹنگ معیارات آئی ایف آر ایس 14 تے آئی ایف آر ایس 9 دے اطلاق توں استثنیٰ ݙیوݨ دی درخواست کیتی ڳئی ہئی۔ کمیٹی ایں تجویز تے فیصلہ مؤخر کریندیں پٹرولیم ڈویژن، وزارتِ خزانہ تے وزارتِ قانون و انصاف دے نال مزید مشاورت دے بعد نظرِثانی شدہ تجویز ول کمیٹی دے سامݨے پیش کرݨ دی ہدایت کیتی۔کمیٹی وزارتِ بحری امور دے پاسوں پاکستان نیشنل شپنگ کارپوریشن دے بورڈ اچ خالی آسامی تے ہک آزاد ڈائریکٹر دی تقرری متعلق سمری دی منظوری وی ݙے ݙتی۔ اجلاس اچ وزارتِ صنعت و پیداوار دے پاسوں سمال اینڈ میڈیم انٹرپرائزز ڈویلپمنٹ اتھارٹی (سمیڈا) دی درجہ بندی متعلق سمری تے وی غور کیتا ڳیا۔ کمیٹی قانونی تے غیر تجارتی نوعیت دے پیشِ نظر سمیڈا کوں سرکاری ملکیتی اداریں دی فہرست توں خارج کرݨ دی منظوری وی ݙے ݙتی۔ اجلاس اچ وفاقی وزیرِ بحری امور محمد جنید انوار چوہدری بذریعہ ویڈیو لنک شرکت کیتی جݙاں جو متعلقہ وزارتاں، ڈویژنز تے ریگولیٹری اداریں دے وفاقی سیکرٹریز تے سینئر حکام وی اجلاس اچ شریک تھئے۔