عوام کوں صحت دیاں بنیادی سہولتاں انھاں دی دہلیز تے پڄاوݨ حکومت دی اولین ترجیح اے، ڈاکٹر طارق فضل چوہدری

اسلام آباد۔10 جولائی (اے پی پی) وفاقی وزیرِ پارلیمانی امور ڈاکٹر طارق فضل چوہدری آکھیے جو عوام کوں صحت دیاں بنیادی سہولتاں انھاں دی دہلیز تے پڄاوݨ حکومت دی اولین ترجیح اے، بلوچستان اچ جیڑھا کجھ تھیندا پئے اے حقوق دی جنگ نی بلکہ بھارت دی طرفوں مسلط کیتی ڳئی پراکسی وار اے، پوری قوم دا عزم اے جو پاکستان اچ امن و خوشحالی دے حوالے نال آپݨا کردار ادا کروں۔ اتھاں پھلگراں اچ ڈیجیٹلائزڈ ہیلتھ سنٹر دی افتتاحی تقریب توں خطاب کریندیں انھاں آکھیا جو اسلام آباد دی 50 فیصد آبادی دیہاتاں تے مشتمل اے، اتھوں مریضاں کوں علاج معالجے کیتے شہر دے وݙے ہسپتالاں اچ ونڄݨا پوندے جݙاں جو اسلام آباد دے وݙے ہسپتالاں اچ خیبرپختونخوا، جہلم، مری تے کوٹلی ستیاں توں وی لوک آندن۔ انھاں آکھیا جو پہلے پمز اچ روزانہ 400 توں 500 تئیں مریض آندن ہݨ ایہا تعداد ودھ تے 8 توں 10 ہزار تئیں مریض روزانہ تھی چکی اے۔انھاں آکھیا جو وفاقی حکومت 1163 ارب روپے صحت دے شعبے کیتے مختص کیتن، اساݙے اسلام آباد دے 22 بنیادی مراکزِ صحت ہن جنھاں اچوں ٻہوں سارے یونٹ فعال کائنی ، انھاں کوں فنکشنل بݨاوݨا ویلھے دا اہم تقاضا اے۔ انھاں آکھیا جو وزیرِ صحت مصطفیٰ کمال صحت دے شعبے کیتے بہترین کم کریندے پئن، جیں عزم دا اظہار انھاں کیتے جے ایں تے عملدرآمد کیتا ونڄے تاں ادھی توں وی گھٹ رقم اچ اساں آپݨی آبادی کوں بغیر کہیں مشکل دے صحت دیاں سہولتاں ݙے سڳدوں، وزیرِاعظم محمد شہباز شریف دا عزم اے جو ریفارمز تے پالیسی میکنگ دے ذریعے اساں اِنھاں سارے مسئلیں تے قابو پا سڳدوں، صحت دیاں سہولتاں ݙیوݨ اساݙی بنیادی ذمہ واری اے۔ انھاں آکھیا جو میں ہک ملاقات اچ وزیرِاعظم محمد شہباز شریف توں گزارش کیتی ہئی جو اساکوں صحت دیاں سہولتاں ݙیوݨ اچ جامع منصوبہ بندی نال کم گھنݨا چاہیدے۔