چیئرمین سینیٹ سید یوسف رضا گیلانی نال مسلم ورلڈ لیگ دے سیکرٹری جنرل دی ملاقات

اسلام آباد۔10 جولائی (اے پی پی) چیئرمین سینیٹ سید یوسف رضا گیلانی نال مسلم ورلڈ لیگ دے سیکرٹری جنرل ڈاکٹر محمد بن عبدالکریم العیسیٰ دی قیادت اچ ہک اعلیٰ سطحی وفد پارلیمنٹ ہاؤس اچ ملاقات کیتی۔ ملاقات اچ پاکستان تے سعودی عرب دے بھرپی آلے تعلقات، مسلم امہ دے اتحاد، عالمی امن، بین المذاہب ہم آہنگی، بین الپارلیمانی سفارت کاری، تجارت، سرمایہ کاری تے خطے دی مجموعی صورتحال تے ڳالھ مہاڑ کیتی ڳئی ۔ سینیٹ سیکرٹریٹ موجب چیئرمین سینیٹ وفد دا خیرمقدم کریندیں آکھیا جو پاکستان، سعودی عرب دے نال آپݨے تاریخی، بھرپی آلے، مذہبی تے ثقافتی تعلقات کوں اہمیت ݙیندے۔ انھاں آکھیا جو سعودی عرب ہمیشہ اوکھے ویلھے پاکستان دا ساتھ ݙتے تے ݙوہیں ملکاں دے تعلقات سانجھے اعتماد، مشترکہ عقیدے تے پراݨے تعاون تے ہن، جیڑھے وقت نال تکڑے تھیندے پئن۔سید یوسف رضا گیلانی آکھیا جو سعودی عرب اچ رہݨ آلے لکھاں پاکستانی ݙوہیں ملکاں وچال تکڑے پل دا کردار ادا کریندے پئن تے آپݨی محنت، صلاحیتاں تے خدمات دے ذریعے نہ صرف سعودی عرب دی ترقی اچ حصہ پیندے پئن بلکہ پاکستان دے بہترین سفیر وی ہن۔ انھاں آکھیا جو پاکستان تے سعودی عرب وچال تجارت، سرمایہ کاری، توانائی تے اقتصادی تعاون دے وݙے موقع موجود ہن جنھاں توں بھرپور فیدہ چاوݨ دی لوڑھ اے۔ انھاں بطور سپیکر قومی اسمبلی، وزیراعظم پاکستان تے چیئرمین سینیٹ سعودی عرب دے آپݨے مختلف سرکاری دوریں دا حوالہ ݙیندیں آکھیا جو اِنھاں دوریں دے دوران ݙوہیں ملکاں وچال مختلف شعبیں اچ تعاون ودھاوݨ کیتے اہم پیشرفت تھئی۔ چیئرمین سینیٹ آکھیا جو پاکستان دے عوام حرمین شریفین نال والہانہ عقیدت رکھیندن تے خانہ کعبہ تے مسجدِ نبوی پوری امتِ مسلمہ دے ایمان تے روحانی وابستگی دا مرکز ہن۔انھاں مسلم ورلڈ لیگ دے پاسوں امتِ مسلمہ دے اتحاد، اعتدال، بین المذاہب ہم آہنگی، اسلاموفوبیا دے خاتمے تے امن دے ودھارے کیتے کیتیاں ونڄݨ آلیاں خدمات دی تعریف کریندے آکھیے جو موجودہ عالمی حالات اچ مسلم دنیا کوں درپیش چیلنجز نال نبٹݨ کیتے اتحادِ امت، مشترکہ حکمتِ عملی، مؤثر سفارت کاری تے تکڑے بین الپارلیمانی رابطے ناگزیر ہن۔ سید یوسف رضا گیلانی آکھیا جو پاکستان ہمیشہ مذاکرات، مفاہمت تے سفارتکاری کوں جھیڑیں دے حل دا واحد مؤثر ذریعہ سمجھدے تے خطے سودھےدنیا اچ امن، استحکام تے سانجھےاحترام دے ودھارے کیتے آپݨا مثبت تے تعمیری کردار جاری رکھیسی۔ انھاں مسلم ملکاں وچال سفارتی رابطے، پارلیمانی تعاون، عوامی رابطے، تجارت، سرمایہ کاری، نوجواناں دی ترقی، سائنسی تحقیق تے تعلیمی اشتراک کوں مزید  ودھاوݨ تے زور ݙیندے آکھیا جو اسلام آباد اچ منعقدہ بین الپارلیمانی سپیکرز کانفرنس مسلم دنیا دے پارلیمانی تعاون کوں نویں جہت ݙیوݨ دے پاس ہک اہم سنگِ میل ثابت تھئی اے۔ایں موقع تے مسلم ورلڈ لیگ دے سیکرٹری جنرل ڈاکٹر محمد بن عبدالکریم العیسیٰ چیئرمین سینیٹ سید یوسف رضا گیلانی دی پرتپاک میزبانی تے شکریہ ادا کریندیں پاکستان دے کردار کوں زبردست خراجِ تحسین پیش کیتا۔ انھاں آکھیا جو پاکستان مسلم دنیا دا ہک اہم تے باوقار بھرا ملک اے جئیں ہمیشہ امتِ مسلمہ دے مفادات دے تحفظ تے عالمی امن دے ودھارے اچ مثبت کردار ادا کیتے۔ ڈاکٹر محمد بن عبدالکریم العیسیٰ آکھیا جو اڄوکے ایران-امریکہ کشیدگی اچ پاکستان ٻہوں مؤثر تے دانشمندانہ سفارتی کردار ادا کریندیں ݙوہیں فریقاں کوں مذاکرات دی میز تے گھن آوݨ اچ اہم کردار ادا کیتا جیڑھی پاکستان دی ہک وݙی سفارتی کامیابی اے۔ انھاں آکھیا جو ایں مثبت کردار دی پوری دنیا اچ تعریف تھیندی پئی اے تے ایں توں نہ صرف پاکستان بلکہ پوری مسلم دنیا دا وقار بلند تھئے ۔ انھاں آکھیا جو پاکستان اے ثابت کیتے جو مسلم ملک دہشت گردی نی بلکہ امن، اعتدال، رواداری تے ہم آہنگی دے علمبردار ہن۔ انھاں آکھیا جو سعودی عرب سودھے پوری مسلم دنیا کوں پاکستان دی ایں کامیاب سفارتکاری تے ماݨ اے تے پاکستان عالمی سطح تے ہک ذمہ وار، بااعتماد تے مؤثر ریاست دے طور تے آپݨی شناخت مزید مستحکم کیتی اے۔