نائب وزیرِاعظم دی صدارت حکومتی کارکردگی اچ بہتری بارے کمیٹی دا اجلاس، منظور شدہ سفارشات وزیرِاعظم کوں پیش کیتی ویسن

اسلام آباد۔10 جولائی (اے پی پی) حکومتی کارکردگی بہتر بݨاوݨ کیتے اصلاحاتی سفارشات کوں حتمی شکل ݙے ݙتی ڳئی۔ نائب وزیرِاعظم اتے وزیرِ خارجہ سینیٹر محمد اسحاق ڈار دی صدارت حکومتی کارکردگی اچ بہتری بارے کمیٹی دا اجلاس اسلام آباد اچ تھیا جئیں اچ سرکاری نظام کوں ٻیا مؤثر تے جدید بݨاوݨ کیتے اصلاحاتی تجاویز دا جائزہ گھدا ڳیا۔ جمعے کوں دفترِ خارجہ دے ترجمان توں جاری بیان دے مطابق اجلاس اچ پنج ذیلی ورکنگ گروپس ولوں پیش کیتیاں ڳیاں سفارشات تے تفصیلی غور کیتا ڳیا اتے انھاں کوں حتمی شکل ݙے ݙتی ڳئی۔ اِنھاں تجاویز اچ وفاقی سیکریٹریٹ دی تنظیمِ نو، ای آفس کوں جدید فیصلہ سازی دے نظام اچ تبدیل کرݨا، ایم ایس ونگ اچ اصلاحات، کارکردگی جائزہ رپورٹ دے نظام کوں بہتر بݨاوݨا اتے تمام حکومتی اداریاں وچال مربوط حکمتِ عملی کوں فروغ ݙیوݨ شامل اے۔ کمیٹی دی منظور شدہ سفارشات ٻئے غور تے منظوری کیتے وزیرِاعظم کوں پیش کیتی ویسن۔ اجلاس اچ پٹرولیم تے آئی ٹی تے ٹیلی کام دے وفاقی وزراء، وزیرِاعظم دے معاونِ خصوصی طارق باجوہ، کابینہ، اسٹیبلشمنٹ، اقتصادی امور تے ٹیلی کام دے وفاقی سیکرٹریز تے ٻئے متعلقہ حکام شرکت کیتی۔