بینک ترجیحی شعبیں بالخصوص ایس ایم ای سیکٹر کیتے قرضے ݙیوݨ اچ ودھارا کرن ، وزیرِاعظم محمد شہباز شریف

اسلام آباد۔10 جولائی (اے پی پی) وزیرِاعظم محمد شہباز شریف پاکستان دی پائیدار معاشی ترقی کیتے مختلف شعبیں کوں سوکھیاں شرطاں تے مالی سہولتاں ݙیوݨ کوں ناگزیر قرار ݙیندیں ہدایت کیتی اے جو بینک ترجیحی شعبیں بالخصوص ایس ایم ای سیکٹر کیتے قرضے ݙیوں اچ چنڳاں ودھارا کرن ۔ وزیرِاعظم محمد شہباز شریف دی زیرِ صدارت پاکستان اچ ایکسیس ٹو فائنانس دے ودھارے دے حوالے نال اعلیٰ سطح دا اجلاس تھیا۔ وزیرِاعظم دفتر دے میڈیا ونگ توں جاری بیان موجب اجلاس اچ وزیرِاعظم کوں ایکسیس ٹو فائنانس پلان تے بریفنگ ݙتی ڳئی تے معاشی استحکام توں پائیدار معاشی ترقی دے سفر کوں تکھا کرݨ کیتے ایکسیس ٹو فائنانس پلان دیاں ترجیحات تے اہداف تے روشنی پاتی ڳئی۔بریفنگ اچ ݙسایا ڳیا جو بنیادی ترجیحات اچ مالی سہولتاں ݙیوݨ کوں وسعت ݙیوݨا تے ایں کوں قومی سطح تے مرکزی دھارے دا حصہ بݨاوݨا شامل اے۔ بریفنگ موجب چھوٹے تے درمیانے درجے دے کاروبار (ایس ایم ایز)، زراعت، برآمدات، قابلِ تجدید توانائی، ہاؤسنگ تے آئی ٹی شعبیں کیتے سوکھے قرضیں تے کریڈٹ تئیں رسائی ودھاوݨا پلان دا مرکزی نکتہ اے، برآمدات اچ ودھارا، پائیدار معاشی ترقی تے روزگار دے نویں موقع پیدا کرݨا پلان دا بنیادی مقصد اے۔ بریفنگ اچ ݙسایا ڳیا جو ایں منصوبے تے عملدرآمد کریندیں ہوئیں وزارتِ خزانہ، سٹیٹ بینک آف پاکستان، صوبائی حکومتاں تے متعلقہ اداریں تے مشتمل پورے نظام تے مبنی طریقہِ کار اختیار کیتا ویسی۔ وزیرِ خزانہ نویں گورننس سٹرکچر دی سربراہی کریسن جݙاں جو گورنر سٹیٹ بینک آف پاکستان شریک سربراہ ہوسن، گورننس سٹرکچر دے تحت باقاعدہ اجلاس منعقد تھیسن تے وزیرِاعظم کوں ہر مہینے پیش رفت دا ݙسایا ویسی ۔ بریفنگ موجب نویں گورننس سٹرکچر دے تحت اڳلے 2 سال کیتے مختلف شعبیں اچ مالی سہولتاں ݙیوݨ دے حوالے نال پرعزم اہداف مقرر کیتے ڳئن۔وزیرِاعظم اجلاس توں خطاب کریندیں آکھیا جو پاکستان دی پائیدار معاشی ترقی کیتے مختلف شعبیں کوں سوکھیاں شرطاں تے مالی سہولتاں ݙیوݨ ناگزیر اے، ایس ایم ای سیکٹر ملکی معیشت دی ریڑھ دی ہݙی دی حیثیت رکھیندے۔ انھاں ہدایت کیتی جو بینک ترجیحی شعبیں بالخصوص ایس ایم ای سیکٹر کیتے قرضے ݙیوݨ اچ ودھارا کرن ۔ وزیرِاعظم آکھیا جو سوکھیاں شرطاں تے مالی سہولتاں دی دستیابی نال برآمدات اچ ودھارا، روزگار دے نویں موقع تے پائیدار معاشی ترقی ممکن تھیسی، مالی سہولتاں ݙیوݨ بہتر کارکردگی ݙکھاوݨ آلے بینکاں دی حوصلہ افزائی کیتی ویسی۔ وزیرِاعظم آکھیا جو ایکسیس ٹو فائنانس پلان تے پیش رفت دے حوالے نال ماہانہ جائزہ اجلاس دی صدارت او خود کریسن، حکومت مالی سہولتاں تئیں رسائی ودھا تے معیشت کوں مزید تکڑا تے برآمدات تے مبنی بݨاوݨ چاہندی اے۔وزیرِاعظم کوں ݙسایا ڳیا جو ایکسیس ٹو فائنانس پلان دے اہداف اچ بینکاں دے پاسوں ایس ایم ای سیکٹر کیتے قرضیں دی تعداد تے قرض حاصل کرݨ آلے کاروباراں دی تعداد اچ ودھارا اضافہ شامل اے، نجی شعبے دے قرضیں اچ ایس ایم ای سیکٹر دا حصہ 7 فیصد توں ودھا تے اڳلے ݙو سال اچ 10 فیصد کرݨ دا ہدف مقرر کیتا ڳئے۔ بریفنگ موجب ایس ایم ای شعبے اچ قرضیں توں مستفید لوکاں دی تعداد 310,000 توں ودھا تے اڳلے ݙو سال اچ 750,000 کرݨ دا ہدف مقرر کیتا ڳئے۔ اجلاس اچ نائب وزیرِاعظم و وزیرِ خارجہ سینیٹر محمد اسحاق ڈار، وفاقی وزراء رانا تنویر حسین، اعظم نذیرتارڑ، احد خان چیمہ، محمد اورنگزیب، عطاء اللہ تارڑ، وزیرِ مملکت خزانہ بلال اظہر کیانی، معاونِ خصوصی ہارون اختر، گورنر سٹیٹ بینک جمیل احمد، پاکستانی بینکاں دے صدور و سی ای اوز، صوبائی چیف سیکرٹریز تے اعلیٰ سرکاری حکام شریک ہن