نائب وزیرِاعظم سینیٹر محمد اسحاق ڈار دی صدارت اجلاس، اسلام آباد اچ او آئی سی دی تریمتیں بارے 9 ویں وزارتی کانفرنس دی تیاریاں دا جائزہ

اسلام آباد۔10 جولائی (اے پی پی) نائب وزیرِاعظم تے وزیرِ خارجہ سینیٹر محمد اسحاق ڈار 12 تے 13 جولائی کوں اسلام آباد اچ تھیوݨ آلی اسلامی تعاون تنظیم (او آئی سی) دی تریمتیں بارے 9 ویں وزارتی کانفرنس دی تیاریاں دا جائزہ گھنݨ کیتے اعلیٰ سطح دی کمیٹی دے آٹھویں اجلاس دی صدارت کیتی۔ جمعے کوں دفترِ خارجہ دے مطابق اجلاس اچ کانفرنس دی حتمی تیاریاں دا تفصیلی جائزہ گھدا ڳیا۔ سیکرٹری انسانی حقوق نے کانفرنس دے پروگرام، غیر ملکی وفود دی سہولت، پروٹوکول، سکیورٹی، لاجسٹکس، میڈیا انتظامات تے بین الوزارتی رابطہ توں متعلق کیتے ڳئے انتظامات تے جامع بریفنگ ݙتی تانجو کانفرنس دا انعقاد خوش اسلوبی تے کامیابی دے نال یقینی بݨایا ونڄ سڳے۔ نائب وزیرِاعظم متعلقہ حکام دی محنت تے کوششاں کوں سراہیندیں ہوئیں ہدایت کیتی جو دنیا بھر توں ایں اہم کانفرنس اچ شرکت کیتے آوݨ آلے وفود دے قیام کوں ہر ممکن حد تائیں آرام دہ تے خوشگوار بݨایا ونڄے اتے انھاں کوں پاکستانی مہمان نوازی دی بہترین روایت دے مطابق بھرپور استقبال تے سہولیات فراہم کیتی ویسن۔ اجلاس اچ وفاقی وزیرِ قانون تے انصاف، وزیرِاعظم دے معاونِ خصوصی طارق باجوہ، سیکرٹری خارجہ، سیکرٹری انسانی حقوق تے متعلقہ وزارتاں دے ٻئے سینئر حکام شرکت کیتی۔